Read Hadiyya Inbaaqoom Kitaaba 3 Bible Online

Inbaaqoom Kitaaba 3 - Hadiyya bible

Inbaaqoom Kitaaba 3

¹Mazmuurinne hiraagaanchi Inbaaqoom uunxat kane.

²Waa'a! At baxxitti maalalsisoo bax hundam macceesaa lobakata baddummo. Ka illageen issitti maalalsisoo bax hundam ka ni doollennem eddaa isse; maarag hundannem ki bax la'amoo'isa isse; quuqqoo ammanem haafihe.

³Waa'i Teemaaniinsi, Keesammim Faaraa'n duuniinsi waaraakko; Ixxek lombi iimane ifiisaakko; galatim uullanne wo'mmaakko.

⁴Ixxek dan eelliinchisa caakkisoohane; ixxi angiinsi caakki firookko; ixxi malaayyi ee beyyonne maaxamaakko.

⁵Booban ixxi illagenne higaa marookko; jabbim laso awwonookko.

⁶Ixxi uullukkaare uulli heekke'ukko; ixxi moo'ukkaare uulli minaadab huxe'ukko; heer heerinam hee'u duunnuwwi toroshamukko; Illagee'n doollenne hee'u hoffi duunnuwwim shiraashiramukko; ixxek googim heer heerina hee'oohane.

⁷Tophphe'i dukkaannuwwi u'nnamukkuuyyi, Miidiyaa'm mannim huxe'ukkuuyyi moo'ummo.

⁸Waa'a! Ki faradonnee ki kaachchi faraxxi gaare'ennee afuutaa jigissoottok daajjuwwii dambalaqquwwii quuqisu bikkinattennihe?

⁹Ki xiyyam gonooniinsi fissitto; tokkaashshe'e chokkottitto; uulla diqqaahim wo'o fissitto.

¹⁰Duunnuwwi keese moo'lla'a huxe'llo'o; xee'n dirisim uulla agaa marukko; cambalaqim gugukko; wo'i moorim humburuqqe'aa uullukko.

¹¹Tokkaashshe'isa darabamaa bagaxxisa belecce'oo banqiinsi ki'ukkok eelliinchii aganii yoo'i beyyonnem uullito'o.

¹²Uullanne bala'inne daba'llantitto; minaadabam quunqinne hancaacantitto.

¹³Ki minaadaba gatisseena doo'llitti adilam xossiisseena fittitto; bichchi uulli awwonsaancho liittitto; ixxi awwonaanom bi'issaa ixxo leexa'issitto.

¹⁴Gogoxxi awwonsaancho ixxi xiyyinnem qassitto; ixxi gogot waatto'ok hambu'llamisa neese binnaa'imminatte hee'ukko; hoongaan keenom duussita'a woramadimminne liiranteenatte hee'ukko.

¹⁵At faradinne dambalaqa hance'antoo ammane xillaalli dambalaq shafshafookko.

¹⁶Ee hundam macceesaa muggummo; ixxi sagarim i suume huxiisookko; i miqim heekke'ukko; i lokkim digiiramukko. Waa'i neese hawwisoo keeno guzumo'eebe'i afeebe'e; iyyaqqimminne egeroommo.

¹⁷Oda'i mishubeeta'nnim, woyi'n kaashshannem mish bee'uta'n, wee'l haqqi mishubeeta'n, uullim hurbaata hooruta'n, gereebbi orodonne hee'ubeeta'n, gaadirannem lar bee'uta'n

¹⁸ihukkaarem an Waa'anne liiramoommo. Eese gatisaanchi Waa'annem lobakata liiramoommo.

¹⁹Moollanni Waa'i iina malaayye. I lokkom gaallichchi lokkisa qoxxisookko; duunnuwwannem daba'llamoommisa issookko.