Read Hadiyya Naahoom Kitaaba 2 Bible Online

Naahoom Kitaaba 2 - Hadiyya bible

Naahoom Kitaaba 2

¹Naanaawe'e, iiqansaa bi'isoo diina'i keesenne waaraakko; ee bikkina girbuwwa qoxxise; googguwwam egere; lamadom lade'e; malaayyem erisa qoxxise.

²Maham diina'i ixxuwwa boguta'nnim woyi'n kaashsham bi'isuta'nnim Waa'i Yaaqoobika lomba Isra'ee'llaannisam dabarookko.

³Diina'ik gaadaan kashar agilluwwa amadaakko; kashar eddechcham edde'aakko; faraxxi gaare'im gii'l laba'nnisa bubboolla; faradaanim wo'llaanamoolla.

⁴Faraxxi gaare'uuwwi googguwwanne xoreexxantamo; manni wixxoo beyyonnem ekkidii kidii daba'llantamo. Aphphoo xomboora labbamo; banqisam darabantamo.

⁵Gaaxxi awwonsaano weeshookko; ixxuwwim ubbu'uuyyii ki'llu'uuyyii waattamo; Diina'ik gaadaan geettu'uuyyi beero'i ootanne fittamo; ixxuwwanne darabakkam xiyya agirinne dabattamo.

⁶Daajji kollinne yoo beero'i gooccuwwim mengelecaa fooqukko; adilla'n minim dambaqinne wo'mmukko.

⁷Naanaawe'i lombi maxaramukko; Adilam qeefadanta'a matto'ookko; isek awwaadaan landim handare'i saga'llisa kichchechchi sagara macceesissamo; biqe aphphixxitu'uuyyim wi'llitamo.

⁸Naanaawe'i qoqqob toroshamaa daadoo wo'isa; «Uulle! Uulle!» yakka'a laarakkota'nnim laso daba'llaa moo'ookkok bee'e.

⁹Ee beero'ik amaxxi tungibee'ane; bito xee'aalli kinim lobakata; ee bikkina mattakka'a biraa worqaa boggehe.

¹⁰Naanaawe'i beero'i gindamaakko, bogamaakkoo maxaramaakkoo. Manni hundim baachchinne luqucaakko; malaayyim hoogaakko; manni hundim huxe'aakko; illi heemachchaakko.

¹¹Hobbi hee'oo beyyo, hobbi geexxuwwim allaa'lloo beyyoo goonchii meentichchi hobbichchii wotallinne maqirem baachchi bee'em makkixxaa hee'oo beyyoo labam hee'u oo beero'i kaba hannonne yookko?

¹²Hobbichchi hochchaa wotallina ihoo maara eebukko. Meentichchi hobbichchinam itookkoka shaa eebukko. Hee'oo ma'nna shu moochchinne barem maarinne wonshukko.

¹³Gogoxxi Moollanni Waa'i «Naanaawe'e, an diina'oominne keesenne ki'aammo. Kiikka faraxxi gaare'uwwa giirinne shokkiisoommo; hobbi geexxuwwam bisa'i bi'isookko. Mulli keeniinsi hoottaa wixxaa'llittoka hundam uulliinsi bi'isoommo; ki ijaacci sagarim kanniinsi eehid hore'em macceesamooyyo.