Read Hadiyya Inbaaqoom Kitaaba 1 Bible Online

Inbaaqoom Kitaaba 1 - Hadiyya bible

Inbaaqoom Kitaaba 1

¹Waa'i hiraagaanchi Inbaaqoomina kaaltinne uwwu hiraaqqi sagar kanniinsi woroon yoohane.

²Waa'a, hara'mmitoo'isina ki kollonne laaroommaare macceessoobee'ek hinki balli afeebe'e? Damgi lophphaa laarummaare at gatissoobee'ek hinki balli afeebe'e?

³Ka hawwojji hundam moo'oommisa issittok mahinatte? Ku barche'i hundim ihukkuuyyi cawwitaa moo'lloottok hinkidette? Bichchii barche'ii i illagenne yookko. Wocii hambalaachchii lophphaakko.

⁴Ee bikkina seer sho'aakko; hanqi bi'aakko; oogata boqqisseena baaxiilaan er manna kibbito'ookko.

⁵Ee lasage ixxi Waa'i minaadabina «Ki'nnuwwi kululleetanne yoo minaadaba moo'llehe; Moo'llakkam luwwi hundannem lobakata maalallitakkamo. Ayyi manchim kuruta'n amma'nnitakkeena xantakkambee'i maalalsiisoo luwwa ki'nnuwwi doollenne baxoommo.

⁶Oono'o, ee mogaalluwwaa gaaggaaballuwwaa ikko'i Baabiloo'n manna ki'nnuwwanne ki'isoommo; ixxuwwi gaqqan ihubee'i uulli hundam orinne ammaddeena weerattamo.

⁷Ixxuwwi baddissamanee muggissam keenoo; ixxuwwi gaqqi lomba egessiissam seeram fissitamo.

⁸«Ixxuwwik farad kabeeriinsi loboka qare'aalla; hii'm oro'iinsim loboka mogaalluwwa; ixxuwwik faradaan jigissu'uuyyi qee'lliinsi waattamo; hootta'a itteenam hishshammachchisa barattamo.

⁹«Ixxuwwik gogot barche'e issiteena waattamo; ixxuwwi illim eelliinchi fi'l hafachchisa shokkiisookko. Qeefado'om shashsha'llisa wixxaa'llamo.

¹⁰Adilluwwam gaddamo; awwonsaanonnem naaccamo; girbuwwa gadda'a osattu'uuyyi buchcha tuubba'a amaddamo.

¹¹Ee lasage hundim hafachchisa fii'anta'a mattamo; oohim ixxuwwi ixxuwwika malaayye ixxuwwi waa'isa xiggo'oo baaxiilan keeno» yukko.

¹²Keesantaattoo i Moollanni Waa'a! At heer heeriinsim hee'llittane; at neese egettoo bikkina lenoommoyyo. Neese bakke'nnoommi Waa'a! Baabiloo'n manni neese guzumo'llamisina neesenne ki'issaa ixxuwwina malaayye uwwittok atette.

¹³Ki illi hore'em muccur ihu bikkina jor luwwi moo'llaa iyyaqqitooyyo; eehannah ku boqquwwi keen ixxuwwiinsi muccuroominne e'lloo manna bi'isseena ki'llamaare mahina cawwitto?

¹⁴Manna dambalaq qurxumme'isaa awwonsaanchi bee'i biqinne shurukkuuyyi maroo qooccanchuwwisaa issitoottok mahinatte?

¹⁵Baabiloo'n manni qurxumme'isa minaadaba hundam qaashinne amaddamo; shikkinnem gosaassa'a wixxaa'llamo; ee bikkina ililitu'uuyyi liirantamo.

¹⁶Ichchi hurbaata godditamisaa makkixxita'a hee'llamisaa issoo bikkina qurxumme'i qaashsham shikkina kitima hincaa'llamo; wixxaa'llam mu'utinam aduruusa wiriissitamo.

¹⁷Eehannah ixxuwwi hundi ammanem shikkinne qaashshu'uuyyi qishixxitoo'n minaadaba guullitonannihe?