Read Hadiyya Xiqqi Kitaaba 6 Bible Online

Xiqqi Kitaaba 6 - Hadiyya bible

Xiqqi Kitaaba 6

¹Waa'i Muse'ena

²«Isra'ee'l minaadabina ‹Goonchi te'im landichcho gaga iina annanni issaa Naazirakkichchi iheena uga'a aagulas

³Woyi'n diqaasa te'im dimbisoo agga agoone; woyi'nneka te'im mulli luwwika ayyi shiishaalli aggam agoone; ciinsakko'i woyina agoone; aashaallam ihukko gogaalli woyi'n misha itoone.

⁴Ixxi gaga Naazirakkichchi issaa yoo ammanenne woyi'n mishika hobara te'im illichcho itoone.

⁵«‹Uga'a aagu qax ammanenne horoore hogoossiisoone; Naazirakkichchi ihimmi amman beeddeebe'e ixxi gaga iina keesaakkoohane; ee bikkina ixxi horoore li'isona.

⁶Ee ixxi gaga annanni issu qax ammanenne leeshshanne hincoone.

⁷Ixxi Waa'ina aagu uga'ik mare'i ixxi horoorenne yoo bikkina anni te'm ama abbaayyi te'im aayya lehamoo ammane ixxuwwika leesha nakkaa ixxi gaga haashaassoone.

⁸Naazirakkichchi ihu qax ammanenne ixxi Waa'ina annanni ihaakkoohane.

⁹«‹Dangonne mat manchi ixxi gadanonne lehaa ixxeka keesamu horoore haashaassulas ixxi gaga muccussoo lama'l ballanne ee horoore hogoossaqqona.

¹⁰Sadeenti ballanne lam handare'i geexxuwwa te'im lam handare'e Keesammi Dukkaa'n goocanne yoo qeessichchi beyyo eebona.

¹¹Qeessichchim eekeeniinsi mato baaxii'l haafixxi kitimina la'mmekam shokkiisakka'a hinca'akkam kitimina issaa hincaa'imminne oo Naazirakkichchi leesha nakkaa haashaaramu bikkina haafissiisookko. Ee ballam oo Naazirakkichchi ixxi horoore odim iina annanni ihaakkoohan issookko.

¹²Naazirakkichchi ihaa awwaadeena ixxi gaga odim iina annanni issookko; iina keesamaa hee'u horoor haashaaramu bikkina Naazirakkichchi ihaa hee'u doolli xigamooyyo. Ee ixxi hawwojji kitimina ihoo mat hiinchi gereechchi ambula eebona.

¹³«‹Mat Naazirakkichchi ihaa ixxi gaga annanni issu manchi aagu uga'a guulloo ammane egeroo seer kane; oo manchi Keesammi Dukkaa'n goocanne hincihona.

¹⁴Ee goocannem iina kitima hincaa'ona. Oohim shokkiisakka'a hincaa'akkam kitimina mat hiinchi gereechchi ambula, baaxii'l haafixxi kitimina miiqakkam luwwi bee'i mat gereechchi geexaa mateeyyoo'm kitimina mat gereechchi ambulaa hincaa'ona.

¹⁵Odim ursho'i exxoo'n saramu mat leemaat qorosho'o, wee'l zaytinne cukkamaa danaam qaminne saramaakkoo xuruuro'uwwa, wee'l zayti labamaakkoo caraq qorosho'oo hincoo hurbaaxxi kitiminnee aggi kitiminnee maqirem hincaa'ona.

¹⁶«‹Qeessichchi ee hundam baaxii'l haafitinaa shokkiisakka'a hincaa'akkam kitiminaa ihona i illagenne hincaa'ona.

¹⁷Gereechchi ambula leemaaxxi qorosho'inne maqirem mateeyyoo'm kitim issaa iina hincaa'ona; ee lasage hurbaaxxekaa aggikaa kitima hincaa'ona.

¹⁸Naazirakkichchi iheena ixxi gaga annanni issu manchi Keesammi Dukkaana aagakkam goocanne ixxi horoore hogoossona; ee horoorem massaa ee mateeyyoo'm kiti'm giiranne edona.

¹⁹«‹Oo Naazirakkichchi ixxeka keesamu horoore hogoossaa lasage qeessichchi ee gereechchi ambu'lleka li'aalli hayyi maara leemaatanne yoo qorosho'iinsi matoo caraqisakka'a sarakko'i qorosho'ika matoo edaa ee naazirekkichchi anganne massaa issona.

²⁰Ee lasage qeessichchi ee hundam wonciwoncaa'akka'a iina hincaa'akkam kitim issaa hincaa'ookko; oo hundim qeessichchina sharad ihaa ki'oo gereechchi ambu'l eeddiraasinnee hayyi maarinnee maqirem qeessichchina keesamaakkoo sharad ihookko. Ee lasage Naazirakkichchi woyi'n diqaasa ageena xanookko.

²¹«‹Naazirakkichchi aagu uga'isanne ixxi siidoohaanniinsi mulleka iina hincaa'oo kiti'm seer kane; uga'a aagukkisannee Naazire'oo'm see'llisannee guullaa issona› yitaa kure» yukko.

²²Waa'i Muse'ena

²³«Aaroonii ixxi oosii Isra'ee'l minaadaba maasse'llam ammane

²⁴‹Waa'i keese maasse'onaa egeronaa;

²⁵Waa'i ixxeka ille kiina caakkisonaa kiina qishixxonaa.

²⁶Waa'i ixxeka ille ki kollonne dabaronaa xummam kiina uwwonaa› yita'a maasse'llona kure» yukko.

²⁷Odim Waa'i «Ee'isinne iikka summa weeshsha'a Isra'ee'l minaadaba maasse'llolas anim ixxuwwa maasse'oommo» yukko.