Read Hadiyya Safooniyaas Kitaaba 1 Bible Online

Safooniyaas Kitaaba 1 - Hadiyya bible

Safooniyaas Kitaaba 1

¹Amoon beet Iyyoosiyaas Yihuxxi adil hee'u doollenne Safooniyaas beyyo Waa'ik sagar waarukko. Safooniyaas Kuush beeto; Kuush Gadaaliy beeto; Gadaaliy Amaariy beeto; Amaariy odim adil Hizqiyaas beeto.

²Waa'i «Hundem luwwam uulliinsi guullaa bi'isoommo.

³Manna, diinate, iima'n cii'aa dambalaq qurxumme'ee bi'isoommo; boqquwwi keenom onkoroollisoommo; manni shumo'o uulliinsi bi'isoommo; an Waa'i kaka wocaammo.

⁴«Yerusaalee'mmekaa Yihuxxi minaadabaa hundam guzumo'oommo; ee beyyiinsim Ba'aala yakkam qophpha'n waa'aa ixxenam awwaaddam qeessuwwaa guullaa bi'isoommo.

⁵Mi'n iimanenne fitta'a eelliinchina, aganinaa boollaankinaa otossitam keenoo iina otossitu'uuyyii i summinne hide'llu'uuyyii odim Milkooma yakkam qophpha'n waa'i summinne hide'llam keeno bi'isoommo.

⁶Iinniinsi qee'llita'a eese hassobee'i keenoo an awwonsona eese xa'mmitobee'i keenoo bi'isoommo» yoolla.

⁷Waa'i oogatoo balli hincu bikkina ixxi illagenne sa'i'llehe; Waa'i ixxi minaadaba kitimina hincoo diinaxxisa higisaa uwweena gudaakko; bogoo diina'am weeshaakko.

⁸Waa'i «I minaadaba higisaa uwwoommi balla gassaano, adilluwwi oosoo allaggi manni qaanqa awwonoo keenoo guzumo'oommo.

⁹Odim qophpha'n waa'ina mikkiranne xophitu'uuyyi otossitam keenoo bogga'ahii qawwiissa'ahii eebbo'i mu'uta ixxuwwi qophpha'n waa'i minenne wonshitam keenoo guzumo'oommo» yoolla.

¹⁰Waa'i «Ee balla Yerusaalee'm ootiinsi Qurxumme'i Gooca yakkam kollinne laachchik, haareechchi wixxixxi beyyinnem wi'llik sagar macceesamookko; duunnuwwannem kee'mmaalli dambaq ihookko.

¹¹Beero'oomiinsi woroo'n kollonne hee'llakkam keen hundim ka sagara macceessakkam ammane ‹Aayye! Aayye!› yitakku'uuyyi wi'llehe. Mashka'oomim eekke'enne daddaraanii kin bira dabassitam keenii hundim letamo.

¹²«Ee balla sha'a amadaa Yerusaalee'm beero'o saarayyoommo; hasso'isa ikku'uuyyi hee'llam keenoo bolxoomminne ‹Waa'i danaamoom joram issooyyo› yitam keenoo guzumo'oommo.

¹³Ixxuwwik amaxxi hundim bogamookko; ixxuwwi minim gindamookko; ee ammane mine baxxamo ihukkaarem hee'llamoyyo; Woyi'na kaassamo; ihukkaarem woyi'n diqaasa aggamoyyo» yoolla.

¹⁴Waa'ik hundiinsi lob balli hincaakko; qaqqisaahim waarookko; oo baalli lobakata baddisoohane; ee balla macceesamoo sagar qaraaraalla; ee balla gaadaan lobakata laattamo.

¹⁵Oo balli quunqane, hawwane, u'nnane, bichchane, gindanchane, tuunsane, witiriichchane, duuphphanee gambabbi tuunsanee ihookko.

¹⁶Ee balla girbamu beero'uwwannee kininne ootamu qeeraa'l oottuwwannee o'l xurumbii laachchii macceesamookko.

¹⁷Waa'i «Baaxiilo baximminne eese hawwoddo'i bikkina qooqisa tartariteebe'e manni hundannem kee'mmaalli hawwo eeboommo; ixxuwwi xiigim wo'isa dunamookko; ixxuwwi leeshim haccisa ubookko» yoolla.

¹⁸Waa'i ixxi quunqinne mannanne oogatoo balla birii worqii gatiseena xanooyyo; ixxi quunqi giirinnem uulli bi'ookko; mashka'oomim uullanne yoo manni hundim dangonnem beeddoo bikkinatte.