Read Hadiyya Xiqqi Kitaaba 36 Bible Online

Xiqqi Kitaaba 36 - Hadiyya bible

Xiqqi Kitaaba 36

¹Yooseef beet Minaase qaru Maakiir beet Gala'aad moolliinsetti ikko'i abaroos awwonsaan Muse'e beyyoo Isra'ee'l mulli awwonsaa'n beyyoo hincita'a

²«Uulla Isra'ee'l oosina saaminne baxxansitaa uwwitona Waa'i ni moollanna keese ijaajaakko; niyyabbaayyi Xaloofihaad gulummam ixxi landina uwwitona keese ijaajaakko.

³Ihukkaarem ixxuwwi mulli sulliinsi goona aagissolas oo ixxuwwi gulummi ee ixxuwwi ladiisanto'i sullan ihimmi hasisoo'isaa ni gulummim hoffe'eena xano'isaa la'e.

⁴Amaxxi daba'lloo maarage biteesamu luwwi hundim annichchinam daba'lloo ammane Xaloofihaad landi sharad ixxuwwi ladiisanto'i sullan ihaa gatookko. Oohim ni sulli gulummi hoffe'oo'isa issoohane» yito'o.

⁵Ee bikkina Muse'e Waa'iinsi aa'u ijaaccisanne Isra'ee'l minaadaba «Yooseef oos sulli wocco'i woshshi hundim hanqa.

⁶Ee bikkina Waa'i ‹Xaloofihaad landi xale'i ixxuwwi gaqqi sulliinsi iittito'i manchina ladiisanteena xantamo› yoolla.

⁷Ee'isinne Isra'ee'l oosik gulummi mat sulliinsi mulli sullonne higooyyo. Isra'ee'l oos annannichchim gaassi ixxuwwi anno'iinsi lago aa'llo'i gulummi gulumminem hee'llona.

⁸Isra'ee'l sulli lambe'iinsi uulli sharada baxxanto'i ayyi landichchom xale'i ee sulliinsetti ihu goonina ladiisantona. Ee'isinne Isra'ee'l oosiinsi ayyim gaassi anno'i uulli sharada ixxi gulummi issaa amadeena xanookko.

⁹Mat sulli gulummi mulli sullina hore'em uwwamoone. Sulli annannichchim ixxi gaqqi gulummam amadaa hee'ona» yaa ijaajukko.

¹⁰Ee bikkina Xaloofihaad landi Waa'i Muse'e ijaajukkisanne issito'o.

¹¹Ixxuwwi summim Maahilatte, Tiirxatte, Hoogilatte, Miilka'attee No'attee ihaa ixxuwwi anni abbaayyuwwi oosinne eebaqqanto'o.

¹²Oo landim Yooseef beet ihu Minaas sulli moolli oosinne eebaqanto'o. Ixxuwwi amaxxim ixxuwwi sullanem ihukko.

¹³Iyyaarko'iinsi illagenne Yoordaanoos daajjiinsi eeqidonne yoo Moo'aaphphi uulli biir beyyonne hee'llo'i ammane Waa'i Muse'ennetti ihaa Isra'ee'l oosina uwwu ijaajii seerii ee keeno.