Read Hadiyya Mikkiyaas Kitaaba 7 Bible Online

Mikkiyaas Kitaaba 7 - Hadiyya bible

Mikkiyaas Kitaaba 7

¹Haqqikaa Woyi'nnekaa misha feerakka'a lasage iteena hasaa misha siidoobee'i manchisa ihummi bikkina aayye! An mixoommi gaassaa mishu oda'i mishim bee'e.

²Amma'nnamoo manchi uullanne bee'e; hanqi manchi matim bee'e; hundim manna sheena dugoolla; annannichchim mat mulleka amadeena qaasha qaashoolla.

³Ixxuwwik angi jor luwwa issimma losaakkoohane; gassaanchii daannii maqanxa xa'mmitamo; malaayyaam manchi ixxi sawwixxeka malaayyinne issiisookko; ee'isinne hundim oogato'o boqqissamo.

⁴Ixxuwwi lambe'iinsi lobakata e'llookko yakkamok halluttisa; lobakata hanqi mancho yakkamokim qarxaffisa. Hiraagaaninne qoxxisaa kurukkisannem Waa'i ixxi minaadaba guzumo'oo balli waarookko; kabadem ihuta'n oono'o ixxuwwi hambalaachchantamuulla.

⁵Mannanne amma'nnato issititte; kiina abbis qarmanchonnem amma'nnantitte; maqire hee'lloo ki meentichchonam kuttoo woshsha erisa ege'lle.

⁶Ee doollenne beet anna gadookko; landichcho amanne, beetare ballonne ki'llamo; mannina diina'i ixxi gaqqi abaroosam ihookko.

⁷Ihukkaarem an Waa'anne neeyyato issoommo; eese gatisaanchi ihu Moollannam egeroommo; ixxim macceesookko.

⁸I diinakkichcho, an ubumta'nnim ki'oommi bikkina liirantitte; tuunsonnetti ihumta'nnim Waa'i iina caakkisookko.

⁹Waa'a hawwodaammo; ee bikkina iina hincu kissa moo'aa iina oogateebe'e ixxeka quunqa iyyaqqimmi hasisookko; lasaanchonnem eese ixxi caakkanne fissookko; iina hanqa oogatookko; caakkannem fissookko; anim ixxeka gatisimma moo'oommo.

¹⁰I diinakkichchim ee hundam mo'ookko; «Ki Moollanni Waa'i hannonne yookko?» yukkok tuulle ede'ookko; anim ixxeka ubimma i illinne moo'oommo; gooqqi inqenne yoo ha'llisa hance'amamukkuuyyim moo'oommo.

¹¹Yerusaalee'm minaadaba, beero'i oottuwwi ootamoo amman waarookko; ee ammane ki'nnuwwik uulli haraarookko.

¹²Ee ammane ki'nnuwwi minaadab ki'nnuwwi kollonne daba'llookko; oohim Asooriinsi, Gibxiinsi, Efiraaxiis daajji hegeegiinsii ee'isam dambalaqquwwaa duunnuwwaa higaa qee'l uulliinsii waarookko.

¹³Ihukkaarem uulloom ee uullanne yoo manni jolliinsi ki'ukkok udma'i ihookko.

¹⁴Waa'a! Ki allaachchi ihu minaadaba at egere; ixxuwwim lataakkoo haqqi woronne mullam hee'llam keeno; gaassisam Baasaanannee Gala'aadannee ittam luwwa uwwe.

¹⁵Gibxiinsi neese fissitti amma'nnisam aganna moo'ise.

¹⁶Mulli minaadab malaayyaammuwwi ikkota'nnim eekka moo'lla'a tuuttamo; ixxuwwi suumem amaxxitamo; maccem ifiixxitamo.

¹⁷Hamashshisaa biqinne shuroo mulli qooccanchuwwisaa buchcha ittamo; ixxuwwi girbuwwiinsi fitta'a huxe'llu'uuyyi waattamo. Baachchinnem ni Moollanni Waa'i kolli daba'llitamo; keesem badditu'uuyyi hee'llamo.

¹⁸Baaxiilo haafookkokii gatu ixxi minaadaphphekam hawwojja xigoobee'ekii kiinni'nnoo'i Waa'i ayyette? Haafimmi keese liiransoo bikkina ki quunqi heer heerina hee'oohaneyyo.

¹⁹Niina odim qishixxitootto; ni hawwojjam ki lokkinne kade'antootto; niikka baaxiilo hundam xillaalli dambalqanne uunjitootto.

²⁰Gaassi niyyanno'ina hide'llaa aaggitti saga'llisannem Abrihaamaanninaa Yaaqoob shumo'inaa kiikka amma'nnantaattoohaannoomaa heer heerina hee'oo iittoo moo'issootto.