Read Hadiyya Zakkaaryaas Kitaaba 4 Bible Online

Zakkaaryaas Kitaaba 4 - Hadiyya bible

Zakkaaryaas Kitaaba 4

¹Iinninne wocam hee'u Waa'i asse'amaanchi odim waaraa diriichchiinsi ki'oo manchisa eese baqaa'ukko.

²Ixxim «Ku moo'lloottok maha?» yaa xa'mmukko. Anim dabaraa «Lamar qaf yoo caakka dissakkam worqinne baxamaakkoo mu'uta moo'oommuulla; hanennem zayixxi qure'i yookko; lamarem caakka dissakkam qafannem fatir aagoo afo'i yookko.

³Caakka dissakkam mu'uxxi gadanonnem lam wee'l haqqi mat ee qure'i makki kollinne mat odim ee qure'i qeddi kollinne hee'ukko» yummo.

⁴Anim iinninne wocam hee'u Waa'i asse'amaanchina «I moollanna! Kuk mah kobi'lla?» yaa xa'mmummo.

⁵Ixxim «Ku keen mada'e laqqooyyonnihe?» yukko. Anim «I moollanna! An la'oommoyyo» yummo.

⁶Oo Waa'i asse'amaanchim an Zarubaabeelina la'isona kuru gogoxxi Moollanni Waa'ik sagar «Kaachchi i Ayyaaninnette bagaan wodinnee malaayyinneyyo.

⁷Duu'nnisa ki illagenne uullu luwwi hundim shiraashramookko; Keesammi Minem dabattaa baxxootto; goollimmi kinam dabattaa beyyonne dissitoo ammane minaadab ‹Hinkido'i nuuraamo! Nuuraamo!› yitu'uuyyi liiranchi sagara macceesissamo» yoohane yukko.

⁸Odim Waa'i iina

⁹«Zarubaabeel angi ka keesammi mi'nneka shooho'i kina uullisaakko; ixxi angim baxaa guullookko; ee ammane gogoxxi Moollanni Waa'i eese ki'nnuwwi beyyo asse'ukkisa laqqakkamo.

¹⁰Hoffi luwwi ihoo ayyaamo gadookkok ayyette? Manni Zarubaabeel anganne tumbe'e moo'aa liiramookko. Ku lamarim heer uulla moo'oo Waa'i ille» yukko.

¹¹Anim ixxo «Ku caakka dissakkam mu'uxxi makki kollinnee qeeddi kollinnee yoo wee'l haqqi mahane?

¹²Odim worqinne baxamu ka lamem boombi gadanonne ihaa wee'l zayti daadoo ku lamem wee'l caaffuwwim mahane?» yaa xa'mmummo.

¹³Ixxim «Ku keen mada'e laqqooyyonnihe?» yukko. Anim «I moollanna, la'oommoyyo» yummo.

¹⁴Ixxim «Ku lamim heer uullina Moollanna awwaaddeena doo'llanto'oo keeno» yukko.