Read Hadiyya Safooniyaas Kitaaba 2 Bible Online

Safooniyaas Kitaaba 2 - Hadiyya bible

Safooniyaas Kitaaba 2

¹Ki'nnuwwi tuuttakkambee'i minaadaba, qaqqissakka'a Waa'i kollonne daba'llehe.

²Eebeelas hafachchi fii'aa massoo bura'isa ikkakkamo; Waa'ik gii'llisa aphphoo quunqi kinnuwwanne waarookko; bala'im ki'nnuwwanne dillookko.

³Waa'ika ijaajo egettakkam keen uullanne hee'llakkam maashaalluwwi hundim Waa'i kollonne daba'llehe; muccuroomam hassehe; Waa'i illagenne gaga heeshaa'llehe; ayyi la'ukko Waa'i quuqoo ayyaamo baraara fittakkeena xantakkamo.

⁴Gaaza'i beero'i manni hee'oobee'i udma'i ihookko; Asqaloo'n beero'im gindamookko. Ashdoodanne hee'llam mannim samgud ballanne ixxuwwi gattiinsi hollantamo; Eeqiroo'n mannim beero'iinsi yaayyanta'a fittamo.

⁵Dambalaq tochchonne hee'llakkam Kaarte'i manna, ki'nnuwwina aayye! Waa'i ki'nnuwwanne oogateenatte; Filisxee'm uulli Kana'aana, ayyim hee'eena xanoobee'isa issaa keese bi'soommo.

⁶Dambalaq tochchonne yoo ki'nnuwwi uulli hundim diinat allaa'lloo beyyoo allaaraanii diinatii hee'oo beyyoo ihookko.

⁷Qeefadanchiinsi gatto'i Yihuxxi manni ki'nnuwwi uulla lago aa'lla'a allaachchi beyyi issitamo; Asqaloonanne yoo minneewwannem gattamo. Moollanni Waa'im ixxuwwa abooyyookko; qeefadamaa maru ixxuwwi amaxxam dabarookko.

⁸Gogoxxi Moollanni Waa'i «I minaadaba Moo'aaphphi minaadab naacco'isaa Amoo'n minaadab game'llito'isaa macceesaammo; gadda'a naacco'isaa uulla hootteena sha'llanto'isaa la'aammo.

⁹An Isra'ee'l Waa'i gogoxxi Moollanni hee'oomman ihummisinnem hanqinam Moo'aabii Amoonii Soddo'mmisaa Gomo'llisaa bi'llamo; bochchi xuuxu beyyisaa sooqixxi ba'llisaa heer heerina udma'i ihookko; qeefajjiinsi gatto'i i minaadab ixxuwwika amaxxa boggamo; ixxuwwi uullam lago aa'llamo» yoolla.

¹⁰Moo'aaphphaannonnee Amoo'n minaadabannee ku hawwi hundim afookkok Gogoxxi Moollanni Waa'i minaadabanne bolximminne naacantu'uuyyi sha'llanto'i bikkinatte.

¹¹Waa'i ixxuwwi uullanne yoo qophpha'n waa'uwwa hundam bi'isoo bikkina Waa'a badditamo. Dambalaq tochchonnee wo'inne kibbamaakkoo uulli hundannee hee'llam minaadab hundim yo'i beyyonne hundannem Waa'ina otossitamo.

¹²Ki'nnuwwi Tophphe'i manni i bisa'inne letakkamo.

¹³Waa'i hanaa'n qarinne yoo Asoora bi'isookko; Naanaawe'i beero'om udma'i issookko; uulli udma'isam gokkisookko.

¹⁴Gereebbi, fella'i, larii moochchii hosoo beyyi ihookko; mooqqaqqi gindamu mi'n woronne garookko; maskoottuwwannem firaa muunookko. Gooc hundannem gindamu minneewwi hacci tuubamookko. Digibinne baxakko'i minneewwik haqqi maxaramookko.

¹⁵Ee beero'i manni «Niinniinsi bagaan manni bee'e» yimminne bolxita'a hee'llam hee'llo'o; ihukkaarem kaba oo beero'i moochchi garoo udma'i ihaa gatookko; eeheen higoo hundim maalalaa anginne moo'isukkuuyyi fiinqeesookko.