Read Hadiyya Xiqqi Kitaaba 3 Bible Online

Xiqqi Kitaaba 3 - Hadiyya bible

Xiqqi Kitaaba 3

¹Waa'i Muse'e Siina'i duunanne atoorassu ammane Aaroonikii Muse'ekii abaroos kanniinsi woroon yo'i keen hee'llo'o.

²Aaroonik goo'n oos sooro; ixxuwwi summim wonik Naadaabatte; mulli kee'nnek odim Abiyuudatte, Ali'aazarattee Itaamaarattee hee'ukko.

³Qeessoomaninne awwaaddeena annanni ikka'a doo'llanto'i keen ka keeno.

⁴Ihukkaarem ixxuwwiinsi Naadaabii Abiyuudii Siina'i udma'i uullanne keesamoo'n yoo giira giitta'a Waa'ina kitima hincaa'llo'i bikkina ixxi illagenne ubba'a leto'o; ixxuwwinam oos hee'ukkoyyo. Ee bikkina Aaroon hee'u doollenne hundannem xale'i Ali'aazarii Itaamaarii qeessoomaninne awwaaddam hee'llo'o.

⁵Waa'i Muse'ena

⁶«Leewi'i sullo wottaa qeessichchi Aaroonina awwaadinne hara'mmitona ixxi illagenne uullise.

⁷Ixxuwwim Aarooninaa minaadabinaa Keesammi Dukkaananne awwaadimminne baxamoo baxo hundam baxxamo.

⁸Ee Dukkaa'n woronne awwaadoo mu'uta hundam egeraan ikkamo. Isra'ee'l oosina hasisoo awwaad hundam ee Dukkaananne awwaaddona.

⁹Leewi'i ooso Aarooninaa ixxi oosinaa uwwe; ixxuwwi Isra'ee'l oosiinsi annanni ikka'a hore'oomam ixxena uwwanto'oo keeno.

¹⁰Qeessoomaninnem awwaaddona Aaroonaa ixxi oosoo doo'lle; ixxuwwiinsi bagaan ayyim ee baxo baxulas lehona» yukko.

¹¹Odim Waa'i Muse'ena

¹²«Oono'o, Isra'ee'l oosiinsi won ihaa qaramoohaanni bikkenne Leewi'i ooso i gagina massaammo; ee bikkina Leewi'i oos iihane.

¹³Mashka'oomam won hundim iihan ihu bikkinatte. Gibxi uullanne wona hundam aphphisummi ammane Isra'ee'lleka mannikaa diinaxxekaa wona i gagina annanni issaammo; ixxuwwi iihan ikkona. An Waa'a» yukko.

¹⁴Waa'i Siina'i udma'i uullanne Muse'ena

¹⁵«Leewi'i ooso moollinne moollinnee abaroosinnee annanni issitaa xige; qaramukkaanniinsi mat aganaa eehanniinsi hanaanii ihaa yoo goo'n ooso hundam xige» yukko.

¹⁶Ee bikkina Muse'e Waa'i saga'llisanne ijaajamaa xigukko.

¹⁷Leewi'ina sas goo'n oos hee'ukko; ixxuwwim Gershoonatte, Qa'aatattee Meeraarattee.

¹⁸Gershooninam Liibinaa Shimi'aa yamamoo lam goo'n oos hee'ukko.

¹⁹Qa'aatinam Amiriim, Yixihar, Keebiroonaa Uzi'eelaa yamamoo soor goo'n oos hee'ukko.

²⁰Meeraarina Mahiliinaa Mushaa yamamoo lam goo'n oos hee'ukko. Ku keen ixxuwwi abaroosisinne Leewi'i shumo'ina anno'o.

²¹Libinikii Shimi'ikii abaroos Gershoon moolli hee'llo'o.

²²Qaramukkaanniinsi mat aganaa eehanniinsi hanaanii ihu ixxuwwi goo'n oosik xig 7,500 hee'ukko.

²³Gershoon moolli wiiddanukkok Keesammi Dukkaaniinsi afareen eelliinchi aagginnetti hee'ukko.

²⁴Ixxuwwi moollo awwonsaanchim La'eel beet Eeliyaasaafatti hee'ukko.

²⁵Gershoon moollik bax Keesammi Dukkaana, ee Dukkaa'nneka worinnee biirinnee yoo ifiishshaancho, Dukkaa'n goocika du'm eddechcha,

²⁶ooxxi du'm eddechchuwwa, kiti'm beyyikaa kululleetanne yoo wixxixxi beyyi goocikaa du'm eddechcha, usseewwaa eekeeninne awwaaxxakkam luwwaa hundam egerimmi hee'ukko.

²⁷Aamiraamik, Yixihaarik, Keebiroonikii Uzi'eelikii abaroos Qa'aat moolliinsetti hee'llo'o; ixxuwwim Qa'aat moolli hee'llo'o.

²⁸Ixxuwwim Keesammi Dukkaana eggettam hee'llo'o; ixxuwwikim qaramukkanniinsi umur mat aganaa eehanniinsi hanaanii yoo goonik hundikim xig 8,600 hee'ukko.

²⁹Ixxuwwi wiidda'n beyyim Keesammi Dukkaaniinsi woroo'n qarinnetti hee'ukko.

³⁰Qa'aat moolli awwonsaanchim Uzi'eel beet Eelxaafaanatti hee'ukko.

³¹Ixxuwwim Hidi'l Saga'l Saaxina, xaraphpheeza, caakka caakkisakkam mu'uta, kiti'm beyyuwwa, Keesammi beyyonne awwaaxxakkam mu'uttuwwa, du'm eddechchuwwaa mulli awwaadoo mu'uttuwwaa hundam eggattam hee'llo'o.

³²Leewi'i oosina hundinam lob awwonsaanchi Qeessichchi Aaroon beet Ali'aazaretti hee'ukko. Ixxim Keesammi beyyonne awwaaddam keenina hundinam awwonsaanchi hee'ukko.

³³Mahiilikii Muushikii abaroos Meeraar moolli hee'llo'o; ixxuwwim Meeraar moollo.

³⁴Ixxuwwikim qaramukkanniinsi umur mat aganaa eehanniinsi hanaanii yoo goonik hundikim xig 6,200 hee'ukko.

³⁵Meeraar moolli awwonsaanchim Abihaayil beet Xuri'eelatti hee'ukko; ixxuwwi wiidda'n beyyim Keesammi Dukkaaniinsi hanaa'n qarinnetti hee'ukko.

³⁶Ixxuwwi baxim Dukkaa'n saanquwwa, laqqo'uwwa, utubbuwwa, utubbuwwi uulloo lokkuwwa, Keesammi Dukkaa'n mu'utaa hundam eekeeninne maqire awwaaxxakkam mu'uttuwwaa hundam eggarimmi hee'ukko.

³⁷Ee'isam wixxixxi beyyi kululleetanne yoo nottolluwwa, ixxuwwa uullisakam lokkuwwa, xiribbuwwaa dukkaana karakkam usseewwaa eggettam hee'llo'o.

³⁸Muse'e, Aaroonii Aaroon oosii Keesammi Dukkaa'n illagenne eelliinchi fi'l kollinne widdantam hee'llo'o. Ixxuwwim Isra'ee'l ooso bikkitta'a Keesammi Dukkaana egerimmina uwwanto'oo keen hee'llo'o. Ixxuwwiinsi bagaan Keesammi Dukkaa'n kolli hincookkok ayyim lehinne guzumo'amookko.

³⁹Waa'i ijaajukkisannem Muse'ee Aaroonii abaroosisinne xiggo'i Leewi'i goon oosik qaramukkaanniinsi umur mat aganaa eehanniinsi hanaanii yoo kee'nnek hundikim xig 22,000 hee'ukko.

⁴⁰Waa'i Muse'ena «Umur mat aganaa eehanniinsi hanaanii yoo Isra'ee'lleka won ihu goo'n ooso hundam xiggaa summi summinne kitaabe.

⁴¹Won ihaa qaramu Isra'ee'l goo'n oos bikkenne Leewi'i ooso, won ihaa qaramu Isra'ee'l fooraam diinaxxi bikkenne Leewi'i oos fooraam diinate iihan issitaa masse. An Waa'a» yukko.

⁴²Muse'em Waa'i ijaajukkisanne Isra'ee'lleka won ihaa qaramu goon ooso hundam xigukko.

⁴³Qaramukkaanniinsi umur mat aganaa eehanniinsi hanaanii yoo won goonik hundikim summi kitaabamukkisanne xig 22,273 hee'ukko.

⁴⁴Odim Waa'i Muse'ena

⁴⁵«Won ihaa qaramoo Isra'ee'l goo'n oos bikkenne Leewi'i ooso iina annanni isse; ee'isam won ihaa qaramoo Isra'ee'l fooraam diinaxxi bikkenne Leewi'i oos fooraam diinate iina annanni isse. An Waa'a.

⁴⁶Leewi'i oos xigiinsi Isra'ee'l won goo'n oos xig 273 lophphoo bikkina ee qax oos bikkenne diinate aa'e.

⁴⁷Annannichchi bikkinnem Keesammi beyyi keennaanchonne onti kin bira aa'e.

⁴⁸Ee aa'llitti diinatem Aarooninaa ixxi oosinaa uwwe» yukko.

⁴⁹Muse'em Leewi'i oos xigiinsi hanaan ikka'a hee'llo'i 273 mannika wixxu tissi bira aa'ukko.

⁵⁰Isra'ee'l won oosika Keesammi beyyi keennaanchonne 1,365 kin bira aa'ukko.

⁵¹Muse'em Waa'i ijaajukkisanne ee tissi bira Aarooninaa ixxi oosinaa uwwukko.