Read Hadiyya Zakkaaryaas Kitaaba 3 Bible Online

Zakkaaryaas Kitaaba 3 - Hadiyya bible

Zakkaaryaas Kitaaba 3

¹Ee lasage Waa'i hundiinsi lob qeessichchi Iyyaaso Waa'i asse'amaanchi illagenne uullaakkoo kaaltanne moo'isukko. Sheexaanchim Iyyaaso kasaseena ixxi makki kollinne uullaa hee'ukko.

²Waa'im Sheexaanchina «Sheexaancho, keese Waa'i axeere! Yerusaaleema doo'llu Waa'i keese axeere! Ku manchi shokkiinsi baraara firaakkoohaneyyonnihe?» yukko.

³Iyyaasim xuraakkoo eddechcha edde'aa Waa'i asse'amaanchi illagenne uullaa hee'ukko.

⁴Waa'i asse'amaanchim ixxi illagenne uullita'a awwaaddam keenina «Ka xuraam eddechcha ixxeensi sheelattehe!» yaa ijaajaajukko. Iyyaas kollim daba'llaa «Oono'o, ki baaxiilo kiinniinsi qeessaammo; haareechchi lombi eddechcham eddeesoommo» yukko.

⁵Waa'i asse'amaanchim awwaadaanina «Muccur gufuta ixxi horoonenne xaaxxehe» yaa ijaajukko; ixxuwwim ijaajanto'isannem issito'o; Waa'i asse'amaanchi eekke'enne uullaa hee'onam awwaadaan Iyyaasina haareechchi eddechchca eddeesso'o.

⁶Ee lasage Waa'i asse'amaanchi Iyyaasina

⁷«Gogoxxi Moollanni Waa'i ‹I illagenne ki taakki xabbeen ihulasii i seeram egettilasii i minenne gassaancho, i wixxixxi beyyuwwannem daanni ikkootto. Ka beyyonne uullito'i iina asse'amaaninne maqirem i illagenne aaggaa fittoo daannooma uwwoommo.

⁸Hundiinsi lob qeessichchi Iyyaaso, kaka macceese; ixxenne maqire awwaaddakkam qeessuwwii ka lasage ihoo eroommina mare'i ikkakko'i keenii kaka macceessehe. ‹‹Caafa›› yamamoo i awwaadaancho an asse'oommo.

⁹Oono'o, Iyyaas illagenne lamar illi yoo mat kincho dissaammo; eehanni hanennem kitaaboommo; ka uulli baaxiilom mexxo'i mat ballanne bi'isoommo.

¹⁰Oo balli afoo ammane ki'nnuwwiinsi annannichchim woyi'n kaashshaannonnee oda'i hafannee maadda gudisaa ixxi olla'a weeshaa liiramookko› yoolla» yukko.