Read Hadiyya Zakkaaryaas Kitaaba 12 Bible Online

Zakkaaryaas Kitaaba 12 - Hadiyya bible

Zakkaaryaas Kitaaba 12

¹Iimane biddiqaa'ukkok uullam qooccukkok manninam foore uwwu Waa'i Isra'eelina

²«Yerusaaleema ixxi kululleetanne yoo minaadabina agakkamaare tartaraa'oo woyi'n diqaas humbullisa issoommo; ixxuwwi Yerusaaleema ammaddam ammane gatu Yihuxxi beero'uwwim kibbamookko.

³Ihukkaarem oo balli afoohaare Yerusaaleema mulli minaadabina hundinam kee'mmoo ki'nnisa issoommo; Yerusaaleema ki'iseena yakoo hundim ixxi gaga hawwodookko; uulli minaadab hundim Yerusaalee'm minaadaba hawwodimmina mat ihaa waarookko.

⁴Ee ammane ee kee'n farado u'nnisoommo; faraadaanom machchaassoommo; diina'i farado qooqisoommo; ihukkaarem Yihuxxi minaadaba i illinne moo'ummuuyyi egeroommo.

⁵Ee ammane Yihuxxi awwonsaan ixxuwwi wodanonne ‹Gogoxxi Moollanni ixxuwwina Waa'i ihu bikkina Yerusaaleemanne hee'llam ixxi minaadab ixxeensi malaayye siiddamo› yitamo.

⁶«Ee ammane Yihuxxi minaadaphphi awwonsaano tuubamu haqqi woronne yoo gii'l midachchisaa farshimmuwwi lambe'enne aphphoo gii'llisaa issoommo; ee kululleetanne yoo mulli minaadaba bi'issamo; ihukkaarem Yerusaalee'm minaadab beero'i woronne xumminne hee'llamo.

⁷«An Waa'i Daawiit shumo'ikii Yerusaalee'm mannikii lombi Yihuxxi minaadaphphi lombiinsi lophphoobee'isa gaassaa Yihuxxi minaadabina kaachcha uwwoommo.

⁸Ee ammane an Waa'i Yerusaaleem mannina agir ihoommo; ixxuwwiinsim hore'em hoogaancho yakko'ok Daawiit qaxa qoxar ihookko; Daawiit shumo'im Waa'isa te'im Waa'i asse'amaa'nnisa ikka'a minaadaba awwonsitamo.

⁹Ee ammane Yerusaaleemanne diina'i ikka'a ki'llam mulli minaadab hundam bi'iseena ki'oommo.

¹⁰ «Ee ammane Daawiit shumo'ii Yerusaalee'm minaadabii qishixxatinnee uunxaxxi ayyaaninnee wo'mmitamisa issoommo; qasso'i eesem moo'llamo; mexxo'i mat beetina wi'lloo manchi qaxa wi'llitamo; won beetina iranaa wi'lloo manchi qaxam iranta'a wi'llitamo.

¹¹Ee ammane Yerusaaleemanne macceesamoo wi'l Maagido'i biir uullanne Hadaadiriimoonina[2] wi'llakko'i wi'llinnoo'an ihookko.

¹²Uullanne hundannem wi'l ihookko; manni hundim moolli moollinnem wi'llookko; ixxuwwi meentim ixxuwwi gagina wi'llookko; ee'isinne Daawiit shumo'ik abaroos ixxuwwi meentinne maqirem Naataan shumo'ik abaroos ixxuwwi meentinne maqirem

¹³Leewe'i shumo'ik abaroos ixxuwwi meentinne maqirem, Shiimi'i shumo'ik abaroos ixxuwwi meentinne maqirem moolli moollinne ikka'a wi'llitamo.

¹⁴Gatu manni shumo'im abaroosisinne baxxamanta'a wi'llitamo; ixxuwwi meentim mullam annannikka'a kichchechchinne wi'llitamo» yukko.