Read Hadiyya Zakkaaryaas Kitaaba 6 Bible Online

Zakkaaryaas Kitaaba 6 - Hadiyya bible

Zakkaaryaas Kitaaba 6

¹Odim iimooraa moo'ummo; soor faraxxi gaare'uwwim lam naas duu'n lambe'iinsi firukkuuyyi moo'ummo.

²Luxxi gaare'e gosaasookkok daama'i farad ihukkuuyyi la'mmeka odim heemaddi farad gosaasam hee'ukko.

³Saxxi gaare'e gosaasookkok qadaalli farad ihukkuuyyi soo'lleka hamacar farad gosaasam hee'ukko; hundem faradim malaayyaammuwwi hee'llo'o.

⁴Anim «I moollanna, ku faraxxi gaare'uwwi ma kobi'lla» yaa Waa'i asse'amaancho xa'mmummo.

⁵Ixxim «Ku keen uulli hundinam Moollanni illagenne uullita'a awwaaddam beyyiinsi fitto'oo soorem hafachchuwwame» yukko.

⁶Heemaddi farad gosaasam hee'u gaare'i hanaa'n qaranne, qadaalli farad gosaasam hee'u gaare'i eelliinchi aagganne, hamacar farad gosaasam hee'u gaare'i woroo'n qaranne yoo uulli kollonne maram hee'ukko.

⁷Malaayyaam hee'llo'i farad fitto'i ammanenne matta'a uulla hundam daba'llanta'a moo'lleena gaaggaabbam hee'llo'o. Waa'i asse'amaanchim «Mattakka'a uulli hundam moo'llehe» yukko. Oo keenim uulli hundam moo'llo'o.

⁸Ee lasage Waa'i asse'amaanchi «Hanaa'n qaranne matto'i farad Waa'ik quunqi siggoo'isa issito'ookko» yaa i kollonne shuurukko.

¹⁰«Baabiloo'n uullanne qeefadanto'i beyyiinsi waatto'i Heeldaayiinsi, Xoobyiinsii Yidaa'iyiinsii biraa worqaa amaddaa dassoo'n kabadoomam Safooniyaas beet Iyyoosiyaas mine mare.

¹¹Ixxuwwi uwwito'i birinnee worqinnee adilla'n mare'e baxxaa Lob qeessichchi ihu Iyyooxeedeeq beet Iyyaas horoorenne isse.

¹²Gogoxxi Moollanni Waa'i ‹Summi Caafa› yamamu manchi kane; ixxi yoo beyyonnem dagaagookko; keesamaakkoo Waa'i minem baxookko.

¹³Keesamaakkoo Waa'i mine baxookkok ixxotte; lombam aa'ookko; adilla'n barcumanne afuuraatim minaadaba gassookko; adilla'n barcumannem qeessichchi ihookko. Lamim shiinnaatantamo› yoolla.

¹⁴Oo adilla'n mare'im Heeleemina, Xoobyina, Yidaa'iyinaa Safooniyaas beet hee'u Heeninaa tiissiishshi ihaa Keesammi Minenne afuurookko» yukko.

¹⁵Ee ammane qee'l uullanne hee'llam manni Waa'ik keesamaakkoo min baxamukkuuyyi hara'mmiteena waattamo; ki'nnuwwim gogoxxi Moollanni Waa'i ki'nnuwwi beyyo eese asse'ukkisa laqqakkamo; ki'nnuwwim ki'nnuwwi Moollanni Waa'ina guullitakka'a ijaajantakkolas ku hundim ihookko.