Read Hadiyya Mikkiyaas Kitaaba 4 Bible Online

Mikkiyaas Kitaaba 4 - Hadiyya bible

Mikkiyaas Kitaaba 4

¹Doolli beeddichchi afoohaare Waa'i min baxamu duun mulli duunnuwwi hundiinsim lophphaa moo'amookko; hoffi duunnuwwiinsi hundiinsim hore'em lophphaa moo'amookko. Lobakat minaadabim ee duu'n kollonne waarookko.

²Ee bikkina lobakat minaadab «Seer Xiyoonanne Waa'i sagarim Yerusaaleemanne hee'oo bikkina waallehe; Waa'i duunanne fillona; Yaaqoob Waa'i minem mallona. Ixxi googom losisookko; ixxi doo'lla issinoommisam niina losisookko neesem ixxi googonne malloommo» yitamo.

³Ixxi lobakat minaadaphphi lambe'enne oogatookko; qee'llonnee abbisonnee yoo malaayyaam adilluwwi lambe'enne yoo woca araassookko. Ee bikkina ixxuwwika bisa'a maarashanne bagado jajjaranne dabattamo. Adil adilanne bagado ki'isooyyo; ee lasage o'l losano losookkok ayyim hee'ooyyo.

⁴Manni annannichchim kaasu woyi'n kaashshaannonnee oda'aannonnee hafanne xumminne afuurookko; ixxuwwa baddisoo luwwim hee'ooyyo. Gogoxxi Moollanni Waa'i kaka wocaakko.

⁵Hanqo'i Waa'a laqqambee'i minaadab annannichchim ixxuwwi waa'uwwina otossitamo. Ihukkaarem neese ni Moollanni Waa'ina heer heerinam otossinoommo.

⁶Waa'i «Ee balla shiihuwwaa an guzumo'ummaare yaayyanta'a hawwito'i i minaadabaa wixxaa'oommo.

⁷Shiihuwwa gatisaa hee'isoommo; uunjanta'a hee'llo'i keenom qoxar minaadab issoommo. Anim ee ammanniinsi ki'isaa Xiyoo'n duunanne heer heerina ixxuwwina adil ihoommo» yoolla.

⁸Waa'i ixxi minaadaba gereebbisa allaaroo duun ikkitti Yerusaaleema, kiina uwwamu neeyyat wo'mmookko. Odim adi'l beero'i ikkootto.

⁹Ka'isa sagara iimmaa'llaa laattoottokii xuuchchi amadu meentichchosa u'nnantoottokii mahinatte? Kiina adil bee'u bikkinatennihe? Te'im keese sogoo keen hundim bi'u bikkinannihe?

¹⁰Yerusaalee'm minaadaba, xuuchchi amadu meentichchosa qitintakku'uuyyi u'nnammehe; beero'iinsi hollakkamaare biir uullanne wiiddantakkamo; qeefadantakkahim Baabiloona mattakkamo; ihona bagaan ee beyyonne Waa'i ki'nnuwwa egerookko; ki'nnuwwam ki'nnuwwi diina'i angiinsi gatisookko.

¹¹Ihukkaarem kaba lobakat manni ki'nnuwwanne wixxita'a «Yerusaaleem haashaaramona; ixxekam gindancha moo'nnona» yitamo.

¹²Ihukkaarem oo minaadab Waa'ika sawwite laqqo'oyyo; ganakkam hurbaaxxi farshim oodo'onne wixxoo'isa Waa'i ixxuwwa wixxaa'ukkok guzumo'inatti ihukkisa laqqo'oyyo.

¹³Waa'i «Yerusaalee'm minaadaba, mattakka'a ki'nnuwwi diina'a hurbaaxxisa gannehe; buudii xaara, shuku'llii naas xaar ihu mirgo'isa ki'nnuwwa qoxassoommo; lobakat adilluwwa bi'issakkamo; damiginne ixxuwwi wixxaa'llo'i amaxxa hundam uulli hundinam Moollanni ihummi iina Waa'ina eebbakka'a uwwitakkamo» yoolla.