Read Hadiyya Xiqqi Kitaaba 9 Bible Online

Xiqqi Kitaaba 9 - Hadiyya bible

Xiqqi Kitaaba 9

¹Isra'ee'l oos Gibxi uulliinsi fitto'i la'm hiinchaannonne luxxi agananne Waa'i Muse'ena siina'i udma'anne,

²«Isra'ee'l oos qoodamu ammanenne Shaashshiqqi uguda lonsitamisa isse.

³Ku agan aagu tommonnee soo'l ballannee eelliinchi aagoo ammanniinsi ki'isaa see'llisannee ogo'llisannee lonsitona» yukko.

⁴Muse'em Shaashshiqqi Uguda lonsitona Isra'ee'l minaadabina kurukko.

⁵Ixxuwwim luxxi agan aagu tommonnee soo'l ballannee eelliinchi aagoo ammanenne Siina'i udma'anne ee uguda lonsito'o; Isra'ee'l minaadab Waa'i Muse'e ijaajukkisanne hundem luwwam issito'o.

⁶Ihukkaarem hofqax mannim leesha nakkita'a haashaaranto'oo bikkina ee balla Shaashshiqqi Uguda lonsiteena xanto'oyyo. Ee bikkina ixxuwwi ee ballam Muse'e beyyoo Aaroon beyyoo hincita'a,

⁷«Neese leeshsha nakkinaa haashaarammaammo; ihukkaarem gatto'i Isra'ee'l oosinne maqire qoodamu ammanenne Waa'ina kitima hincaa'nneena hoorakko'ok mahinatte?» yito'o.

⁸Muse'em «Waa'i ki'nnuwwi bikkina kuroo ijaajo macceeseembe'e egallehe» yukko.

⁹Waa'i Muse'ena

¹⁰«Isra'ee'l oosina ‹Ki'nnuwwi shumo'iinsi ayyim leesha nakkaa haashaaramulas te'im qee'l uulla marukkuuyyi googonne ihaa Shaashshiqqi Uguda lonsona.

¹¹Oohim la'm agan aagu tommonnee soo'l ballannee eelliinchi aagaa lasage ee uguda lonsona; ee uguxxi gereechchi maaram urshobee'i qorosho'innee qaraaroo buyyinnee itona.

¹²Uulli soodeebe'e ee hurbaatiinsi maham gatisoone; ee gereechchika miqe maham iiqoone; ayyim Shaashshiqqi Uguda lonsoo ammane uwwamu seera hundam egerimmi hasisookko.

¹³Ihukkaarem see'llisanne muccur ihu manchi te'im qee'l googo taakke'ubee'i ayyi manchim Shaashshiqqi Uguda lonsoo'n gatulas Isra'ee'l minaadabiinsi annanni ihaa bi'ona; iina hasisoo kitima qoodamu ammanenne hincaa'ubee'i bikkina ixxi baaxiilina laboo guzumo'o aa'ookko.

¹⁴«‹Ki'nnuwwinne hee'oo waaraanchi Waa'ika Shaashshiqqi Uguda lonseena hasulas qoodamu see'llisinnee ogo'lliisinnee lonsona; uulli beetinam ihukko waaraanchina ihoo seer matome› yihe» yukko.

¹⁵Keesammi Dukkaan kaasamu balla duub ee dukkaana ifiisukko; maaro'iinsi ki'isaa uulli soodeebe'e Dukkaa'n hanenne gii'llisa caakkisam hee'ukko.

¹⁶Balla duub Keesammi Dukkaana ifiisam hee'ukko; oo duubim hiimonne gii'llisa caakkisam hee'ukko.

¹⁷Oo duub Dukkaaniinsi ki'oo ammane Isra'ee'l oos wiiddanto'i beyyiinsi ki'lla'a dooyyitam hee'llo'o; oo duub dilloo beyyonne odim wiiddantam hee'llo'o.

¹⁸Isra'ee'l oos mat wiidda'n beyyo fatakitamok te'im mulli beyyonne wiiddantamok Waa'i ijaaccisinnetti hee'ukko. Duub Dukkaana ifiisaa yoo qax ammane ixxuwwim ee wiiddanto'i beyyiinsi mikmiktam hee'llo'oyyo.

¹⁹Duub dukkaana ifiisaa lobakat ammane afuurulas Isra'ee'l oos Waa'ina ijaajanta'a egettamo bagaan mikmiktam hee'llo'oyyo.

²⁰Mat mat ammane duub dukkaana ifiisookkok xale'i hofqax ballinatti hee'ukko; ihukkaarem ixxuwwi wiiddantamanem ihukko dooyyitamok Waa'i ijaaccisinnetti hee'ukko.

²¹Mat mat ammane duub maaro'iinsi ki'isaa soodeebe'e xale'e afuuram hee'ukko; duub daram ki'oo ammane ixxuwwim ki'lla'a dooyyitam hee'llo'o; ballam ihukko hiimo duub ki'u amman hundam ki'lla'a dooyyitam hee'llo'o.

²²Duub lam ballam ihukko mat agana te'im mat hiinchina Dukkaa'n haniinsi ki'ubeelas Isra'ee'l oos wiiddanto'i beyyiinsi mikmikitamoyyi hee'llo'o; ihukkaarem duub ki'u amman hundam dooyyitam hee'llo'o.

²³Dukkaana kaassa'a wiiddantamokii wiiddanto'i beyyo fatakita'a dooyyitamokii Waa'i Muse'ena uwwu ijaaccisinnetti hee'ukko.