Read Hadiyya Zakkaaryaas Kitaaba 1 Bible Online

Zakkaaryaas Kitaaba 1 - Hadiyya bible

Zakkaaryaas Kitaaba 1

¹Daariyoos Faariis uulli adil ihu la'm hiinchaannonne sadeenti agananne Iido'i beet beet hee'u Baraakiy beet Zakkaaryaasina kidyoo sagar Waa'iinsi waarukko.

²Gogoxxi Moollanni Waa'i Zakkaaryaasa minaadabina «An Waa'i illagee'n ki'nnuwwi anno'onne lobakata quuqaa hee'ummo.

³Ihukkaarem kaba ki'nnuwwina yoommok i kollonne daba'llehe; anim ki'nnuwwi kollonne daba'lloommo.

⁴Illagee'n ki'nnuwwi anno'isa ikkakkotte; ixxuwwina illagee'n hiraagaan ‹Jor googiinsii jor baxiinsii daba'llehe› yita'a qoxxissa'a kutta'a hee'llo'o; ihukkaarem ki'nnuwwi anno'i i sagara macceesso'oyyo; i ijaajom egetto'oyyo.

⁵Illagee'n ki'nnuwwi anno'i hannonne yo'o? Hiraagaandu heer heerina hee'llamonnihe?

⁶Ihukkaarem i awwaadaan ikko'i hiraagaaninne illagee'n ki'nnuwwi anno'ina an kurummi Seeraa ijaajoo egettobee'i bikkina kee'mmaalli hawwi ixxuwwanne afukko. Ee bikkina gaabbita'a ‹Gogoxxi Moollanni Waa'i ni gooqqisaa ni baxisaa ixxi qoodukkisannem laboo guzumo'o uwwukkisa qoossaqqinaammo› yito'o» yitaa kure yukko.

⁷Daariyoos adil ihu la'm hiinchonne Sheebaaxa yakkam tommikii mat aganii aagu lamiyyennee soo'l ballannee Waa'ik sagar Iido'ona beet beet ihu Baaraakiy beet hiraagaanchi Zakkaaryaas beyyo waarukko.

⁸«Mat manchi kashar farashshonne saa'llaakkoo hiimonne kaaltanne moo'ummo. Ixxim cebbi woronne yoo baarsanaat haqqi lambe'enne uullaa hee'ukko. Ixxi lasonnem kashar, daama'ii qadaalli farashshii awwonam hee'ukko.

⁹‹Anim I moollanna, ku farad mah kobi'lla?› yaa xa'mmummo. Ixxim ‹Ka faraxxek kobi'l mada'e ihukkisa kuroommo.

¹⁰Ku farad uulli hundannem daba'llantamisina Waa'i asse'aakkoo keeno› yukko.

¹¹Faradim «Uulli hundam do'nnaa moo'nnaammo; uulli hundim usheexxaa xummam yookko» yita'a Waa'i asse'amaanchina kutto'o.

¹²Waa'i asse'amaanchim «Gogoxxi Moollanni Waa'a! Yerusaaleemannee Yihuxxi beero'uwwannee hundannem quuqqittaanniinsi lamarayyi hiincho ihaakko; at ee beero'uwwina haafitoobee'ek hinkaa'n balli afeebe'e?» yukko.

¹³Ee lasage Waa'i iinninne wocam hee'u ixxi asse'amaanchina liiransoohaanninnee qoxxisoo sagarinnee wocukko.

¹⁴Ee bikkina Waa'i asse'amaanchi «Gogoxxi Moollanni Waa'i ‹An Yerusaalee'm bikkinaa Xiyoo'n bikkinaa lobakata to'achchaammo.

¹⁵Xummanne hee'llam eese laqqambee'i minaadabanne lobakata quuqaammo; mashka'oomim an i minaadabanne hoffokam quuqaa hee'ummuuyyim ixxuwwi i minaadaba lobakata hawwoddo'o.

¹⁶Ee bikkina Yerusaaleemina haafeena daba'lloommo; i minii Yerusaalee'm beero'im daba'llaa baxamookko.

¹⁷Odim «Gogoxxi Moollanni Waa'i ‹I beero'uwwi odim daba'llaa amaxxaam ihookko. Waa'i Xiyoona qoxxisookko; Yerusaaleemam doo'llookko› yoolla» yitaa alallaate yukko.

¹⁸Odim Mulli kaaltanne soor buudduwwa moo'ummo.

¹⁹Iinninne wocam hee'u Waa'i asse'amaanchom «Ku buudduwwi maha kobi'lda'ee iina kure» yummo. Waa'i asse'amaanchim «Oo buudduwwi Yihuxxeka, Isra'ee'llekaa Yerusaalee'm minaadabaa binnitamisa issito'i adilluwwa» yukko.

²⁰Ee lasage soor angi qoor manna Waa'i iina moo'isukko.

²¹Anim «Ku manni waatto'ok maha baxxeenatte?» yaa xa'mmummo. Ixxim «Ku budduwwi ayyim mikmikeena xanoobee'isa issita'a Yihuxxi minaadaba binnaa'llo'i keeno. Ihukaarem ku angi qoolluwwi waatto'ok ee keeno baddisseena, minaadaba binnaa'lleenaa Yihuxxi uullanne buudo iimiimaa'llo'i ee mulli minaadaphphi budduwwa iiqansita'a ubbusseenatte» yukko.