Read Hadiyya Zakkaaryaas Kitaaba 10 Bible Online

Zakkaaryaas Kitaaba 10 - Hadiyya bible

Zakkaaryaas Kitaaba 10

¹Waa'i qaraax agannuwwanne xeena uwwoo'isina uunxehe; mashka'oomim xeenaam duuba asse'aa xeenam ga'nnisaa uulliinsi mutoo luwwa manni oosina uwwookkok ixxotte.

²Qophpha'n waa'i huushisoo woshsha kurookko; kiiraanim qophpha'n kaalta moo'ookko; qophpha'n haqaawwom haqaawwe'ookko. Awwaad bee'i qoxxishsham qoxxissamo; ee bikkina minaadab bi'u gereebbisa batbatitamo; awwonsaanbee'i bikkinam u'nnantamo.

³Waa'i «I quunqi allaraanonne aphphaakko; awwonsaanom guzumo'oommo; gogoxxi Moollanni Waa'i an i gagim i allaachchi ikko'i Yihuxxi minaadaba egeroommo; ixxuwwim iina malaayyaam o'l faraxxisa ikkamo.

⁴Ixxuwwi lambe'iinsim lamejji ki'nnisa ihaa i minaadaba gassoo awwonsaanchi firookko. Ixxuwwi lambe'iinsim dukkaa'n xiribbi'nnoo'i gassaanii o'l beyyi xiyyisa ikko'oo gaaxxi awwonsaanii ki'llamo.

⁵Yihuxxi minaadab ixxuwwi diina'a hancaacca'a gooqqi haranne eddam malaayyaam gaadaa'nnesa ikkamo; Waa'i ixxuwwinne maqir ihu bikkina oranta'a faradaanom kaa'llamo.

⁶«An Yihuxxi minaadaba malaayyaammuwwi issoommo; Yooseef minaadabam gatisoommo; ixxuwwina qishixxoommi bikkina hundam ixxuwwi uulla dabaroommo. Kanniinsi illageen uunjantobee'aannisa ikkamo; an ixxuwwi Moollanni Waa'i ihummi bikkina ixxuwwika uunxato macceesoommo.

⁷Efireem minaadab malaayyaam gaadaa'nnisa ikkamo; woyi'n diqaasa agu manchisam liirantamo; ixxuwwi shumo'i hundim ee kaachcha sawwimminne liirantamo; ixxuwwi wodanim Waa'anne liiramookko.

⁸«I minaadaba qaqqasaa weeshaa mateeyyanne wixxaa'oommo; hanqo'isam gatisoommo; kanniinsi illageen hee'llo'isam ixxuwwika xigo fikkaannisoommo.

⁹Mulli minaadaphphi lambe'enne binnaa'umta'nnim hee'llam qee'l uullanne ikka'a eese sawwitamo; ixxuwwii ixxuwwi oosii gatta'a ixxuwwi uulla daba'llitamo.

¹⁰Gibxi uulliinsi ixxuwwa dabaroommo; Aasoo'l uulliinsim wixxaa'oommo; uulloomim manninne wo'mmookko; Gala'aadannee Liibaanoos uullannee edda'a gattamisa issoommo.

¹¹Ixxuwwi hawwi dambalaq worinne higgu'uuyyi an Waa'i hambu'lla'mmeka malaayye aphphisoommo; xillaalli Abbaayyi daajjim gogookko; bolxitam Aasoo'l mannim sholle'llamo; Gibxi adillanim bi'ookko.

¹²An Waa'i i minaadaba qoxxisoommo; ixxuwwim i sagarina ijaajantu'uuyyi eese lonsitamo» yukko. Waa'i kaka wocaakko.