Read Hadiyya Xiqqi Kitaaba 27 Bible Online

Xiqqi Kitaaba 27 - Hadiyya bible

Xiqqi Kitaaba 27

¹Yooseef Beet ihu Minaas moolliinsi Maakiir beet, Gala'aad beet, Heefeer beet Xaloofihaadina Mahila, Noo'aa, Hogila, Miilikaa Tiirtisaa yakkam landi hee'llo'o.

²Ixxuwwim Keesammi Dukkaa'n gooc kolli hincita'a Muse'e illagenne, qeessichchi Ali'aazar illagenne, awwonsaa'n illagennee hundem minaadaphphi illagennee uullita'a

³«Niyyanni goo'n ooso qaroo'nnim udma'i uullanne lehaakko. Ixxim lehukkok ixxi baaxiilinnetteme bagaan mat ikka'a Waa'anne ki'llo'i Qoore'i awwonaanonne exxaateyyo.

⁴Eehannah goo'n ooso qarubee'i bikkina xalle'i niyyannik summi Isra'ee'l lambee'iinsi annanni ihaa hinkid shiinshamaa bi'ookko? Ee bikkina niinam nayyanni qarimanni lambe'enne uulli sharada uwwehe» yito'o.

⁵Muse'em ixxuwwi xa'mmichcha Waa'i kollonne hincaa'ukko.

⁶Waa'im Muse'ena,

⁷«Xaloofihaad landi xa'mmichchi hanqo'ane. Ee bikkina ixxuwwi anni qarmanni lambe'enne ixxuwwina ixxuwwi anni uulli sharada uwwehe; ixxuwwi anni uulli sharad ixxuwwan ihona.

⁸Goo'n ooso qaroo'n lehoo manchi hee'uta'n ixxi amaxxa landi lago aa'eena xanoo'isa Isra'ee'l minaadabina la'ise.

⁹Landim beelas ixxi abbaayyuwwi anni uulli sharada lago aa'llona.

¹⁰Ixxenam abbaayyuwwi bee'an ihulas ixxi annabbaayyuwwi lago aa'llona.

¹¹Odim ee manchina abbaayyuwwam ihukko annabbaayyuwwi bee'an ihulas ixxena hincixxi qarmanchi ihoo manchi lago aa'eena xanookko. An Waa'i keese ijaajummisinnem Isra'ee'l minaadab ka seeraa gattee qoxxaalli awwonsi issita'a egettona» yukko.

¹²Waa'i Muse'ena «Ka Abaariim duunanne Fittaa Isra'ee'l oosina uwweena sawwummi uulla hundam moo'e.

¹³Ixxom moo'llaa lasage kiyyabbaayyi Aaroonisam atim ki minaadaphphi kollonne wixxitootto.

¹⁴Mashka'oomim ki'nnuwwi lamim Xiin udma'i uullanne Mariiphphi wo'i gadanonne minaadab hundim eesenne boqqito'i ammane iikka keesamaakkoo malaayye ixxuwwi illagenne moo'isimma sabbakko'i bikkinatte» yukko. Mariib Xii'n udma'i uullanne Qaadeesanne hee'oo bu'o.

¹⁵Muse'em Waa'ina

¹⁶«Maara edde'u luwwi hundinam foore uwwitoo Moollanni Waa'a! Ki minaadab allaaraanchi bee'i gereebbi allaachchisa ihoobee'isa ixxuwwi illagenne firookkokaa aagookkokaa ee'isam ixxuwwa awwonsaa fissookkokaa dabaraahim aagisookkokaa mat mancho doo'lle» yaa uunxukko.

¹⁸Waa'im Muse'ena «Keesammi Ayyaan yoo Naawe'i beet Iyyaaso massitaa ki anga ixxi horoorenne isse.

¹⁹Ixxom Qeessichchi Ali'aazar illagennee hundem minaadaphphi illageennemii uullo'isa isse. Ee lasage ixxuwwi hundim yo'i beyyonne keese bikkukkisa la'ise.

²⁰Ixxenam Isra'ee'l minaadab hundim ijaajantona ki gassiinsi baxxanse.

²¹Qeessichchi Ali'aazar Uriiminne Waa'ika doo'lla la'oohan ihu bikkina ixxi Iyyaaso hara'mmookko. Iyyaasii Isra'ee'l minaadabii hundim ixxi Yoo'isanne mattona» yukko.

²²Muse'em Waa'i ijaajukkisa issukko. Iyyaasom massaa qeessichchi Ali'aazar illagennee hundem Isra'ee'l minaadaphphi illagennee uullo'isa issukko.

²³Waa'i ixxo ijaajukkisannem Muse'e ixxi anga Iyyaas horoorenne issaa lasage Iyyaas ixxi bikkoohan ihukkisa caakkisaa la'isukko.