Read Hadiyya Xiqqi Kitaaba 32 Bible Online

Xiqqi Kitaaba 32 - Hadiyya bible

Xiqqi Kitaaba 32

¹Roobeel sullinaa Gaad sullinaa la'llek, gereebbikii fella'ikii lobakat hor hee'ukko. Ixxuwwim Yaa'izeer uullii Gala'aad uullii diinate allaachchina makki ihukkisa moo'lla'a,

²Muse'e beyyo, qeessichchi Ali'aazar beyyoo awwonsaa'n beyyoo waatta'a,

³«Axaarootika, Diiboo'nneka, Yaa'izeerika, Niimira'ika, Haseeboo'nneka, Eeli'aa'lleka, Siibii'mmeka, Nabo'ikaa Ba'oo'nnekaa minaadaba

⁴Waa'i Isra'ee'l illagenne kaa'antamisa issu ku uulli hundim diinate allaachchina makka. Niina odim lobakat diinat yookko.

⁵Ee bikkina neese ki illagenne nuura siindaammoohaare ka uulla niina ki awwaadaanina gulummi issitaa uwwe. Yoordaanoos eeqidonnem fissititte» yito'o.

⁶Muse'em Gaadaaninaa Roobeel sullinaa «Ki'nnuwwi abbaayyuwwi ikko'i Isra'ee'l oos orina mattu'uuyyi ki'nnuwwi keyye gattakkeena hassakkamonnihe?

⁷Isra'ee'l oos Yoordaanoos daajje higga'a Waa'i ixxuwwina owwu uulla aaggambee'isa neeyyato mussiissakkamok mahinatte?

⁸Uulla shaashshitona Qaadees baarne'iinsi asse'ummi ammane ki'nnuwwi anno'im issito'ok kane.

⁹Eshkoo'l cebbi afeebe'e matta'a uullooma moo'lla'a lasage Waa'i uwwu uulla Isra'ee'l minaadab aagoobee'isa neeyyato mussiisso'o.

¹⁰Ee balla Waa'i lobakata quuqaa

¹¹‹Ixxuwwi eese wo'm sawwitinne awwontobee'i bikkina Gibxiinsi fitto'i keeniinsi umur lamiyye ihukkokii eehanniinsi hanaan ihukkokii ayyim Abrihaamina, Yisaaqinaa Yaaqoobinaa uwweena sagara aagummi uulla hore'em aagoobee'isina hide'aammo› yukko.

¹²Oohim Waa'a wo'm sawwitinne awwonto'i Qaniizichchi Yaafun beet Kaaleebiinsii Naawe'i beet Iyyaasiinsii bagaan mulli manna hundam edohane. Waa'i illagenne amma'nnanto'oo keen ikka'a siidanto'ok xale'i ixxuwwa.

¹³Waa'i quunqim Isra'ee'l oosonne qoxxukko. Ixxi illagennem jora issu oo qaranchi hundim lehaa beeddeebe'i afeebe'e sor hiinchina udma'i uullanne karkaadoo'isa issukko.

¹⁴Kaba odim ki'nnuwwi ki'nnuwwi anno'o bikkitakka'a Waa'i quunqi Isra'eelanne lophphoo'isa issitakkeena guddakko'oo haareechchi baaxiilaanchi qaranchi ikkakko'ookko.

¹⁵Ki'nnuwwi Roobeel sullii Gaad sullii kaba Waa'a awwonimma sabbakkolas Waa'im ka minaadaba udma'i uullanne urookko. Ixxuwwanne afoo bichchi bikkinam ki'nnuwwi xa'mmantakkamo» yaa dabarukko.

¹⁶Ixxuwwim Muse'e kolli hincita'a «Gaassinaa ka beyyonne neese ni diinatina oota, ni oosinaa meentinam girbamaakkoo beero'uwwa banxoommisa isse.

¹⁷Ee lasage neese Isra'ee'l oosinne maqire orina mallaa ixxuwwi gulummi ihu uulla aagga'a afuutteebe'e orammeena gundoommo. Neesem ee oriinsi daba'llineembee'e ni oosii meentii ee girbamu beero'uwwanne afuutta'a ee uulli manniinsi daphphixxitamo.

¹⁸Neesem Isra'ee'l oos annannichchim ixxuwwi gulummi ihu uulla siixxiteebe'e ni mine daba'llinoommoyyo.

¹⁹Neese ni gulumma Yoordaanoos daajjiinsi eelliinchi firanne yoo uulliinsi a'llinummi bikkina Yoordaanoos eeqidonne ixxuwwina uwwameena qoodamu uulliinsi maham baxxammoommoyyo» yito'o.

²⁰Muse'em ixxuwwina «Kaba woccakko'isam Waa'i illagenne orina mattakkolas

²¹ee'isam Waa'i ixxi diina'a ixxi illagiinsi yaayyaa fisseebe'e ki'nnuwwi hundichchim ixxi illagenne guddakka'a Yoordaanoosa higgakkolas

²²oo uulli Waa'i anganne ihaa lasage daba'llitakkeenaa Waa'ii Isra'ee'l oosii xa'mmitam xa'mmichchiinsim gattakkeenaa xantakkamo. Ku uullim Waa'i illagenne ki'nnuwwina gulummi ihookko.

²³Ihukkaarem ki'nnuwwi eekka issitakkobee'las Waa'i illagenne baaxiilo baxxakkamulli ihukkisa laqqehe. Ki'nnuwwim ee baaxiilina xa'mmantakkaman ihukkisa laqqehe.

²⁴Ee bikkina ki'nnuwwi oosinaa meentinaa beero'muwwa, ki'nnuwwi diinatina oota baxxehe. Ihukkaarem aaggakko'i sagara egellehe» yukko.

²⁵Gaad sullii Roobeel sullii Muse'ena «Neese ki awwaadaan at ni Moollanni neese ijaajjittoka hundam issinoommo.

²⁶Ni oos, meentii ni diinatii hundim ka Gala'aaxxi beero'uwwanne afuurookko.

²⁷Ihukkaarem neese gaadina gundummi ki awwaadaan hundim Waa'i illagenne orammeena at ni moollanni ijaajjittisanne eeqido filloommo» yito'o.

²⁸Ee bikkina Muse'e qeessichchi Ali'aazarina, Naawe'i beet Iyyaasinaa Isra'ee'l minaadaphphi sulli awwonsaaninaa hundinam ka ijaajo uwwukko.

²⁹Gaadikii Roobeel sullikii goon hundim Yoordaanoosa higaa Waa'i illagenne orina firulasii ixxuwwim hara'mmita'a oo uulli ki'nnuwwi anganne ihulasii Gala'aaxxi uulla ixxuwwina gulummi issitakka'a uwwehe.

³⁰Ihukkaarem ixxuwwi orina gudda'a ki'nnuwwinne maqire Yoordaanoosa higga'a mattobeelas ki'nnuwwisam Kana'aa'n uulliinsi ixxuwwi sharada baxxanta'a a'llitona» yukko.

³¹Gaad sullii Roobeel sullim «Waa'i niina ki awwaadaanina yukkoka hundam neese issinoommo.

³²Waa'i illagenne orinam gundaa Yoordaanoosa hingaa Kana'aa'n uulla malloommo. Ihukkaarem neese ni gulummi issinaa a'llinoommi uulli Yoordaanoos daajjiinsi kid yoo beyyi ihookko» yito'o.

³³Ee bikkina Muse'e Amoore'i adil Siihoon uulla, Baasaa'n adil Oog uulla, ee uullanne hee'oo beero'uwwaa odim ee uulli kululleetanne hee'oo uulluwwaa hundam Gaad sullinaa Roobeel sullinaa ee'isam Yooseef beet ihu Minaas sulli kollinaa uwwukko.

³⁴Gaad sulli girbamaakkoo Diiboonika, Axaarootika, Aaro'eerika,

³⁵Aaxiroot Soofaanika, Yaa'izeerika, Yoogbahaanika,

³⁶Beetniimraanikaa Bethaaraanikaa beero'uwwa dabatta'a girbita'a baxxo'o. Diinatinam oota baxxo'o.

³⁷Roobeel sullim Haseeboo'nneka, Eeli'aalika, Qiiryaataaymi'nneka,

³⁸Nabo'ika, lasage summi daba'llu Ba'aalma'oonikaa Siibima'ikaa beero'uwwa dabatta'a girbissa'a baxxo'o. Ixxuwwim ee dabatta'a baxxo'i beero'uwwina hundinam haareechchi summa fissito'o.

³⁹Minaas beet Maakir abaroos Gala'aaxxi uulla matta'a kaa'lla'a amadda'ahii ee uullanne hee'oo Amoore'i mannam yaayyita'ahii lasage uullooma ixxuwwi gulummi issita'a amaddo'o.

⁴⁰Ee bikkina Muse'e Gala'aaxxi uulla Minaas shumo'i ikko'i Maakir abaroosina uwwukkaare ixxuwwi ee uullanne hee'llo'o.

⁴¹Minaas sulliinsetti ihoo Yaa'iir mat mat hegeegguwwa kaa'aa amadaa lasage «Yaa'iir hegeegguwwa» yaa summa fissukko.

⁴²Ee'isam Noobaah Qanaataa ee hegeegguwwaa kaa'aa amadaa lasage ixxi gaqqi summanne «Nobaah» yaa weeshukko.