Read Hadiyya Zakkaaryaas Kitaaba 2 Bible Online

Zakkaaryaas Kitaaba 2 - Hadiyya bible

Zakkaaryaas Kitaaba 2

¹Odim mulli kaaltanne keenakkam usa amadaakkoo mat mancho moo'ummo.

²Anim «Hanno mattoolla?» yaa xa'mmummo; ixxim «Yerusaalee'm qeeraa'lloomii haraaroomii hinkaa'nda'e keeneena maroommuulla» yukko.

³Ee lasage iinninne wocam hee'u Waa'i asse'amaanchi marukko; mulli asse'amaanchim ixxenne exxeena marukko.

⁴Ixxim «Geettaa mattaa ee woraadichchina ‹Yerusaaleemanne lobakat minaadabii fooraam diinatii yoo bikkina oot bee'i beero'i ihookko› yitaa kure.

⁵Waa'i ixxi gagoomim ee beero'i kululleetanne gii'l ooxxisa ihaa beero'ooma egeroo'isaa ixxi lombim ee beero'onne hee'oo'isaa neeyyato uwwaakko» yukko.

⁶Waa'i ixxi minaadabina «An Ki'nnuwwa soorem qarannem binnaa'aa hee'ummo; ihukkaarem kaba hanaa'n qaranne yoo uullinsi gibbehe.

⁷Baabiloonanne qeefadanta'kka'a hee'llakkam manni Yerusaaleema gibbehe.

⁸Ki'nnuwwa nakkookkok ixxi gaqqi ilbeetichcho nakkukkaannisa» yoolla. Lombaam Waa'i ixxi minaadaba boggo'i mulli minaadabina ka sagara wocoommisina eese asse'aa

⁹«Waa'i ixxi gagim ki'nnuwwinne oramookko; ki'nnuwwina awwaadaan hee'llo'i minaadabim dabatta'a ki'nnuwwa boggamo. Ee ammane eese asse'ukkok gogoxxi Moollanni Waa'i ihukkisa laqqakkamo.

¹⁰Waa'im «Yerusaalee'm minaadaba, an waaraa ki'nnuwwi lambe'enne hee'oommi bikkina liiranchinne zammallehe» yoolla.

¹¹Ee ammane dut mulli minaadab Waa'i kollonne waatta'a ixxi minaadab ikkamo; Waa'im ki''nnuwwi lambe'enne hee'ookko; eesem ki'nnuwwi beyyo asse'ukkok ixxotte ihukkisa laqqakkamo.

¹²Waa'i Yihuxxi minaadaba keesamaakkoo uullanne ixxi gaqqi gullummi issookko; Yerusaaleemam odim doo'llookko.

¹³Waa'i keesamaakkoo ixxi heechchi beyyiinsi waareena ki'u bikkina maara edde'llakko keen hundim ixxi illagenne sa'i'llehe.