Read Hadiyya Mikkiyaas Kitaaba 1 Bible Online

Mikkiyaas Kitaaba 1 - Hadiyya bible

Mikkiyaas Kitaaba 1

¹Iyyoo'ataam, Akaazii Hizqiyaasii korinne korinne Yihuxxi adilluwwi ikko'i doollenne Waa'i Mooreete'iinsetti ihu Mikkiyaasina Samaare'i bikkinaa Yerusaalee'm bikkinaa kaaltinne caakkisu woshshi

²«Ki'nnuwwi minaadab hundim kaka macceessehe! Uullanne hee'llakkam keen hundim kaka qoossitakka'a macceessehe! Moollanni Waa'i Keesamaakkoo Ixxi minennetti ihaa ki'nnuwwanne naqqasookko.

³Oono'o, Waa'i ixxi heechchi beyyiinsi waarookko; waaraahim duunnuwwanne taakke'ookko.

⁴Ee ammane leeyyi giiranne bukkamoo'isaa wo'i duuniinsi aad daadoo'isaa duunnuwwi ixxi lokkiinsi woroon bukkamookko; cebbuwwim diqamookko.

⁵Ku hundim ihukkok Isra'ee'l oos baxxo'i baaxii'l mashka'innette; Isra'ee'l oos boqqitamisina mashka'i ayyette? Samaare'i beero'oyyonnihe? Yihuxxi minaadab qophpha'n waa'ina otossimminne baaxiilo baxxamisina mashka'i ayyette? Yerusaaleemayyonnihe?

⁶Ee bikkina Waa'i «Samaare'i beero'o gindaa biir uullanne tuubamu m'nnisaa woyina kaasakkam beyyisaa issoommo; gindamu mi'n kinneewwam cebbanne onkoroollisoommo; shooho'i kinneewwam ma'llichchim bee'i beyyisa issoommo.

⁷Ee beero'ik qophpha'n waa'uwwi hundim iiqamookko; ee qophpha'n waa'uwwina otossakkam minenne yoo saa'aanina miqakko'i luwwi hundim giirinne shokkookko. Samaare'e ka misilluwwa wixxaa'llo'ok saa'immi bito aa'imminnette hee'ukko. Kabadem is diina'i ee keeno saa'immina awwaaxxoohan ihookko» yoolla.

⁸Ee lasage Mikkiyaas «Ka mashka'inne ‹Aayyee! Aayye!› yummuuyyi wi'lloommo; edde'oo'nnii kobe'e issoo'nnii taakke'oommo; wengereellisa muunoommo; mooqqaqqichchisam laachchi sagara macceesisoommo.

⁹Samaare'i mad fayye'oobee'ane; oo u'n Yihudam afaakko; i minaadab wixxoo Yerusaalee'm dummichchi beyyi afeebe'em afaakko» yukko.

¹⁰Gaatanne yo'i ni diina'ina neesenne afu hawwo kutakkotte; ee beyyonne hore'em wi'llitakkotte. Ihukkaarem Beeti'oofiranne yoo ni moolli lambe'enne diranne biqqiiqqitakku'uuyyi wi'llehe.

¹¹Shaafii'l minaadaba, qeefadantakka'a leexa'am tuullinne higgehe; Xa'inaa'n beero'i manni firimma badditamo; Beeti'eexeel wi'llonnetti ihu bikkina ki'nnuwwina girbi iheena xanooyyo.

¹²Maaroot minaadab ‹Er luwwi niina waarookko› yita'a egetta'a hee'llo'o. Ihukkaarem Waa'i Yerusaaleema bi'isaakko.

¹³Isra'ee'l hawwojjinaa Yerusaalee'm baaxiilinaa luxxi mashka'i ikkakko'i bikkina ki'nnuwwi Laakiish minaadaba, gaare'i faradonne hakkamma issehe.

¹⁴Yihuxxi minaadaba, Mooreesheet Gaat minaadabina geegeeshshi luwwa uwwitakkamo; Akiiziib minaadabim Isra'ee'l adilluwwa qawwiissamo.

¹⁵Maariis minaadaba, Waa'i ki'nnuwwa diina'ina higisaa uwwookko; weeraroo diina'a ki'nnuwwanne eeboommo. Isra'ee'llek lombaam awwonsaan Adulaa'm daawwa'anne maaxantamo.

¹⁶Yihuxxi minaadaba, ki'nnuwwi ooso qeefadakka'a massakkam bikkina iititakkam ki'nnuwwi oosina kichche'llakka'a horoore hogoossaqqehe; ki'nnuwwi horoorim goolluunsichchaannisa murugona.