Read Hadiyya Xiqqi Kitaaba 34 Bible Online

Xiqqi Kitaaba 34 - Hadiyya bible

Xiqqi Kitaaba 34

¹Waa'i Muse'na

²«Isra'ee'l oosina, ‹An ki'nnuwwina gulummi issaa uwwoommi Kana'aa'n uulla aaggakkam ammane ee aaggakkam uullina gabal ihoo uulluwwi kanniinsi woroon yoo keeno.

³Woroo'n qa'l uulli gabal Xiin udma'i uulliinsi ki'isaa Eedoo'm uulli tochchinne aa'aa higookko. Oohim eelliinchi fi'l kollinne sooqixxi dambalaq woroo'n qa'l tochchiinsi asheerookko.

⁴Ee'isam Aqiraabima daba'llakkam beyyinne woroo'n qa'l kolli maraa Xiina higaa Qaadees Baarne'e afookko. Ee beyyiinsim Haxaaradaa'l hanaa'n qa'l eelliinchi aaggiinsi ki'isaa Aaxiimoona afookko.

⁵Aaxiimooniinsi ki'isaa Gibxi uulli gaballanne yoo cebba do'aahim Meedeteraaniyaa'n dambalaqanne uullookko.

⁶«‹Eelliinchi aaggi uulli gabalim Meedeteraaniyaa'n dambalaq ihookko.

⁷«‹Hanaa'n qa'l gabalim Meedeteraaniyaa'n dambalaqiinsi ki'isaa Hoor duuna afookko.

⁸Hoor duuniinsi ki'isaa Leebo'i Haamaata afookko; eehanniinsi ki'isaa Xadaada afookko.

⁹Eehanniinsi ki'isaa Ziifiroona higaa Haxaari'eenaananne uullookko. Ookkim ki'nnuwwina hanaa'n qa'l gabal ihookko.

¹⁰«‹Eelliinchi fi'l uulli gabal Haxaareenaanniinsi ki'isaa Shafaama afookko.

¹¹Shafamiinsi ki'isaa Aayiinsi eelliinchi firinne Riibilinne aa'aa Galii'l dambalaqiinsi eelliinchi firinne yoo duunnuwwa afookko.

¹²Oo gabalim Yoordaanoos daajjinne dillaa tochchoom Sooqixxi Dambalaqanne afookko. Oo keen ki'nnuwwi uulli gaballuwwi ihookko› yitaa kure» yukko.

¹³ Ee bikkina Muse'e Isra'ee'l oosina «Honsii kolli sullii saaminne baxxantakkona Waa'i uwwu uulli kane.

¹⁴Roobeel sullii Gaad sullii ee'isam Minaas sullik kollii abaroosinne abaroosinnem baxxanta'a ixxuwwi sharada

¹⁵Iyyaarko'i illagenne Yoordaanoosiinsi eeqidonne eelliinchi firinne a'llito'ookko» yukko.

¹⁶Waa'i Muse'ena

¹⁷«Qeessichchi Ali'aazar Naawe'i beet Iyyaasii ee uulla minaadabina gulummi issita'a baxxansitona.

¹⁸Ixxuwwinam hara'mmitona hundem sulliinsim mat mat awwonsaancho doo'lle» yukko.

¹⁹Doo'llamu manni summim Yihuxxi sulliinsi Yifun beet Kaaleeb,

²⁰Simi'oon sulliinsi Aamihud beet Salaamii'eel,

²¹Biiniyaam Sulliinsi Kiisiloon beet Eelidaad,

²²Daanni Sulliinsi Yoogil beet Buqi'i,

²³Yooseef oosiinsi Minaas sulliinsi Sufiid beet Ani'eel,

²⁴Efireem sulliinsi Shiifxaan beet Qamu'eel,

²⁵Zaabiloon sulliinsi Faarnaak beet Eeliisaafaan,

²⁶Yisaakoor sulliinsi Hooza'i beet Phaaltii'eel,

²⁷Aseer sulliinsi Seleem beet Ahiihudaa

²⁸Niftaaleem sulliinsi Amhuud beet Pheedaaheelaa yamantam keen hee'llo'o.

²⁹Waa'i Isra'ee'l oosina Kana'aa'n uullanne uulla baxxansitamisina doo'llu manni eekeen hee'llo'o.