Read Hadiyya Inbaaqoom Kitaaba 2 Bible Online

Inbaaqoom Kitaaba 2 - Hadiyya bible

Inbaaqoom Kitaaba 2

¹I egechchi beyyonne ihaa uulloommo; girbi ooxxi hananne firaa egeroommo; ee beyyonne ihaa Waa'i iina yookkokaa i fitina uwwoo dabachchaa egeroommo.

²Waa'im iina «Kiina caakkisoommi kaalta kitaabe; qananaa'ookkok qaqqisaa qananaa'ona moo'amoo beyyonne kirbaasanne kitaabe.

³Kaaltoom qoodamu amman afeebe'e egerookko; lasaanchi doolli bikkina kurookko; ixxim qophphanooyyo. Dasoo labuta'nnim egere; hanqo'isam waarookko; hore'em dasooyyo.

⁴Amaadaano moo'e; eroomma sawwitamoyyo; ihukkaarem mucculluwwi amma'nnatinne hee'llamo» yaa dabarukko.

⁵Amaxxi huushisoohane; amaadaanchim iyyaqqooyyo. Si'ooli'nnoo'i gollaancho; Lehi'nnoo'i mogaalla. Mulli minaadaba ixxi gagina wixxaa'ookko; manna hundam qeefadookko.

⁶Manni hundim eehido'i mannanne naacimminne «Kiihan ihubee'i amaxxa wixxaa'lloohaanno aayye! Badano miqimma hoogu kee'n amaxxa wixxaa'llittuuyyi goddaanchi ikkoottok hinki balli afeebe'ette?» yookko.

⁷Badanaammuwwi issitakko'i keen ki'nnuwwanne dangonne ki'llamoyyonnihe? Ki'lladu ki'nnuwwa batbataa'llammoyyonnihe? Ki'nnuwwim ixxuwwi anganne qeefadantakkamo.

⁸Ki'nnuwwi lobakat minaadaphpheka amaxxa boggakka'a hee'llakko'o; ihukkaarem foorinne gatto'i keen korina ki'nnuwwa boggamo. Mashka'oomim ki'nnuwwi lobakat minaadaphpheka xiiga duntakko'ookko. Uullanne yoo beero'uwwanne hundannem hee'llam minaadabanne barche'e baxxakko'ookko.

⁹Hanqi bee'i googinne wixxaa'llakko'i amaxxinne mine baxxakko'i keeninaa jor luwwi afoobee'isa mine duunanne baxxakko'i keeninaa aayye!

¹⁰Lobakat minaadaba hantaarinne shitakka'a ki'nnuwwi abaroosina sholle'nna eebbakko'ookko; ki'nnuwwi gaginam bichcha eebaqqitakko'ookko.

¹¹Gimbi kinneewwim gorte'i worinne laarookko; gorte'i haqqim eehannina wororinne dabachcha uwwookko.

¹²Beero'o baaxiilinne shooto'llam keeninaa manni xiiginne baxxam keeninaa ayye!

¹³Gogoxxi Moollanni Waa'i minaadab baxxamok hundim giirinne bi'oo'isina, adilluwwi yakitim kora'am gatoo'isina qoodaakko.

¹⁴Dambalaq wo'inne wo'mmaakkoohan ihukkisam uullim Waa'ika lomba la'imminne wo'mmaakkoohane ihookko.

¹⁵Tuulli orachcho moo'eena ixxi beshichchina dimbeebe'e inkiirukkuuyyi dimbisoo agga agisoohaannina aayye!

¹⁶Atim korina lombi bikkenne sholle'llootto; aggaa dimbitaahim tartaritootto; Waa'i qoxxaalli guzumo'i humbullo agisookko. Ki lombam sholle'nnanne dabarookko.

¹⁷Liibaanoosika digibbuwwa muttittisa atim murantootto; moochcha guullitaa hee'llitto; ixxuwwim keese u'nnissamo; oo hundim keesenne afookkok lobakat minaadaphpheka xiiga dunti bikkinattee uulluwwaa beero'uwwaa bi'issitti bikkinatte.

¹⁸Qophpha'n waa'uwwik awwaad marcho? Ixxi manni anginne shobamaa baxamaakkoohane; qophphaniinsi bagaan ixxeensi ma'llichchim siidamooyyo; eehannah ixxo shobaa baxu manchi maham woceena xanoobee'aannonne amma'nnim maha awwaadookko?

¹⁹Haqqiinsi cabbaramaa baxamu luwwina «Baqihe», kiniinsi shobamaa baxamu luwwinam «Ki'e» yitoo kiina ayye! Ayla'ukko oo qophpha'n waa'i mat maaxaqqi luchcho kiina caakkiseena xanoohonnihe? Qophpha'n waa'i worqinnee birinnee goolabamaa baxamaakkohane; ihukkaarem foor bee'ane.

²⁰Waa'i keesamaakkoo minennette; ee bikkina uullanne yoo minaadab hundim sa'ihona.