Read Hadiyya Xiqqi Kitaaba 28 Bible Online

Xiqqi Kitaaba 28 - Hadiyya bible

Xiqqi Kitaaba 28

¹Waa'i Muse'ena

²«Isra'ee'l oos enji mishisoo shokkiisakkam hurbaaxxi kitima amman hundam iina hincaa'llona kure» yukko.

³Odim giirinne shokkiisakka'a iina Waa'ina hincaa'akkam hurbaaxxi kitim «Hundem ballam Waa'ina hincoo shokkoo kitimina miiqakkam luwwi bee'i mat hiinchi gereebbi ambulluwwik lam ihona.

⁴Mat ambula daranne la'mmeka maaro'i ballanne hincaa'llehe.

⁵Odim ambulluwwinne annannichchinnem danaam mat liitir wee'l zaytinne cukkamaakkoo mat kiilo'i qaminne maqirem wix hurbaaxxi kitim ihaa hincihona.

⁶Oohim danaamisa mishisoo enji ihaa giirinne iina Waa'ina hundi ammanem hincoo kitima. Ixxim illageen hincukkok Siina'i duunannetti hee'ukko.

⁷Luxxi ambulinne maqire aaggi kitim ihaa hincihona mat liitira ihoo qoxxaalli agga ee keesamaakkoo kiti'm beyyonne dunnehe.

⁸Uulli hiimaa maaro'oohaarem la'm ambula luxxeka hincaa'llakko'aannisam wix hurbaaxxi kitimaa aggi kitimaa eddakka'a hincaa'llehe. Oohim iina Waa'ina enji mishisoo giiranne hincoo kitim ihookko.

⁹«Usheexxaxxi ayyaamonne matem miiqakkam luwwi bee'i mat hiinchi gereebbi ambulluwwika lamo, wix hurbaaxxi kitimina wee'l zaytinne cukkamaakkoo lam kiilo'i er qamaa aggi kitimaa hincaa'llehe.

¹⁰Oohim aggi kitiminnee hundi ammanem shokkiisakka'a hincaa'akkam kitiminnee maqirem usheexxaxxi ayyaam hundam hincoo kitima.

¹¹«Agan aagu luxxi ballanne miiqakkam luwwi bee'i lam labeennuwwa, mat gereechchi ambulaa mat hiinchi gereebbi ambulluwwika lamaraa shokkiisakka'a incaa'akkam kitim ihona hundem aganannem iina Waa'ina hincaa'llehe.

¹²Labeennuwwina annannichchinam wix hurbaaxxi kitimina wee'l zaytinne cukkamaakkoo danaam qama hincaa'llehe. Oohim labeennuwwinne annannichchinnem sas kiilo'i qam gereechchi ambulinne lam kiilo'i qam

¹³mat hiinchi gereebbi ambulluwwinne annanchinnem wix hurbaaxxi kitimina mat kiilo'i qama hincaa'llakkamo. Oo shokkoo kitim hundim eese Waa'a liiransoo hurbaaxxi kitim ihaa hincookko.

¹⁴Labeennuwwinne annannichchinnem maqire lam liitir agga gereechchi ambulinnem mat liitiro'oo liitiro'i kolli agga mat hiinchi ambulluwwinne annannichchinnem mat liitir woyi'n diqaasaa hincaa'llehe. Oohim hiincho hundoomam agan aagu luxxi ballanne hincoo shokkiisakkam kitima.

¹⁵Hundi ammanem aggi kitiminne maqirem hincoo shokkiisakkam kitimiinsi mulleka mat fellakkichchi ambula baaxii'l haafixxi kitim issitakka'a iina Waa'ina hincaa'llehe.

¹⁶Waa'ik shaashshiqqi ugud luxxi agan aagu tommonnee soo'l ayyaamonnee ihona.

¹⁷Ee aga'n tommonnee onti ayyaamonnee ugud ihona. Lamar balli afeebe'em ursho'i nakkube'i qorosho'o ittehe.

¹⁸Ee uguxxi luxxi ayyaamonne keesamaakkoo dummichcha dummehe. Ee balla mah baxom baxxakkotte.

¹⁹Matem haashaaranchim bee'i lam labeennuwwaa mat gereechchi ambulaa mat hiinchi gereebbi ambulluwwika lamaraa shokkiisakka'a hincaa'akkam kitim issitakka'a iina Waa'ina hincaa'llehe.

²⁰Annannichchi labeeninne maqirem wee'l zaytinne cukkamaakkoo sas kiilo'i er qama Ee'isam gereechchi ambulinne maqire lam kiilo'i er qama wix hurbaaxxi kitim issitakka'a hincaa'llehe.

²¹Odim lamarem mat hiinchi gereebbi ambulluwwinne maqirem mat kiilo'i qama hincaa'llehe.

²²Mat fellakkichchi ambula baaxii'l haafixxi kitim issitakka'a hincaa'llehe.

²³Hundem ballam dar dara hincoo shokkiisakkam kitiminne hincoo kitimiinsi mulleka ee keeno hincaa'llakkamo.

²⁴Enji iina Waa'ina mishisoo hurbaaxxi kitimam eehido'isinne lamarem ballam hincaa'llehe. Eeham aggi kitiminne maqirem hundem ballam hincaa'llehe.

²⁵Lama'l ballannem keesamaakkoo dummichcha dummehe. Mah baxom ee ballanne baxxakkotte.

²⁶«Saanta saantanne ihoo ugudanne haareechchi hurbaaxxi kitimina hurbaaxxeka ludo iina Waa'ina hincaa'llakkam balla keesammi dummichcha dummehe. Mah baxom ee ballanne baxxakkotte.

²⁷Lam labeennuwwa, mat gereechchi ambulaa mat hiinchi gereebbi ambulluwwika lamaraa enji iina Waa'ina mishisoo shokkiisakkam kitim issitakka'a hincaa'llehe.

²⁸Labeennuwwinne annannichchinnem wix hurbaaxxi kitimina ihoo wee'l zaytinne cukkamaakkoo sas kiilo'i er qama ee'isam gereechchi ambulinne maqirem lam kiillo'i qama hincaa'llehe.

²⁹Ee'isam lamarem gereebbi ambulluwwinne maqirem mat mat kiilo'i qama hincaa'llehe.

³⁰Ki'nnuwwi baaxii'l haafitina ihoo mat fellakkichchi ambula hincaa'llehe.

³¹Ka hundem kitimaa aggi kitimaa balli hunda hincoo shokkiisakka'a hincaa'akkam kitimiinsii wix hurbaaxxi kitimiinsii mullan ihaa hincihona. Kitimina hincoo diinatim miiqakkam luwwi bee'i muccur ihukkisa qoossitakka'a laqqehe.