Read Hadiyya Xiqqi Kitaaba 35 Bible Online

Xiqqi Kitaaba 35 - Hadiyya bible

Xiqqi Kitaaba 35

¹Iyyaarko'i illagenne Yoordaanos daajjiinsi eeqqixxi idinne yoo Moo'aaphphi biir beyyonne Waa'i Muse'ena,

²«Isra'ee'l oosina gulum ihu uulliinsi Leewi'i oosina hee'llam beero'uwwaa ee beero'uwwi kululleetannem ixxuwwi diinate allaa'llitam beyyoo uwwitona kure.

³Oo beero'uwwim Leewi'i oosina gulummi ihaa ixxuwwi hee'llam beyyi ihookko. Hix uullim ixxuwwi diinat allaa'lloo uulli ihookko.

⁴Oo diinat allaa'lloo hix uullim beero'i girbamu girbiinsi ki'isaa hundem kollinnem soor xibbee ontayyi meetiraa afeebe'e qeeraa'llona.

⁵Ee'isinne beero'oom lambe'ennetti ihaa eelliinchi firinne lam kum anga woroo'n qarinne lam kum anga eelliinchi aagginne lam kum anga hanaa'n qarinne lam kum anga ee beero'iinsi biireen keene; oo beyyuwwim beero'uwwanne ixxuwwina allaachchi beyyi ihookko.

⁶Ayyi manchim la'oo'n dangonne manna shuta'n gibaa magannaato aagoo beero'uwwika loho Leewi'i oosina uwwehe. Odim soree lam beero'uwwaa

⁷hix uullinne maqirem uwwehe. Ee'isinne ixxuwwina hundoomim soorii sadeenti beero'uwwii hee'ookko.

⁸Isra'ee'l sulluwwiinsi annannichchiinsim amaxxito'i uullisinne haraar yoohaanniinsi dut bero'uwwa hoffi uulli yoohaanniinsi hofqax bero'uwwam Leewi'i oosina uwwe» yukko. KUK hanqa.

⁹Waa'i Muse'ena,

¹⁰«Isra'ee'l oosina ‹Yoordaanoos daajje higgakka'a Kana'aa'n uulla aaggakkam ammane,

¹¹mat manchi huushamaa dangonne mancho shuta'n gibaa maaxamoo magannaaxxi beero'uwwa doo'llehe.

¹²Ee beero'uwwannem xiiga miqiseena hollamoo lehu manchi qarmanniinsi maaxameena xanookko. Manna shaa kasasamu manchi oogatina hincoo'n ee mancho shimmi hasisooyyo.

¹³Loh beero'uwwa doo'llehe.

¹⁴Ee doo'llitakkam beero'uwwik sas Yoordaanoos daajjiinsi eelliinchi firinne sas odim Kana'aa'n uullanne ihona.

¹⁵Oo beero'uwwim Isra'ee'l oosinaa ixxuwwi lambe'enne hee'llam waaraaninaa hundinam magannaaxxi beero'uwwi ihookko. Huushamaa mancho shukkok ayyim ka beero'uwwiinsi matonne gibaa maggannaato aageena xanookko.

¹⁶«‹Mat manchi mulleka xaarinne lehoo qaxa aphphisaa shulas oo manchi manna shaakkoohane; oo shu mannichi lehinne guzumo'amona.

¹⁷Mat manchi mulli mancho lehona sheena xanoo kininne aphphisulas oo manchi manna shaakkoohane; oo shu mannichi lehinne guzumo'amona.

¹⁸Mat manchi mulli mancho lehona haqqinne aphphisulas oo manchi manna shaakkoohane; oo shu mannichi lehinne guzumo'amona.

¹⁹Ee lehu manchina abbis qarmanchi ihu manchi ee mancho sheena xanookko. Ee bikkina siidu amman hundam sheena xanookko.

²⁰«‹Mat manchi mulli mancho sabimmiinsi ki'aa gafe'aa ubbuusaa te'im daphphaa egeraa ixxonne ma'llichcho huushaa,

²¹te'im diina'oominne ki'aa mat mancho anginne aphphisaa shulas oo manchi manna shaakkoohane; oo shu manchi lehinne guzumo'amona. Ee lehu manchina abbis qarmanchi ee shu mancho siidu ammanni hundam sheena xanookko.

²²«‹Ihukkaarem mat manchi mulleka shukkok sabimminnetti ihoo'n la'oo'n dangonne gafe'aa ubbuusimminne te'im ma'lliluchcho huushimminne

²³te'im diina'ooman hee'oo'nnii hawwodeena sawwoo'nnii kina huushaa oo kin mat mancho shuta'n

²⁴eehido'i woshshi ihoo ammane dummichchi ee shukkaannonnee xiiga miqisoo qarmanchi lambe'ennee oogatookkok kanniinsi woroon yoo see'llisannette.

²⁵Dummichchi ee kasasamu mancho lehu manchi qaramanchi angiinsi gatisaa xoraa hee'am hee'u magannaatto aagakkam beero'o dabarimmi hasisookko. Ixxim ee doollenne hundiinsi lob qeessichchi hee'u manchi leheebe'i afeebe'e eehe'em afuurimmi hasisookko.

²⁶«‹Ihukkaarem oo manna shu manchi gibaa magannaatto aagu beero'iinsi haxonne firulasii

²⁷xiiga miqiseena hasoo manchi magannaaxxi beero'iinsi haxonne siidaa shulasii ee xiigina xa'mmamooyyo.

²⁸Mashka'oomim oo manna shu manchi hundiinsi lob qeessichchi leheebe'e magannaato aagakkam beero'onne afuurimmi hasisam hee'ukko. Ihukkaarem qeessuwwa awwonsaanchi lehaa lasage oo manna shu manchi ixxi mine daba'lleena xanookko.

²⁹«Ku seerii gatti ogorii ki'nnuwwi hee'llakam uullanne hundannem ki'nnuwwinaa ki'nnuwwi shumo'inaa awwonsi ihookko.

³⁰«‹Manna shaa kasasamu ayyi manchonnem leh oogatameena xanookkok lam te'im lamiinsi hanaan ihaakkoo manni naqqasulasette. Ihukkaarem xale'i mat manchi naqqasimminne ayyi manchonnem leho oogatimmi xanamooyyo.

³¹Manna shukkok ayyim lehinne guzumo'anchi hasisookko; diinate miqimminne eedo'i guzumo'iinsi gateena xanooyyo.

³²Mat manchi gibaa magannaaxxi beero'o xoraa lasage hundiinsi lob qeessichchi lehoo'n gaassaa diinate miqaa ixxi mine daba'lloo'isa issitakkotte.

³³«‹Eekka issitakkolas ki'nnuwwi hee'llakkam uulla haashaassitakkamo. Xiig uulla haashaassoohanne. Manna shu manchik xiig dunamubeelas uulla xiigiinsi muccussimmina ihoo mulli seer od bee'e.

³⁴An Moollanni Waa'i Isra'eelinne hee'oomman ihu bikkina ki'nnuwwi hee'llakkamoka anim ki'nnuwwi lambe'enne hee'oommi ka uulla haashaassitakkotte› yihe» yukko.