Read Hadiyya Xiqqi Kitaaba 24 Bible Online

Xiqqi Kitaaba 24 - Hadiyya bible

Xiqqi Kitaaba 24

¹Baala'aamim Waa'i Isra'ee'l ooso maasse'eena hasukkisa la'aa lasage od kiireena marukkoyyo. Ixxim ixxi ille udma'i uulli kollonne dabaraa

²Isra'ee'l minaadab sulli sullinne wiiddanta'a afuutto'ookkoka moo'ukko. Waa'i Ayyaanim ixxonne dillu bikkina

³«Bi'oor beet Baala'aama, woccoo hiraaqqi sagar kane; illi fooqaa hundem luwwam moo'eena xanoo manchi

⁴Waa'ika sagara macceesookkok hundam xano Waa'ika kaalta moo'ookkok ubaa hee'ukkok ihukkaarem illi fooqaa wocoo manchi sagar

⁵Yaaqooba, ki dukkaannuwwi Isra'eela, at wiiddantaa yoonti beyyuwwi hinkaa'nna mishisoolla?

⁶Ixxuwwim biddiqaakkoo haraar cebbisa; wo'i gadanonne hee'oo duubbi kaashshi beyyisa; Waa'i kaasu geneeno'isaa te'im wo'i gadanonne mutu digiphphisaa ikko'ookko.

⁷Ixxuwwi haralliinsi wo'i wo'mmaa daadoohane; Ixxuwwi zeretim hundi ammanem wo'o hoogoobee'ane; Ixxuwwi adilim Agaagiinsi lophphaakkoohan ihookko; ixxi adillanim iimiimakkoohan ihookko.

⁸Ixxuwwa Gibxiinsi fissu Waa'i ixxuwwina mat buud yoo moochchisa ihaa oramookko. Ixxuwwina diina'i ikko'i minaadaba hundam dereeransookko. Ee diina'i miqem iiqansookko. Xiyyuwwinnem qasookko.

⁹Ku minaadab amadeena gudu hobbichchisaa dugoo meentichchi hobbichchisaa dufaakko. Ixxuwwa nakkeena xanookkok ayyette; Isra'eela maasse'ookkok maase'amona; Duumookkokim duumamona» yaa hiraago wocukko.

¹⁰Ee lasage Baalaaq Baala'aamanne lobakata quuqaa «An keese i diina'a duuntona weeshaa hee'ummo. Ihukkaarem at ixxuwwa sasem korem maasse'llitto.

¹¹Ee bikkina kaba at ki mine qaqqissaa mare. An kiina lobakat luwwa uwweena sagara aagaa hee'ummo. Ihukkaarem at eekka siixxitoobee'isa Waa'i kiina xufaakko» yaa ixxi anga qoxxisaa amadaa wocukko.

¹²Baala'aamim Baalaaqina «I beyyo asse'llitti mannina,

¹³‹Baalaaq ixxi adilla'n minenne wo'mmaa yoo biraa worqaa hundam uwwuta'nnimii i doo'llinne eroka te'im jora maham issaa Waa'i ijaajo gindeena xanoommoyyo; an wocoommok Waa'i wocona kurukkan xale'e» yaa kuraa hee'ummoyyonnihe?» yaa dabarukko.

¹⁴Lasaanchonne Baala'aam Baalaaqina «An oona'a, kaba i minaadaphphi beyyo daba'llaa maroommo. Ihukkaarem ku Isra'ee'l minaadab ki minaadabanne Waaroo doollenne issookkoka kiina qoxxisaa kuroommo waare» yukko.

¹⁵Ixxim «Oo illi erisa fooqaa moo'oo manchi, Bii'oor beet Baala'aam wocoo sagar kane;

¹⁶Waa'i sagara macceesookkok, adil Waa'ika lachcha la'ookkok, hundam xanoo Moollannika kaalta moo'ookkok; ubaa hee'ukkok kaba illi fooqu manchi kid yoolla.

¹⁷Moo'oommuulla; ihukkaarem kabadeyyo. Qoossoommuulla ihukkaarem abbis ammanenneyyo. Yaaqoobiinsi boollaankichchi firookko. Isra'eeliinsim adilla'n bicci ki'ookko. Ixxim Moo'aaphphi uulli gaballuwwa aphphisookko. Seetikam goo'n ooso bi'isookko.

¹⁸Eedoo'm uulla ixxi gulummi issookko. Diinakkichchi hee'u Seer yakkam uullim ixxi gulummi ihookko. Isra'eelim malaayyaam ihukkuuyyi marookko.

¹⁹Yaaqoobiinsi firookkok gassaanchi ihookko. Beero'i woronne gatto'i keenom guullaa bi'isookko» yaa hiraago wocukko.

²⁰Ee lasage odim Baala'aam Amaaleeqa moo'aa, «Amaaleeq hundiinsim lophphoo malaayyaam minaadab hee'ukko. Ihukkaarem lasaanchonne heer heerinam bi'ookko» yaa hiraaqqi sagara wocukko.

²¹Odim Qeenaawe'i uulli manna moo'aa, «At hee'lloo beyyi amma'nnisaakkoo beyyo; ki minim qoxxaalli ki'n woronnetti ihuta'nnim

²²Ki'nnuwwi Qeenaawe'i uulli manni Aasoor kaa'aa qeefadoo ammane bi'llakamo» yaa hiraaqqi sagara wocukko.

²³Baala'aamim lasaanchonne «Aayye! Waa'i eekka issoo ammane ayyi foorinne hee'eena xanookko?

²⁴Markabbuwwi Qophphiroosiinsi waarookko. Asooraa Eebiroonaa u'nnisookko. Ixxuwwim heer heerina bi'llamo» yaa hiraago wocukko.

²⁵Ee lasage Baalaaqim ki'aa ixxi googo marukko; Baalaaqim ixxi googo marukko.