Read Hadiyya Xiqqi Kitaaba 25 Bible Online

Xiqqi Kitaaba 25 - Hadiyya bible

Xiqqi Kitaaba 25

¹Isra'ee'l oos Shiixii'm cebbanne wiiddanta'a hee'llo'i ammane ixxuwwi goo'n oos Moo'aaphphi uulli landinne maqire saa'imma asheetto'o.

²Oo landim ee ooso Moo'aaphphi uulli waa'uwwina kitimamaa hee'u kitimiinsi ittona weeshsho'o. Isra'ee'l oosim ee kiti'm hurbaatiinsi itta'a Ba'aalina otossito'o.

³Ee'isinne Isra'ee'l oos Phee'ooranne yoo Ba'aalina otossito'i bikkina Waa'i ixxuwwanne quuqukko.

⁴Muse'enam «Isra'ee'l minaadabanne ihu i quunqi ixxuwwiinsi daba'llona ka minaadaphphi awwonsaano hundam massitaa sammi gud balli eelliinchonne shitaa i illagenne saqale.

⁵Muse'em Isra'ee'l awwonsaanina «Annannichchim ki'nnuwwi sulli lambe'ennem Phaa'ooranne yoo Ba'aalina otossukkoka hundam shi'llehe» yukko.

⁶Ee lasage Muse'ee minaadabii Keesammi Dukkaa'n goocanne wixxita'a wi'llitu'uuyyim Isra'ee'l oosiinsi mat Miidiyaa'm uullitan ikko'i mat meentichcho amadaa waarukko. Ixxim ee meentichcho ixxuwwi illaginne higisaa ixxi abaroosina hincaa'ukko.

⁷Eekkam qeessichchi Aaroonina beet beet ihu Ali'aazar beet Finihaas moo'ukko. Ixxim dummichchi lambe'enne afuuru beyyiinsi ki'aa bagado amadaa marukko.

⁸Ixxim oo manchii meentichchoo yo'i Dukkaa'n woro aagaa lamom bagadinne matissaa qasaa shukko. Ee lasage Isra'ee'l oosonne dillam hee'u booban uullukko.

⁹Ihukkaarem ee qax amman afeebe'e lamiyyii soor kum mannii boobaninne lehaa hee'ukko.

¹⁰Waa'im Muse'ena

¹¹«Qeessichchi Aaroonina beet beet Ali'aazarina beet Finhaas an ixxuwwi lambe'enne to'achchoommi to'achcha ixxi to'achchu bikkina Isra'ee'l oosonne hee'u i quunqi billaakko. Ee bikkina anim Isra'ee'l ooso i to'achchinne bi'isummoyyo.

¹²Ee bikkina oono'o, an ixxenne i xummi hidi'l sagara aagoomman ihukkisa kure.

¹³Ixxi iina ixxi Moollannina to'achchoohan ihu bikkinaa Isra'ee'l oosikam baaxiilo uramoo'isa issu bikkinaa ixxii ixxi shumo'i hundimii heer heerina qeessuwwi ikkamo» yukko.

¹⁴Miidiyaa'm uulli meentichchonne maqire lehu Isra'ee'l manchi summi Saalu'i beet Zimiiratti hee'ukko; ixxim Simi'oon sulli woronne moolli awwonsaanchi hee'ukko.

¹⁵Meentichchokim summi Kooziibatte. Is annim Xuura yakkaman hee'ukko; ixxim mat ikka'a hee'llam hofqax Miidiyaa'm moolli mannina awwonsaanchi hee'ukko.

¹⁶Waa'i Muse'ena

¹⁷«Miidiyaa'm manna diina'isa issitakka'a bi'issehe.

¹⁸Mashka'oomim ixxuwwi ki'nnuwwa Phaa'ooranne qawwiissa'a barche'e baxxo'i bikkinattee Phaa'ooranne mashka'inne ubu booba'n bikkina leto'i ixxuwwi awwonsaanchi landichchonne Kooziibanne ihamaa ki'nnuwwa qawwiisamu bikkinattee» yukko.