Read Hadiyya Xiqqi Kitaaba 30 Bible Online

Xiqqi Kitaaba 30 - Hadiyya bible

Xiqqi Kitaaba 30

¹Muse'e Isra'ee'l sulli awwonsaanina «Waa'i ijaajukkok,

²mat manchi Waa'ina uga'a aagulas te'im ma'llichcho isseena hide'ulas ee sagara wonshimmi hasisookko.

³Mat landichcho anni minenne hee'llu'uuyyim Waa'ina ma'llichcho uwwiteena uga'a aaggota'n te'im mat luchcho issitambee'isa hide'llota'n,

⁴is annim eekka macceesaa sabubeelas aaggo'i hidi'l sagara te'im uga'a hundam issita'a guullimmi hasisookko; issoommoyyo yito'i luwwam ginditeena xantamoyyo.

⁵Ihukkaarem is anni ee ise aaggo'i hidi'l sagara macceesaa lasage wonshitambee'isa hoorulas ee uga'i bikkina ise xa'mmantamoyyo. Mashka'oomim ee ise aaggo'i uga'a issita'a guulliteena xantobee'ek is anni hooru bikkinatte; ee bikkina Waa'i isena haafookko.

⁶Ee'isam mat landichcho laqa'atem ihukko jalagga'a uga'a te'im ma'llichchiinsi ega'lliteena sagara aagga'a lasage mine issitota'n

⁷eekkam is manchi macceesaa hoorubeelas ise aaggo'i uga'a hundam wonshimmi hasisookko.

⁸Ihukkaarem is manchi eekka macceesaa aaggo'i uga'am ihukko jalanganne wocco'i luwwa wonshitambee'isa hoorulas ise eekka issitambee'isa hoorukkok ixxotti ihu bikkina Waa'i isena haafookko.

⁹Goonchi lehukkotte te'im goonchiinsi fitto'ote aaggo'i ayyi uga'am te'im ma'llichchiinsi is gaga ega'lliteena sagara aaggota'n eekka hundam wonshimmi hasisookko.

¹⁰Mat meentichcho ise manchinne maqire hee'llu'uuyyi uga'a aaggota'n te'im ma'llichcho issiteena hide'llota'nii

¹¹is manchim eekka la'aa lasage eekka wonshitambee'isa hoorubeelas is ee hundam wonshimmi hasisookko.

¹²Ihukkaarem is manchi macceesaa lasage aaggo'i uga'a wonshitambee'isa hoorulas guulliteena hoorukkok ixxotti ihu bikkina Waa'i issena haafookko.

¹³Is manchim ise aaggo'i ayyi uga'am te'im is gaga ege'lliteena hidi'llo'i woshshi hundam wonshitona cawweena te'im gindeena xanookko.

¹⁴Ihona bagaan is manchi ee quux bikkina maham yoo'n hosaa garulas ise aaggo'i uga'a te'im hide'llo'i woshsha wonshimmi hasisookko. Mashka'oomim ee woshshi bikkina macceesaa maham yoo'n cawwaa urulas ise aaggo'i te'im hide'llo'i woshsha iittaa aa'aakkoo yimma.

¹⁵Ihukkaarem ee woshshi bikkina macceesaa mat qax balliinsi lasage ookki ihoo'n gatoo'isa issulas ee baaxii'l bikkina xa'mmammookkok ixxotti ihookko» yukko.

¹⁶Ku keen manchi lambe'ennee meentichchi lambe'ennee odim anni lambe'ennee mine issitobee'i landichchi lambe'ennee ihoo'isina Waa'i Muse'ena uwwu seelluwwa.