Read Hadiyya Mikkiyaas Kitaaba 2 Bible Online

Mikkiyaas Kitaaba 2 - Hadiyya bible

Mikkiyaas Kitaaba 2

¹Jora baxxeena qooddam keeninaa iinsonne hee'llu'uuyyim hantaaro sawwitam keeninaa aayye! Eekka issitam malaayyi ixxuwwi anganne yoo bikkina soodoohaare baxonne hosissamo.

²Abuulli uullaa minneewwaa mixxa'a hootta'a massitamo; mannika hanqa bi'issa'a amaxxa boggamo.

³Ee bikkina Waa'i «Oono'o, an ki'nnuwwa bi'isoommo; eehanniinsi xottakkeena hore'em xantakkamoyyo; oo amman ki'nnuwwina hawwi amman ihu bikkina bolximminne daba'llantakkeena xantakkamoyyo.

⁴Ee ammane manni ki'nnuwwanne naacookko; ee'isam. ‹Neese hore'em bi'nnaammo; Waa'i ni minaadaphpheka amaxxa hooraa massaakko; neese qeefaddo'i keeninam ni uulla baxxansaakko› yitu'uuyyi kichchechchi habbaarinne sottamo» yoolla.

⁵Uulloom daba'llaa Waa'i minaadabina uwwamoo ammane ki'nnuwwina sharad hee'ooyyo.

⁶Ixxuwwi hiraagaan «Niina hiraaggitte; kido'i sholle'n neesenne afoobee'i bikkina kido'i hiraago hiraaggitte.

⁷Ee'isam Yaaqoob ooso, ka'isa yimmi hasisoohonnihe? Waa'i iyyaqqoobee'anennihe? Kido'i luwdu issoohonnihe? Er baxo baxxam keenina hundinam Waa'i er luwwa issooyyonnihe?» yitamo.

⁸Waa'im ixxuwwina «I minaadabanne diina'oommaninne ki'llakko'ookko; oriinsi daba'llita'a amma'nnatinne ki'nnuwwi uullinne higgam xummaan mannika eddechcha maxattakko'ookko.

⁹I minaadaphpheka meento ixxuwwaaniinsi danaam minneewwiinsii amaxxiinsii hollitakko'ookko; ixxuwwi oosim i maassiinsii lombiinsii heer heerina annankamisa issitakko'ookko.

¹⁰Haashaaranchiinsi ki'ukkok kee'mmaalli bichchi afoo bikkina ka beyyonne usheexxitakkeena xantakkamoyyo. Ee bikkina ki'llakka'a mallehe.

¹¹«Ku minaadab hasoo hiraagaanchi ‹Woyi'n diqaasii mulli dimbisoo aggii ki'nnuwwina daadookko› yukkuuyyi qophphano wocimminne qawwiisoohane.

¹²«Isra'ee'l minaadaba, gereebbi orodonne, gereebbi allaachchim kuturanne wixxoo'isa hanqinam an bichchiinsi gattakkoqaxa mat issaa wixxaa'oommo; ki'nnuwwi uullim minaadabinne wo'mmaakkoohan ihookko» yaa dabarookko.

¹³Ixxuwwi googo haraassaa fooqaa'oo awwonsaanchinne haraaraa fooqaakkoo goocinne awwonanta'a fittamo; ixxuwwina Moollanni Waa'im ixxuwwi illagenne higaa awwonsookko.