Read Hadiyya Mikkiyaas Kitaaba 5 Bible Online

Mikkiyaas Kitaaba 5 - Hadiyya bible

Mikkiyaas Kitaaba 5

¹Yerusaalee'm minaadaba, ki gogota wixxaa'e! Neese diina'inne kibbammaammo; Isra'ee'l awwonsaanchikam xabano biccinne aphphissamo.

²Waa'i «Efiraat uulli Beeteliheema, Yihuxxi uullanne yoo hoffi beero'uwwiinsi mat ikkittaarem kiinniinsi Isra'ee'l minaadaba awwonsoo adila doo'lloommo. Ixxi adillanim gaassiinsim ki'isaa heer heerinatte» yoolla.

³Ee bikkina ama ixxo qatteebe'i afeebe'e Waa'i ixxi minaadaba diina'ina higisaa uwwookko. Ee lasage qeefadanta'a mulli uullanne hee'llam ixxi abbaayyuwwi ee beyyiinsi daba'llita'a ixxuwwi moollonne exxitamo.

⁴Ixxi Waa'i malaayyinne ki'aa gereebba allaarookko; eekkam issookkok hibbaam Moollanni Waa'i summinnette; ixxi kaba uulli tochchi afeebe'e loban ihoo bikkina ixxuwwi usheexxita'a hee'llamo.

⁵Ixxim xumma uwwookko; Aasoo'l manni ni uullanne weerattamaaree girbuwwam gindita'a aaggamaaree lamar egeraanoo sadeenti awwonsaanoo ixxuwwanne ki'llamisa issinoommo.

⁶Aasoora bisa'inne kaa'lla'a Naamiruuda amaddamo; Aasoo'l manni weerattolasii ni uullika gabala higgolasii ixxuwwi angiinsi neese ixxi gatisookko.

⁷Lehiinsi gatto'i Isra'ee'l minaadabim mulli minaadaphphi lambe'enne Waa'i ga'nnisoo qiibaxxisaa hixenne kiifoo xee'nnisaa ikkamo; ixxuwwim mannannetti ihoo'n xale'i Waa'anne amma'nnanta'a hee'llamo.

⁸Hobbichchi bii'l moochchi lambe'enne, hobbichchi geexim gereebbi allaachchi lambe'enne xophxophukkuuyyii dereeransukkuuyyii maroo ammane ee diinatina hara'mmoo ayyim hee'oobee'isam oo lehiinsi gatto'i gatto'i Isra'ee'l minaadabim lobakat minaadaphphi lambe'enne ee'isa issitamo.

⁹Isra'ee'llek wod ixxuwwi diina'anne ki'ookko; ixxuwwi diina'i hundim bi'ookko.

¹⁰Waa'i ‹‹Ihukkaarem gaassaa ki'nnuwwi farado ki'nnuwwi lambe'iinsi bi'soommo; faraxxi gaare'uwwam guullaa bi'isoommo.

¹¹Ki'nnuwwi uullanne yoo beero'uwwa bi'isoommo; girbuwwa hundam gindansoommo.

¹²Ki'nnuwwika kiirimma bi'isoommo; gennaanim ka lasage ki'nnuwwi lambe'enne hee'ooyyo.

¹³Qophpha'n waa'uwwaa otossitakkam utubbuwwaa ki'nnuwwi lambe'iinsi bi'isoommo; anginne baxxakko'i luwwannem ka lasage otossitakkamoyyo.

¹⁴Aasheera yakkam misila ki'nnuwwi uulliinsi xoqoloommo; ki'nnuwwi beero'uwwam gindansoommo.

¹⁵Iina ijaajjantambee'i minaadaba hundam quunqinne baado firoommo» yoolla.