Read Hadiyya Safooniyaas Kitaaba 3 Bible Online

Safooniyaas Kitaaba 3 - Hadiyya bible

Safooniyaas Kitaaba 3

¹Boqqa, haashaarammaa amadoohanee ihu Yerusaalee'm beero'ina ayye!

²Oo beero'i ayyenam ijaajamoobee'ane; sogitanom aa'oobee'ane; Waa'annem amma'nnamoobee'ane; ixxi kollim hincoobee'ane.

³Awwonsaan muunoo hobbisa; daannuwwim soodina gatisoo'n siidukkoka hundam itoo sibaaru maaroballi oro'isa.

⁴Ee beero'i hiraagaan bolxitam keenoo qawwiisaanoo; qeessuwwim keesamma haashaassitam keeno; seerinam ijaajantambee'i keeno.

⁵Ee beero'onne huushamoobee'i muccur Waa'i yookko; ixxi balli hundam hanqa oogatookko; darina darinam eehid issimma urooyyo; ihukkaarem ee beero'i boqqi minaadab tuuroobee'ane.

⁶Waa'i «An mulli minaadaba bi'isummo; girbuwwam gindansummo; ixxuwwi googinne ayyim higoobee'i diih issaammo; beero'uwwam diihisummo.

⁷An ‹I minaadab eese lonsookko; i sogitanom aa'ookko; issummokam xadooyyo› yaa hee'ummo. Ihukkaarem i minaadab edaa edaa jora baximminne haashaaramaakko» yoolla.

⁸Waa'i «Hofqaxam iyyaqqehe; ixxuwwanne oogatoommi amman waarookko; mulli minaadabaa ixxuwwi adilluwwaa wixxaa'aa iikka malaayyaam quunqa ixxuwwanne dilliisoommo; i malaayyaam quunqinne ku uulli hundim bi'ookko.

⁹«Ee ammane oo minaadab muccur woshsha wocoo'isa issoommo. Eeham issoommok hundim i summa weeshonattee mateeyyoomminne iina awwaadonattee.

¹⁰Binnaa hee'oo i minaadab Tophphe'i daajjuwwi eeqidiinsi kitima amadaa iina otosseena waarookko.

¹¹Eesenne baxxakko'i baaxii'l bikkina ee ammane tuuttakkamoyyo; mashka'oomim bolxoo keenoo amaadaanoo ki'nnuwwi lambe'iinsi hooroommo; ka lasage keesamaakkoo i duunanne iina boqqitakkamoyyo.

¹²Ki'nnuwwi lambe'iinsi gaga heeshaa'llo'oo maashaalli minaadaba gatisoommo; ixxuwwim eesenne bakke'llamanee i hara'mmatom hassamanee ikkamo.

¹³Qeefajjiinsi gatto'i Isra'ee'l minaadab ayyennem jor issitamoyyo; qophphanom woccamoyyo; ixxuwwi suuminnem qawwiissamoyyo; ee bikkina makkixxita'a xumminne hee'llamo; baddisoo luwwim hee'ooyyo» yoolla.

¹⁴Xiyoo'n landichche, zammare; Isra'ee'l minaadaba, ililittuuyyi zammare; Yerusaalee'm minaadaba, wo'm wodaninne liirammehe; lobakatam liirammehe.

¹⁵Waa'i ki'nnuwwanne oogataa hee'u guzumo'o haafaakko; ki'nnuwwi diina'am bi'saakko. Isra'ee'l Moollanni Waa'i ki'nnuwwi lambe'ennette; «Ka lasage neesenne jor bichchi afookko» yitakka'a badditakkotte.

¹⁶Ee ammane Yerusaalee'm bikkina «Xiyoo'n beero'o baddititte! Ki wodim hoogoone.

¹⁷Moollanni Waa'i kiinninnette; ixxi wodinnem kaachcha uwwookko. Waa'i keesenne liiramookko; ixxi iittinnem ki heechcha haareechchisookko. Minaadab uguxxi ayyaamo zammarukkuuyyi liiramoo'isa ixxi keesenne liiramookko» yakkamo.

¹⁸Waa'i «Uguxxi balla liiramakkamisa at liirantoo'isa issoommo; ka lasage hore'em tuuttooyyo.

¹⁹Keese hawwisoo keeno hundam ee ammane guzumo'oommo; dimoo keenom gatisoommo. Binnito'i keenom dabaraa wixxaa'oommo; sholle'nnam lombanne dabaroommo; ee bikkina uullanne yoo minaadab hundim keese lonsookko» yoolla.

²⁰Waa'i «Kinnuwwa hundam wixxaa'aa ki'nnuwwi uulla woroommo; ki'nnuwwi amaxxa ki'nnuwwi iilli moo'ukkuuyyim ki'nnuwwina dabaroommaare uulli minaadaphphi lambe'enne la'antakko'oo lombaamuwwi ikkakkamo» yoolla.