Read Hadiyya Naahoom Kitaaba 1 Bible Online

Naahoom Kitaaba 1 - Hadiyya bible

Naahoom Kitaaba 1

¹Naanaawe'i bichchi bikkina Eelqooshiinsetti ihoo Naahoom wocu sagarii moo'u kaaltii kane.

²Waa'i to'achchoohanee baado firoo Moollanna; Waa'i baado firoohanee bala'inne wo'mmaakkoohane. Waa'i ixxenne uullixxantam keenonne baado firoohane; ixxi diina'annem ixxi quunqa dilliisookko.

³Waa'i quuqeena gaaggaaboobee'anee wodaamoo; baaxiilaanchom guzumo'oo'n urooyyo; hambu'llamannee womoorannee ixxena goog yookko; duubim ixxi lokkina dira.

⁴Waa'i ijaajinne dambalaqii daajjuwwii gogookko. Baasaanannee qarmeeloosannee yoo hix gogookko; Liibaanoos fiitim giggirookko.

⁵Waa'i illagenne duunnuwwi huxe'ookko; hoffi duunnuwwim bukkamookko; Waa'i illagenne uullii uullanne yoo luwwii hundim huxe'ookko.

⁶Waa'i quuqoo ammane ixxi illagenne uulleena xanookkok ayyette? Ixxi quunqim gii'llisa aphphpoo ammane iyyaqqeena xanookkok ayyette? Gii'llisa shokkiisoo quunqi dilloo ammane lob kinnuwwi anamaa binnookko.

⁷Waa'i biijaalla; hawwi ammaninam qoxxaalli girba; ixxonne amma'nnoo keeno hundam egerookko

⁸Ixxo saboo keeno dirisinne bi'isookko; ixxi diina'am gambabbi tuunsonne hollookko.

⁹Waa'anne dollottakkamok mahinatte? Ixxi ki'nnuwwa lasaanchi afeebe'e bi'isookko; la'mmaagge ixxonne ki'llakkeena xantakkamoyyo.

¹⁰Dimbaano! Ixxina'i ixxim amaxxamu uttii bura'ii giirinne shokkaa bi'oo'isam ki'nnuwwim bi'llakkamo.

¹¹Naanaawe'i manna, Waa'anne jora sawwookkokii jollam sogoo manchii ki'nnuwwi lambe'enne ki'aakko.

¹²Waa'i ixxi minaadab ikko'i Isra'ee'lina «Aasoo'l manni malaayyaammuwwaa lobakataa ikko'aarem bi'llamo; i minaadaba, kanniinsi illageen ki'nnuwwanne hawwo lonsummaarem ka lasage hawwi lophphooyyo.

¹³Aasoo'l manni ki'nnuwwanne iyyiisso'i ciimo'i gaanjaqqa iiqansoommo; ki'nnuwwi karantakko'i chimchimam muransaa uunjoommo» yukko.

¹⁴Waa'i Aasoo'l minaadabina «Kanniinsi eehid ki'nnuwwika summa weeshisoo shumo'i hee'ooyyo; ki'nnuwwi waa'uwwi minenne yoo anginne baxamu misilluwwaa bukkakka'a baxakko'i waa'uwwaa bi'isoommo; at jottitti bikkina kiina waammi bare hinoommo» yukko.

¹⁵Oono'o, mishiraachchi sagara wocoo manchi, xummam alallaatoo asse'amaanchi duuninne waaroolla. Yihuxxi minaadaba, keese bi'isookkok horo'em bi'aakko; kanniinsi eehid ki beyyo waaroobee'i bikkina ki ugudduwwa liiranchinne lonse. Waa'ina uwwoommo yitaa sagara aaggitti ki uga'am uwwe!