Read Hadiyya Zakkaaryaas Kitaaba 5 Bible Online

Zakkaaryaas Kitaaba 5 - Hadiyya bible

Zakkaaryaas Kitaaba 5

¹Odim mat xaaxamaakkoo kitaab hafachchanne bararukkuuyyi moo'ummo.

²Waa'i asse'amaanchim «Maha moo'lloolla?» yaa xa'mmukko. Anim «Qeeraa'lloom lamiyyi anga haraaroom tommi anga ihoo xaaxamaakkoo mat omachchi kitaaba hafachchanne bararukkuuyyi moo'oommuulla» yummo.

³Ixxim «Ee xaaxamu kitaabanne heer uullanne afoo duunchi kitaabamaakkoohane; game'oo hundim ee kitaab mat kollonne kitaabamukkisinnem bi'ookko; qophphanonne hide'oo hundim mulli kollonne kitaabamukkisinnem bi'ookko.

⁴Gogoxxi Moollanni Waa'i ‹Ka duuncha game'oohaanni minee qophphanonne i summinne hide'oohaanni minee asse'oommo; aagaahim ee kee'n minenne afuuraa ixxuwwi minneewwa gindansookko› yoolla» yukko.

⁵Odim oo asse'amaanchim i beyyo waaraa «Iim daba'llitaa ku waaroo luwwi mada'e ihukkisa moo'e!» yukko.

⁶Anim «Kuk maruwwa?» yummo. Ixxim «Kuk heer uullanne baxamoo baaxiilo moo'isoo sananna» yukko.

⁷Ee sananninam irisaasinne baxamaakkoo ifiishshaanchi hee'ukko; an moo'onam ifichchi fooqukko; ixxi woronnem mat meentichcho afuutta'a hee'llo'o.

⁸Waa'i asse'amaanchim «Oono'o, tu meentichcho boqqoo'm kobi'llatte» yaa ise aad xiibaa sananni woronne aagisukko; ifiishshaanchom hanenne ifiisukko.

⁹Anim iim daba'llaa moo'ummuuyyi lam meenti barattu'uuyyi i koolli waatto'o; ixxuwwim ladinne hafachchanne barattam hee'llo'o. Ixxuwwi ladim hummaantaanni'nnoohan hee'ukko; ixxuwwim ee sananna uulliinsi ki'issa'a amadda'a iimane baratto'o.

¹⁰Anim iinniinne wocam hee'u ee Waa'i asse'amaancho «Ka sananna hanno massamoolla?» yaa xa'mmummo.

¹¹Waa'i asse'amaanchim «Baabiloo'n uulla massita'a ixxena mine baximminatte; minim baxamaa beeddoohaare sanannooma ee minenne dissiteenatte» yukko.