Read Hadiyya Mikkiyaas Kitaaba 6 Bible Online

Mikkiyaas Kitaaba 6 - Hadiyya bible

Mikkiyaas Kitaaba 6

¹Waa'i Isra'ee'l minaadabina yookkoka macceessehe. Ki'llehe, ki'nnuwwi meto'o duunnuwwina kullehe; hoffi duunnuwwim ki'nnuwwi yitakkamoka macceessona.

²Duunnuwwa, Waa'i ixxi minaadaba acceeqasoo woshsha macceessehe! Uullik qoxxaalli shooho'uwwim macceessehe; Waa'i ixxi minaadabinne fitamoollaa oogaxxamoollaa.

³Waa'i «I minaadaba, maha issummo? Keesenne kee'mmisummi luwwi maruchcho? Hino'o dabachcha uwwe.

⁴Gibxiinsi fissummo; agidda'n uulliinsim gatisummo; Muse'e, Aaroonaa Maaraamee kiina awwonsaan issaa uwwummo.

⁵I Minaadaba, Moo'aaphphi adil Baalaaq keesenne maha isseena sawwuda'ee Bii'oor beet Baala'aam mah dabachcha uwwuda'ee sawwihe; Shiixiimiinsi ki'llaa Gelgela mattittuuyyi googonne ihukkoka hundam sawwihe; ee hundam sawwitlas an keese gatiseena issummoka hundam laqqootto» yoolla.

⁶Hundam xanoo Moollanni Waa'ina maha amadaa waaraa otossiho? Shokkiisakka'a hincaa'akkam kitimina ihoo mat hiinchi adduwwa amadaa waaronnihe?

⁷Kum gereebbi ambulluwwa te'im tommi kum daajjuwwa ihoo zayta hincaa'ummita'n liiramoohonnihe? I hawwojji bikkina i won qachcho, i baaxii'l bikkinam i godaphphi misha hincaa'onnihe?

⁸Manchi beeto, Waa'i kiinniinsi hasoo er luwwa kiina kuraakko; oohim hanqa egettona, dabassamoobee'i iitto moo'issonaa ki Waa'i illagenne maashaalloominne daba'llantonayyonnihe?.

⁹Waa'a baddimmi qoorooma; Waa'i Yerusaaleemina «Yerusaalee'm beero'onne wixxitakko'i minaadab macceessehe!

¹⁰Baaxiilaanchi ixxi minenne jollinne wixxaa'u amaxxaa duumamaakkoo baaxii'l keennaanchoo xadoommonnihe?

¹¹Qophpha'n keennaanchonnee canannee keentam keeno iyyaqqaa cawwihonnihe?

¹²Ki'nnuwwik goddaan manni damiginne wo'mmito'oo keeno; ka beero'onne hee'llam keenim qophphano woccamo; ixxuwwi allabinnem qawwiissamo.

¹³Ee bikkina ki'nnuwwi baaxii'l mashka'inne ki'nnuwwa bi'iseenaa gindeenaa ki'aammo.

¹⁴Ittakkamo; ihukkaarem godditakkamoyyo; sibaarim ki'nnuwwa fatakooyyo; wixxaa'llakkeena yakitakkamo bagaan wixxaa ha'yyooyyo; wixxaa'llakko'i amaxxi hee'uta'nnim orinne bi'isoommo.

¹⁵Hurbaata wixxakka'a atoota wixxa'llakkamoyyo; wee'l misha ciinsitakkamo; ihukkaarem ee zaytiinsi awwaaxxitakkamoyyo; woyi'n misha ciinsitakkamo; ihukkaarem diqaasa aggakkamoyyo.

¹⁶Ku hundim ki'nnuwwanne afookkok adil Oomir seera egettakko'i bikkinattee adil Aki'aab googom awwontakko'i bikkinattee. Ixxuwwi heechchi qaanqisanne mattakko'i bikkina ki'nnuwwa bi'isoommo; ee beero'onne hee'llam mannanne manni osaroo'isa issoommo; i minaadabanne ihu gado'o iyyitakkamisa issoommo» yoolla.