Read Hadiyya Naahoom Kitaaba 3 Bible Online

Naahoom Kitaaba 3 - Hadiyya bible

Naahoom Kitaaba 3

¹Lobakat kee'n xiiga dunaakkoo qophphaninnem wo'mmaakkoo bogimminnee qeefadimminnee la'amaakkoo Naanaawe'i beero'ina aayye!

²Jiraafikii tululoo gaare'i gugii faraxxi konte'ikii faraxxi gaare'ikii gug macceesamookko.

³Farashshaanchi firiixookko; bisa'im beleccee'ookko; bagadim belelle'ookko; lobakat mannim lehookko; leesh hananenne ubookko. Xigakkammaanniinsim hanaan ihookko; daba'llamakkam googim bee'ookko.

⁴Oo hundim ihukkok adabbi'llo'oo gennaanchottee huushisaanchottee ikko'i saa'aanchi mashka'innette. Isem saa'imminne mulli minaadaba kiirimminnem minaadaba qeefaddo'ookkotane.

⁵Gogoxxi Moollanni Waa'i «Naanaawe'i, oono'o, an keesenne diina'oominne ki'aammo; ki qexxam maxaroommo; ki kallemarooma minaadab ki tuulli orachchom adilluwwi moo'oo'isa issoommo.

⁶Hacca keesenne uunjoommo; keesem gadoommo; mannim keesenne osaroo'isa issoommo.

⁷Moo'ookkok hundim kiinniinsi gibaa ‹Oono'o, Naanaawe'i gindamaa diihaakko; kichche'ookkokdu ayyette?› yookko. Ise qoxxiseena xanoodu hannonne siidoommokko?» yukko.

⁸Naanaawe'e, at Abbaayyi daajji gadanonne yoo wo'inne kibbamaakkoo Teebisiinsi lophphitoohonnihe? Ixxek oot daajje; girbim wo'o.

⁹Tophphe'ii Gibxii ee beero'ina gabal bee'i malaayyi hee'amukko; Fuuxii Liiba'ii hara'mmitam keen hee'lloo.

¹⁰Ihukkaarem Teebis beero'onne diina'i weeraraa minaadab qeefadamaakko; is ciilluwwim kinanne ficiriiqamaa goog hundannem ubaakko; adi'l ooso saaminne baxxamakko'ookko. Awwonsaanom chimchimminne karakko'ookko.

¹¹Naanaawe'i, at dimbaa'nnisa tartaritoottokii diina'i illagiinsi gibbaa maaxantoo beyyo hassoo ammanii waarookko.

¹²Ki girbuwwi hundim gaassaa mishu misha iyyu oda'isa ihookko; ee haqqichcho heekkeesakka'a giggissakkamaare mishoom itoo manchi suumenne ubookko.

¹³Ki gaadaan hundim meentisa baachchaan ihookko; ki uulli gaba'l gooccuwwim diina'ina fooqaakko; gooca xufakkam laqqo'uwwam giir itaakko.

¹⁴Diina'i kibbaa u'nnisoo ammanina aggoo wo'o inkiittaa guduse; girbuwwa qoxxise; mu'uta baxakkam hara hassaa kade'e; xuubam baxe.

¹⁵Erisa ege'llitta'nnim giirinne shokkimmii bisa'inne muranchii gatooyyo; qawwaawwi itu hurbaaxxisa bi'llootto; qawwaawwisaa kochcha'nnisaa fikkaanne.

¹⁶Ki daddaraan iima'n boollaankiinsi lophphaakko; ihukkaarem qawwaawwisa ki uulla murugisaa guullaa bararaa marookko.

¹⁷Adilluwwii daannuwwii qiixxi ayyaamo ooxxi lugumonne sutamoo qawwaawwa labookko; eelliinchi firoohaare baratta'a bi'llamo; ihukkaarem hanno affoda'e ayyim la'ooyyo.

¹⁸Aasoo'l adila, ki egeraan baqoobee'isa diriiraakko; ki gassaan lehaakko; ki minaadab wixxaa'ookkoka hoogaa duunanne binnaakko.

¹⁹Kee'mmaallisa iiqantitti bikkina ki mada fayyiiseena xanoo luwwi bee'e; ki jolliinsii mongiinsii xorukkok ayyim bee'i bikkina ki bichcha macceesukkok hundim liiramaa anga aphphisookko.