Read Hadiyya Xiqqi Kitaaba 5 Bible Online

Xiqqi Kitaaba 5 - Hadiyya bible

Xiqqi Kitaaba 5

¹Waa'i Muse'ena

²«Daba'llamoo oddomachchi jabbi yoo mancho te'im orachchiinsi daadoo luwwi firoo manchoo leeshaa nakkaa see'llisanne haashaaramu mancho wiiddaniinsi tochchonne fissitamisina Isra'ee'l ooso ijaaje.

³Goonam ihukko meento fissehe. I minaadaphphi lambe'enne an hee'oommi wiiddana haashaassitambee'isa ee wiiddaniinsi fissehe» yukko.

⁴Waa'i Muse'e ijaajukkisannem Isra'ee'l minaadab eehido'i manna wiiddaniinsi fissito'o.

⁵Waa'i Muse'ena

⁶«Isra'ee'l minaadabina ‹Goonam ihukko meenti ayyi manchim hinka'isinnem mulleka hawwoduta'n ee mashka'inne Waa'ina amma'nnamaakkoohan ihimma hooguta'n oo manchi hawwodaakkoohane.

⁷Oo manchi ixxi baaxiilo biiraa yihona; ee hawwojji bikkina miqimmi hasisoo bitonne xibbiinsi lamiyyi suume edaa hawwodamu manchina miqona.

⁸Ihukkaarem oo hawwodamu manchi lehuta'nnii ee miqo'om ixxeensi aa'oo abbis qarmanchi bee'uta'nnii oo miqo'i Waa'ina uwwamukkaansanne xigamaa baaxii'l haafitina kitim ihaa Waa'ina hincoo gereechchi ambulinne maqirem qeessichchina uwwamona.

⁹Isra'ee'l oos eebbam keesamaakkoo uwwanchi hundim eekka aa'u qeessichchina sharad ihookko.

¹⁰Annannichchim hincaa'oo keesamaakkoo uwwanchi qeessichchan ihona; qeessichchina uwwakkamok hundim ixxi gulummi ihookko› yihe» yukko.

¹¹Ee lasage Waa'i Muse'ena

¹²«Isra'ee'l minaadabina ‹Mat manchite meentichcho mullaannonne tiiro massita'a is aro'ina amma'nnancha hooggota'n

¹³mulli goonchinnem saa'lla'a oo woshshi anganga la'amoo'n is aro'iinsi daphphuta'n naaqaash bee'aa haashaaranto'is la'amubeeta'n

¹⁴oo meentichcho haashaaranta'a te'im haashaarantoo'nnim is aro'i to'achchimminne malamulas

¹⁵ee meentichcho qeessichchi beyyo massona; ixxim is bikkina mat kiilo'i so'i qama kitimina hincaa'ona; oohim hawwojja moo'isoo kitim ihu bikkina ixxonne wee'l zayta dunoone aduruusam edoone.

¹⁶«Qeessichchim ee meentichcho hincaa'aa Waa'i illagenne uullitamisa issona.

¹⁷Keesamaakkoo wo'o buchchi mu'utanne inkiirona; Keesammi Dukkaananne gaxiinsi hofqax buchcham aa'aa ee wo'onne issona.

¹⁸Oo qeessichchi ee meentichcho Waa'i illagenne uullisona; is horooriinsim shaashsha hooraa ee hurbaaxxi kitima is anganne amadiisona; duuncha eeboo qaraaraalli wo'o ixxi anganne amadona.

¹⁹Qeessichchim ee meentichcho ‹At aro'o uttaa mulli goonanne tiiro dabattaa ee gooninne iinse'lloo'nnoolasii ki gaga haashaassitoo'nnoolasii duuncha eeboo ku qaraaraalli wo'i keese hawwodoone.

²⁰Ihukkaarem ki aro'i hee'onam mulli goonchonne tiiro dabattaa ee goonchinne iinse'llaa ki gaga haashaassitaattoolas

²¹Waa'i ki gubeedo shiihisaa ki godabo fugaa ki minaadaphphi lambe'enne duunchinaa hidirinaa ikkoo'isa issona.

²²Duuncha eeboo ku wo'i ki godabonne aagaa fugona; ki gubeedom shamsona› yaa hidiisona. «Oo meentichchom ‹Aameen, aameen, Waa'i eekka eesenne issona› yita'a dabattamo.

²³«Ee lasage oo qeessichchi ee duunchi sagara kitaabookko; kitaabamukkokam aanshaa qaraaroo wo'i yoo buchchi mu'utanne issookko.

²⁴Oo meentichcho kee'mmaalli jabbo eeboo wo'o aggamisa isseena gaassaa

²⁵qeessichchi Waa'ina hincoo hurbaaxxi qama meentichchi angiinsi aa'aa Waa'ina iimii aadii wonciwoncaa'akka'a hincaa'akkam annanni kitim ihoo'isina kiti'm beyyonne hincaa'ona.

²⁶Ee lasage Waa'ina annanni ihaa hincu hurbaatiinsi mat oobo'o massaa Waa'ina hincoo hurbaaxxi tissiishshi ihona kiti'm beyyonne shokkiisona; ee lasage oo meentichcho ee wo'o aggamisa issona.

²⁷Oo meentichcho is gaga haashaassitu'uuyyi is gooncho utta'a mullaanninne saa'llo'oohan ihulas oo wo'i kee'mmaalli jabbo isenne eebookko; oohim iseka godabo dashshisookko; is goosim kottookko; is summim minaadaphphi lambe'enne duumamaakkoohan ihaa gatookko.

²⁸Ihukkaarem oo meentichcho hawwojja maham issitoo'n yo'i muccuratti ikkolas matem hawwodanchim isenne afooyyo; oosom qatteena xantamo.

²⁹«Mat manchi ixxi meentichchonne to'achchulas te'im saa'llo'ookkoo yaa malamulas issimmi hasisoo seer kane; oohim meentichchooma kiti'm beyyi illagenne uullitamisa issaa qeessichchi kanniinsi hanaan kuramu seera wonshookko.

³¹Is aro'im hawwojjiinsi muccur ihookko; ihukkaarem oo meentichcho saa'llo'oohan ihulas is hawwojji mashka'inne waaroo hawwo aa'llamo» yukko.