Read Hadiyya Mikkiyaas Kitaaba 3 Bible Online

Mikkiyaas Kitaaba 3 - Hadiyya bible

Mikkiyaas Kitaaba 3

¹Ee lasage an «Isra'ee'l awwonsaanii minaadaphphi gassaanii kaka macceessehe; hanqo'i oogato la'immi ki'nnuwwina hasisam hee'ukkoyyonnihe?

²Ihukkaarem ki'nnuwwi eroka sabbakka'a jora iittitakko'o. I minaadab uullukkisam ixxuwwika omachcho coo'llakko'o; maaraa miqem annanni issitakko'o.

³I minaadaphpheka omachcho coo'llakka'a miqe iiqansitakko'o; harachchonne sarakkam maa'llisam issitakko'o; maaram muttakka'a ittakko'o.

⁴Ki'nnuwwi u'nnantakka'a Waa'i kollonne laattakkam amman waarookko. Ihukkaarem ixxi ki'nnuwwina dabachcha dabarooyyo. Ki'nnuwwim jora baxxakko'i bikkina ixxi ki'nnuwwi uunxato macceesooyyo» yummo.

⁵Waa'i qophpha'n hiraagaa'n bikkina «Ittam luwwa siiddamaare ‹Xummi dillookko› yitu'uuyyi alallaattamo. Ittam luwwa siiddambee'i ammane ‹Or waarookko› yita'a alallaatu'uuyyi minaadaba huushissamo.

⁶Ee bikkina kaalta moo'llambee'i hiim waarookko; caakki moo'amoobee'i tuunsom ihookko. Ka lasage kaalta moo'llamoyyo; hiraagom woccamoyyo.

⁷‹Kaalta moo'nnoommo; hiraagom woncoommo› yitam keen hundim sholle'llamo. Waa'iinsi matem dabachcham siiddambee'i bikkina tuutta'a ixxuwwi suume amaxxitamo» yoolla.

⁸Ihukkaarem Waa'i eese ixxaanninne Ayyaaninnee malaayyinnee wonshaakko. Yaaqoobika hawwojja Isra'ee'llekam baaxiilo kuroommisinaa hanqo'i oogato oogatoommisinaa malaayye uwwaakko.

⁹Ki'nnuwwi hanqa shigigitakka'a boqqissakkam Yaaqoob oos awwonsaanii Isra'ee'l minaadaphphi gassaanii kaka macceessehe.

¹⁰Ki'nnuwwi xiiga dunimminne Xiyoona, boqqoominnem Yerusaaleema baxxakkam keeno.

¹¹Ka beero'i awwonsaan oogatookkok maqanxinnette. Qeessuwwim diinate miqakkoo'n losissamoyyo. Hiraagaanim hiraaggamok diinate miqakkamaarette. Oo hundim ihaa hee'ukkuuyyi «Waa'i niinninnetti ihu bikkina neesenne mahim afooyyo» yitu'uuyyi Waa'anne bakke'llamo.

¹²Ee bikkina ki'nnuwwi mashka'inne Xiyoon abuullamookko; Yerusaaleem gindakka'a tuubakko'i luwwisa ihookko. Waa'i Mi'n beyyim haqqor ihookko.