Read Hadiyya Xiqqi Kitaaba 8 Bible Online

Xiqqi Kitaaba 8 - Hadiyya bible

Xiqqi Kitaaba 8

¹Waa'i Muse'ena

²«Lamarem caakkuwwam caakka dissakkam mu'utanne dissoo ammane eehanni caakki illaqqi kollo caakkisoo'isa issaa dissona Aaroonina kure» yukko.

³Aaroonim ee'isa issukko; Waa'i Muse'e ijaajukkisannem ee caakka dissakkam mu'uxxi illagenne caakkisoo'isa issaa dissukko.

⁴Oo caakka dissaakkam mu'utim Waa'i Muse'ena moo'isukkisanne lugumiinsi ki'isaa fiitanne afeebe'e tumammi worqinne baxamaakkoohan hee'ukko.

⁵Waa'i Muse'ena

⁶«Isra'ee'l oosiinsi Leewi'i ooso annanni issitaa muccusse.

⁷Oohim muccurimmi seerina gudu wo'o ixxuwwanne kife; ixxuwwi orachchi hundam hogoossitona; ixxuwwi eddechcha aansha'ita'a gagam muccussaqqitona.

⁸Ee lasage mat labeenaa hurbaaxxi kitimina gudu zaytinne cukkammaakkoo qamaa hincaa'llona; atim baaxii'l haafixxi kitimina ihoo mulli labeena hincaa'e.

⁹Ee lasage Isra'ee'l minaadaba hundam wixxaa'llaa Leewi'i ooso keesammi Dukkaa'n illagenne uullitamisa isse.

¹⁰Leewi'i ooso Waa'i illagenne hincaa'lloohaare Isra'ee'l minaadabim ixxuwwi Leewi'i oos horoorenne anga issitona.

¹¹Leewi'i oos Isra'ee'l minaadabiinsi iina Waa'ina wonciwoncaa'akka'a hincaa'akkam kiti'mmisa ikka'a hincimminne awwaaddamisina Aaroon Waa'i illagenne hincaa'ona.

¹²Ee lasage Leewi'i oos ixxuwwi anga lamem labee'n horoorennem issitona; atim matoo baaxii'l haafitina la'mmeka shokkiisakka'a hincaa'akkam kitim issitaa iina hincaa'e. Leewi'i oos baaxii'l haafitina hincoo kitim ee'isinne ihookko.

¹³«Ee lasage Leewi'i ooso Aaroonaannonnee ixxi oos illagennee uullise; Leewi'i ooso iina wonciwoncaa'akka'a hincaa'akkam kiti'mmisa issitaa Waa'i illagenne hincaa'e.

¹⁴Ee'isinne Leewi'i ooso Isra'eeliinsi annanni isse; ixxuwwim iihan ikkamo.

¹⁵Ixxuwwa muccussitaahii keessaahii lasage Leewi'i oos Keesammi Dukkaananne awwaaddeena xantamo.

¹⁶Ixxuwwi Isra'ee'l oos lambe'iinsi hore'em iina uwwanto'oohan ihu bikkina Isra'eeliinsi qaramoo won goo'n oos bikkenne i gaqqan issaa a'llaammo.

¹⁷Gibxika won ihaa qaramu goona hundam shummi ammane hundem Isra'ee'l minennem qaramoo mannik te'im diinaxxekee wona hundam keesaa iihan issaammo.

¹⁸Ee bikkina kaba Isra'ee'l oos won bikkenne Leewi'i ooso annanni issaammo.

¹⁹Isra'ee'l minaadaba bikkita'a Keesammi Dukkaananne awwaaddonaa Isra'ee'l oosim keesammi beyyo hincimminne aphphixxitambee'isa haafissiissonaa Leewi'i ooso Isra'ee'liinsi Aarooninaa ixxi oosinaa uwwaammo» yukko.

²⁰Ee bikkina Waa'i Muse'e ijaajukkisannem Muse'e, Aaroonii Isra'ee'l minaadabii hundim Leewi'i ooso keesso'o.

²¹Leewi'i oosim ixxuwwi gaga muccussito'o; ixxuwwi eddechcham aanshito'o. Aaroonim ixxuwwa wonciwoncaa'akkam kiti'mmisa Waa'i illagenne hincaa'ukko; muccuttamisam haafissiisukko.

²²Waa'i Leewi'i oos bikkina Muse'enne ihaa uwwu ijaaccisanne minaadab hundem luwwam issito'o; Leewi'i oosim Aaroonii ixxi oosii ijaajjamisinne Keesammi Dukkaananne awwaaddeena guddo'o.

²³Waa'i Muse'ena

²⁴«Umur lamiyyee onti hiinchoo eehanniinsi hanaanii ihu Leewi'i goo'n oos hundim Keesammi Dukkaananne awwaaddona.

²⁵Ihukkaarem ontayyi hiincho ihaa lasage awwaado uullissona; ee lasage od baxxoone.

²⁶Ixxuwwi abbaayyuwwi ikko'i mulli Leewi'i oos Keesammi Dukkaananne awwaaddam awwaadonne hara'mmaan ikkona; ihukkaarem ixxuwwi mulla maham baxxoone; ee bikkina Leewi'i oosika awwaaxxi ogora amadiissoottok ee'isinnette» yukko.