Read Hadiyya Hage'i Kitaaba 2 Bible Online

Hage'i Kitaaba 2 - Hadiyya bible

Hage'i Kitaaba 2

¹Daariyoos adil ihu la'm hiinchonne lama'l agan aagu lamiyyennee mat ballannee hiraagaanchi Hage'enne ihaa Waa'i odim wocukko.

²Waa'i «Yihuxxi uulli gassaanchi hee'u Salaatiyaal beet Zarubaabeelina, hundiinsi lob qeessichchi hee'u Iyyooseedeeq beet Iyyaasinaa qeefadanta'a hee'llam uulliinsi daba'llita'a waatto'i minaadabinaa

³‹Gaassi ku Waa'i min hinkido'i lombi yoohan ihuda'e moo'u manchi ki'nnuwwi lambe'enne yoohonnihe? Kaba moo'llakkamaare hinkidette? Kuk mahannem xigamoobee'aneyyonnihe?

⁴Ihukkaarem kaba Zarubaabeela, qoxxe; hundiinsi lob qeessichchi Iyyooseedeeq beet Iyyaaso, qoxxe; ka uulli minaadaba, qoxxitakka'a baxxehe. An gogoxxi Moollanni Waa'i ki'nnuwwinnette.

⁵Gibxi uulliinsi fittakko'i ammane ‹An ki'nnuwwinne maqir ihoommo› yaa aagummi neeyyaxxi saga'llisannem kabadem i Ayyaan ki'nnuwwinne maqir ihu bikkina qoxxehe» yaa wocukko.

⁶Gogoxxi Moollanni Waa'i «Gundi ammanenne odim iimanee uullaa, dambalaqaa uullaa heekkeesoommo.

⁷Mulli minaadab hundam heekkeesoommo; ixxuwwi amaxxi hundim keyye waaroo'isa issoommo; ku minim amaxxinne wo'mmoo'isa issoommo.

⁸Uullanne yoo worqii birii hundim iihane.

⁹Ku haareechchi ihaa baxamu i min illagee'nnaanniinsi lophphaa nuur yoohan ihookko. Anim i minaadabina eekke'enne wo'm xumma uwwoommo» yoolla. Kaka wocukkok gogoxxi Moollanni Waa'a.

¹⁰Daariyoos adil ihu la'm hiinchonne honsi agan aagu lamiyyennee soo'l ballannee gogoxxi Moollanni Waa'i hiraagaanchi Hage'enne

¹¹«Muse'e see'l bikkina qeessuwwa xa'mme.

¹²Mat manchi keesamaakkoo maara kiti'm beyyiinsi massaa ixxi eddechchanne xaaxaa amaduta'n eddechcham injeerii woxii, woyi'n diqaasii zaytii te'im mulli hurbaata hinkam nakkuta'n hurbaat hundim ee manchi mashka'inne keesamaakkoohan iheena xanoohonnihe?» yukko. Ee'isinne hiraagaanchi xa'mmaa lasonne qeessuwwim «Keesamaakkoohan iheena xanooyyo» yita'a dabatto'o.

¹³Hage'i odim dabaraa «Leesha nakkaa haashaaramu manchi ka hurbaaxxeka matooma nakkuta'n oo nakkamu hurbaat hanqo'isam haashaaramooyyonnihe?» yaa xa'mmukko. Qeessuwwim «Eeyya, haashaaramookko» yita'a dabatto'o.

¹⁴Hage'im «Ku minaadab hundim ee'isame. Ee bikkina ixxuwwi baxii hincaa'llam kitimii haashaaramaakkoohane» yoolla Waa'i yukko.

¹⁵Waa'i «Ki'nnuwwanne mah afuda'e qoossitakkamoyyonnihe? Gindamu i mine dabattakka'a baximma asheettakkeen illageen

¹⁶ki'nnuwwi lamiyyi qunna siindoommo yitakko'i beyyonne xale'i tommi qunna siiddakko'o. Odim ontayyi hubur diqaasa inkiittakkeena sawwitakka'a woyina ciinsakkam beyyo mattakko'o; ihukkaarem xale'i lamiyyi hubur diqaasa inkiittakko'o.

¹⁷An ki'nnuwwi badattakko'i luwwi hundam cinnakkinne, baradinnee hadaddinnee bi'isummo; ihukkaarem ki'nnuwwi i kollonne daba'llitakko'oyyo.

¹⁸Oono'o, kaballi honsi agan aagu lamiyyee sooro; i mine dabattakka'a baximma asheettakko'aanniinsi ki'issakka'a mareessehe.

¹⁹Sire'i hurbaat bee'uta'nnim woyin, oda'i, roomaanii weerii mishubeeta'nnimii an kaballiinsi ki'isaa ki'nnuwwa maasse'oommo» yoolla.

²⁰Oo honsi agan aagu lamiyyennee soo'l ballannee odim Waa'i hiraagaanchi Hage'ena

²¹«Yihuxxi uulla gassaanchi hee'u Zarubaabeelina ‹An iimanee uullaa heekkeesoommi amman waarookko.

²²Ee ammane adilluwwika adilla'n barcuma qubbaa'oommo; ixxuwwi malaayyem hoogisoommo; o'l faraxxi gaare'uwwaa ushe'llam keenoo ubbuusoommo. Faradim beeddookko; faradaanim ixxuwwina'i ixxuwwim shaqqantamo.

²³Iina awwaadaanchi Salaatiyaal beet Zarubaabeela, an keese doo'llaammo. Mat balla gassaanchi ikkoo'isina doo'llaa i quba'i koobo'isa issoommo› yitaa kure» yukko. Kaka wocukkok gogoxxi Moollanni Waa'a.