Read Hadiyya Zakkaaryaas Kitaaba 11 Bible Online

Zakkaaryaas Kitaaba 11 - Hadiyya bible

Zakkaaryaas Kitaaba 11

¹Liibaanoosa, giir ki digibbuwwa shokkiisoo'isina kiikka gooccuwwa fooqaa'e.

²Hoommuwwa, digibbuwwi ubu bikkina hibbaam haqqim bi'u bikkina «Aayye!» yitakku'uuyyi wi'llehe. Baasaa'n qilxo'uwwa, tiiwwi doom bachchamaakkoo bikkina «Aayye!» yitakku'uuyyi wi'llehe.

³Hixaam allaachchi beyyi bi'u bikkina allaaraan «Aayye!» yitu'uuyyi wi'llitamo. Yoordaanoos daajji gada'n tiiwwi doom bi'u bikkina hobbika muunoo kichchechchi sagara macceessehe.

⁴I Moollanni Waa'i «Durina gudu gereebba allaare.

⁵Bito aa'llo'i manni gereebba dutto'i bikkina guzumantamoyyo; biteesso'i mannim ‹Waa'i galaxxamona; amaxxaammuwwi inkaammo› yitamo; allaaraanom ihuta'n ee gereebbina qishixxitamoyyo» yukko.

⁶Waa'i «Anim kanniinsi eehid uullanne hee'oo minaadabina ayyenam qishixxoommoyyo; manni hundam ixxi beshichchinaa adilinaa higisaa uwwoommo; ixxuwwim uullooma bi'issamo; anim ixxuwwi angiinsi gatisoommoyyo» yukko.

⁷Ee bikkina durina gudisakko'i gereebba annannam u'nnanto'i keeno allaaroommo; allaachchooma allaarummuuyyi lam bicco massummo; mat bicci summa «Nuura» yummo; la'm bicci summam «Mateeyyooma» yummo.

⁸Mexxo'i mat agananne sasem allaaraanom bi'isummo. Gereebbim eese sabukko; anim ixxuwwa ceemummo.

⁹Ee lasage allaachchina «An kanniinsi eehid ki'nnuwwina allaaraanchi ihoommoyyo; letam keenim letona; bi'llam keenim bi'llona; gatto'i keenim ixxuwwina ixxuwwim itanta'a beedditona» yummo.

¹⁰Ee'isam hundem minaadabinnem aagummi hidi'l sagara gindeena «Nuura» yaa weeshummi i bicco iiqummo.

¹¹Ee ballam hidi'l sagar gindamukko; eehid issummuuyyim moo'llam hee'llo'i u'nnanne hee'llo'i gereebbim Waa'i sagar ihukkisa laqqo'o.

¹²Anim «Iittitakkolas iina miqakkam bito miqqehe; sabbakkolasim ullehe» yummo; ee bikkina ixxuwwi sad kin bira miqqo'o.

¹³Waa'im iina «Uwwakkeena iittamakko'i danaam bito diinata dissakkam minenne disse» yookko; anim sadem kin biram massaa Keesammi Minenne yoo diinate dissakkam minenne dissummo.

¹⁴Ee lasage «Mateeyyooma» yaa weeshummi la'm bicco iiqummo; oohim Yihuxxaannonnee Isra'ee'l minaadaphphi lambe'ennee yoo abbaayyoom bi'ukkisa moo'iseenatte.

¹⁵Ee'isam Waa'i iina «Odim qawwi allaaraanchi mu'uta masse.

¹⁶Oono'o, uullanne i allaachcha egeroo mat allaaraancho ki'isoommo; ihukkaarem ixxi bi'ukkoka sawwooyyo; allaachchiinsi annanni ihu keenoom hasooyyo; iiqamukkokam caccooyyo; fayya'i keeninam itoo luwwa uwwooyyo. Eehid issoo bikkenne geejju keeno duraa itookko; shuku'lluwwam muransookko.

¹⁷Ixxi allaachcha lagoo awwaad bee'i allaraanchina aayye! Ixxi angii makkolli illii bisa'inne aphphisamona; angim hore'oomam shiihona; makkolli illim hore'em qooqona» yukko.