Read Hadiyya Zakkaaryaas Kitaaba 13 Bible Online

Zakkaaryaas Kitaaba 13 - Hadiyya bible

Zakkaaryaas Kitaaba 13

¹Gogoxxi Moollanni Waa'i «Ee ayyaamo Daawiit shumo'oo Yerusaalee'm minaadabaa baaxiiliinsii haashaaranchiinsii muccussoo wo'i bu'i fooqookko.

²Ee ammane qophpha'n waa'uwwika summa uulliinsi bi'isoommo; od ixxuwwa sawwoo hee'ooyyo; qophpha'n hiraagaanoo jor ayyaannuwwam uulliinsi bi'isoommo.

³Odim ayyim hiraago wocuta'n ixxi annii amaa «At Waa'i summinne qophphano woccaattoo bikkina leh hasisookko› yitamo; hiraago wocuta'nnim ixxi annii amaa qassa'a shitamo.

⁴Ee doollenne ‹An hiraagaancho› yoo hundim moo'u kaaltanne tuurookko; manna huushiseenam hiraagaan edde'oo oddaam eddechcha edde'ooyyo.

⁵Ixxim ‹An oosoommaniinsim ki'isaa uulla abuullaancho bagaan hiraagaanchoyyo› yookko.

⁶Mat manchi ‹Eehannah ku ki orachchonne yoo mateenchi mahane?› yaa xa'mmoohaare ‹I beshichchi minenne omaraammoohane› yaa dabarookko» yukko.

⁷Gogoxxi Moollanni Waa'i «Bisa'a, iina gassaanchi ihu allaaraanchonne ki'e! Gereebbi binnihona allaaraanchooma aphphise; anim hofkeenonne i woda ki'isoommo.

⁸Uullanne yoo minaadabiinsi sas suumiinsi lam suumoom aphphisamaa lehookko; ihukkaarem sas suumiinsi mat suum gatookko.

⁹Ee saxxi suumooma giiranne edoommo; kin bir giiranne muccuroohaannisa worqim hawweenamoohaannisa muccussoommoo hawweenoommoo; eehanniinsi lasonne ixxuwwi eese uunxitamo; anim ixxuwwina dabachcha uwwoommo; ixxuwwam ‹I minaadaba› yaa weeshoommo; eesem ‹Ni Moollanni Waa'a› yitamo» yukko.