Read Hadiyya Xiqqi Kitaaba 31 Bible Online

Xiqqi Kitaaba 31 - Hadiyya bible

Xiqqi Kitaaba 31

²«Isra'ee'l minaadaba barche'e issito'i bikkina Miidiyaa'm manniinsi baado miqise; ee'isa issitaa lasage atim letootto» yukko.

³Muse'em minaadabina «Miidiyaa'm manni Waa'anne afisso'i hawwojji bikkina baado miqissakkeena orina guddehe.

⁴Isra'ee'l sulluwwiinsi annannichchiinsim mat mat kum mancho doo'llitakka'a orina asse'llehe» yukko.

⁵Ee bikkina lobakat kum Isra'ee'l minaadaphphi sulluwwiinsi annannichchiinsim mat mat kum mannicho fissita'a ee orina tommii lam kum manchii gudukko.

⁶Muse'em Keesammi mi'n mu'utaa orina mare'i ihona fugakkam xurumbuwwaa amadaa hee'u qeessichchi Ali'aazar beet Finihaasinne maqirem hundem sulliinsim mat mat kum mancho orina asse'ukko.

⁷Ixxuwwim Waa'i Muse'e ijajukkisinnem Miidiyaa'm manninne qasanta'a goona hundam shita'a guullito'o.

⁸Miidiyaa'm uulli ontem dilluwwam Eewi'i, Reeqeema, Xuura, Huuraa Reebaa'aa shito'o. Bii'oor beet Baala'aamam bisa'inne shito'o.

⁹Isra'ee'l oosim Miidiyaa'm mannika meentoo oosoo qeefaddo'o; laro, gereebba, fella'aa mulli amaxxa hundamii bogga'a massito'o.

¹⁰Miidiyaa'm manni hee'oo beero'uwwaa wiiddanta'a hee'llam beyyuwwaa hundam shokkiisso'o.

¹¹Qeefaddo'i manna, boggo'i diinatee mu'utaa hundam guggutto'o.

¹²Qeefaddo'i manna, boggo'i diinatee amaxxaa hundam Yoordaanoosiinsi eeqidonne Iyyaarko'ina illagenne yoo Moo'aaphphi uulli biir beyyonne wiiddanta'a hee'llo'i Muse'ee qeessichchi Ali'aazarii ee'isam Isra'ee'l minaadabii hundim yo'i beyyo eebbo'o.

¹³Muse'e, Ali'aazarii minaadaphphi awwonsaanii hundim gogota aa'lleena wiiddanto'i amba'iinsi fitto'o.

¹⁴Ihukkaarem Muse'e ee gaadiinsi daba'llito'i gaaxxi awwonsaanonne, shaalaqquwwannee xibbi halaqquwwannee quuqukko.

¹⁵Muse'em ixxuwwa «Meento hundam shitakkoo'n uttakko'ok mahinatte?

¹⁶Phee'ooranne hee'nnummi ammane Baala'aam sogitano aa'lla'a minaadab Waa'anne yoo amma'nnto uttamisina issito'ok meentoyyonnihe? Waa'i minaadabannem booban dillukkok ee mashka'innette.

¹⁷Ee bikkina kaba goo'n oosoo gooninne edanto'i meentoo hundam shi'llehe.

¹⁸Ihukkaarem gooninne edantobee'i baajaam landa hundam ki'nnuwwi gagina gatixxehe.

¹⁹Ki'nnuwwi lambe'iinsi manna shukkok te'im leesha nakkukkok ayyim wiidda'n beyyiinsi tochchonne lamar balla afuurona. Saxxi ballannee lama'l ballannee ki'nnuwwi gagaa qeefaddakko'i landaa haashaaranchiinsi muccussehe.

²⁰Ee'isam ayyi eddechcham te'im omachchinne, fella'i oddinne te'im haqqinne baxamu luwwi hundam muccussehe» yukko.

²¹Qeessichchi Ali'aazarim oriinsi daba'llito'i gaadaanina «Waa'i Muse'ena uwwu see'l awwonsi kane.

²²Worqi, kin bir, naas xaar, xaar, Qorqoro'i, Irsaasii giir howwodoobee'i ayyi luchchimii giirinne muccurimmi hasisookko. Giira xanoobee'i luwwi hundam muccurimmi seerina gudu wo'inne muccussitakkamo.

²³

²⁴Lama'l ballannem ki'nnuwwi eddechcha aanshehe. Ee lasage muccuttakko'oohan ikkakkam bikkina wiidda'n beyyo daba'llitakka'a aaggehe» yaa awwonsa uwwukko.

²⁵Waa'i Muse'ena

²⁶Atii Ali'aazarii minaadaphphi awwonsaaninne maqirem qeefadamu mannaa diinatee hundam xiggehe.

²⁷Ee qeefajjo'om lam beyyonne baxxansitakka'a lasage kolloo gaadaanina kolloo minaadabina hundinam uwwehe.

²⁸Gaadaanina afu sharadiinsi manniinsi, lariinsi, halliinsi, gereebbiinsii fella'iinsii onti xibbiinsi mato iina Waa'ina kitim issitakka'a annanni issehe.

²⁹Eeham iina Waa'ina annanni uwwanchi issitakka'a qeessichchi Ali'aazarina uwwehe.

³⁰Minaadaphphi sharadiinsim manniinsi, lariinsi, halliinsi, fella'iinsii gereebbiinsii ontayyiinsi mato annanni issitakka'a Keesammi Dukkaananne awwonsaan ikko'i Leewi'i oosina uwwehe» yukko.

³¹Muse'ee Ali'aazarim Waa'i Muse'e ijaajukkisanne issito'o.

³²Gaadaan qeefadda'a massito'i qeefajjo'iinsi gatukkok loh xibbee lamarayyee onti kum gereebba,

³³lamarayyee lam kum laro,

³⁴lohayyee mat kum hallaa

³⁵sadee lam kum baajaam landaa hee'ukko.

³⁶Qeefajjo'o lam gudaanchonne baxxansakko'aare gaadaanina uwwamu sharad sas xibbee sadee lamar kumaa onti xibbi gereebbaa hee'ukko.

³⁷Ee gereebbiinsim loh xibbii lamarayyii ontii Waa'ina kitim ihaa uwwamukko.

³⁸Gaadaanina uwwamu la'llek xig sadee loh kumaa hee'ukko. Ee lariinsim lamarayyii lamii Waa'ina kitim ihaa uwwamukko.

³⁹Gaadaanina uwwamu hallikim xig sad kumaa onti xibbee hee'ukko; ee halliinsim lohayyii matii Waa'ina uwwamukko.

⁴⁰Gaadaanina uwwamu baajaam landikim xig tommoo loh kumaa hee'ukko. Ee keeniinsim sadii lamii Waa'ina annanni ihukko.

⁴¹Muse'em Waa'i ixxo ijaajukkisinne ee kitimmuwwa Waa'ina annanni sharad issaa qeessichchi Ali'aazarina uwwukko.

⁴²Muse'e minaadabina baxxansu sharad gaadaa'n sharadinne gudaanchi hee'ukko.

⁴³Oohim sas xibbee sadee lamar kumaa onti xibbi gereebba,

⁴⁴sadee loh kum laro,

⁴⁵sad kumaa onti xibbi hallaa

⁴⁶tommoo loh kum baajaam landaa hee'ukko.

⁴⁷Muse'em minaadaphphi sharad ihu manniinsii diinatiinsii ontayyiinsi mato Waa'i ixxo ijaajukkisinne Keesammi Dukkaana egettam Leewi'i oosina uwwukko.

⁴⁸Ee lasage o'l gogoxxi awwonsaan hee'llo'i shaalaqquwwii xibbi halaqquwwii Muse'e beyyo waatta'a,

⁴⁹«Neese ki awwaadaan ni ijaacci woronne yoo gaadaano hundam xingaammo. Ixxuwwiinsim matim bi'ukkoyyo.

⁵⁰Ee bikkina neese annannichchim massinaa hee'nnummi worqinne baxamaakkoo wereeggi mu'uttuwwa, oohim lokki guma'a, angi laakka, guma'a, macci gutichchoo gaanji worqaa hundam niina Waa'i haafihona kitim issinaa ixxena eenbaammo» yito'o.

⁵¹Muse'ee Ali'aazarii weereggina baxamaa hee'u worqa hundam aa'llo'o.

⁵²Muse'ee Ali'aazarii Shaalaqquwwiinsii xibbalaqquwwiinsii aa'lla'a Waa'ina kitim issita'a hincaa'llo'i worqi lam xibbi kilo'o ihoohan hee'ukko.

⁵³Mulli gaadaan hundim qeefaadda'a eebbo'i luwwa ixxuwwi gaginam a'llito'o.

⁵⁴Ee bikkina Muse'ee qeessichchi Ali'aazarii worqa shaalaqquwwiinsii xibbalaqquwwiinsii aa'lla'a Isra'ee'l oosina tiissishshi mare'i ihona Keesammi Dukkaa'n beyyo eebbo'o.