Read Hadiyya Zakkaaryaas Kitaaba 7 Bible Online

Zakkaaryaas Kitaaba 7 - Hadiyya bible

Zakkaaryaas Kitaaba 7

¹Daariyoos adil ihu soo'l hiinchonne Kisleew[1] yakkam honsi agan aagu soo'l ayyaamonne Zakkaaryaasina Waa'i wocu sagar kane.

²Beetee'l manni Saari'eexeeraa Reegemeleekaa ixxuwwinne hee'llo'i manninne maqirem keesammi Waa'i mine asse'llo'o; asse'llo'okim Waa'a uunxitonaa

³Keesamaakkoo Waa'i mi'n qeessuwwaa hiraagaanoo «Kaballi afeebe'e lobakat hiinchuwwanne issinam hee'nnummisam onti agananne onti agananne Waa'i mi'n gindanchi bikkina kichche'nnummuuyyii soommannummuuyyii hee'nnonnihe?» yita'a xa'mmitamisinattee hee'ukko.

⁴Ee Lasage i kollonne waaru Waa'i sagar kane.

⁵Ee uulli minaadab hundinaa qeessuwwinaa «Higu lamarayyem hiinchom onti aganannee lama'l aganannee soommantakku'uuyyi kichche'llakko'ok hanqinam iinattennihe?

⁶Ittakkamohii aggakkam hee'llakko'okii ki'nnuwwi gaginatteme.

⁷«Yerusaaleemii kululleetanne yoo beero'uwwii amaxxinne makkixxita'a hee'llu'uuyyi woroo'n qarannee eelliinchi aaggi lugumonnee hee'llo'i manni xumminne hee'llo'i ammane Waa'i gaassi hiraagaaninne ihaa wocu sagar kaneyyonnihe?» yukko.

⁸Waa'i Zakkaaryaasina

⁹«An gogoxxi Moollanni i minaadabina uwwummi ijaaj ‹Hanqo'i oogato oogattehe; ki'nnena'i ki'nnem haafammehee qishixxammehee.

¹⁰Ki'nnuwwi lambe'enne hee'oo busar meento, adaraar ooso, waaraanoo buxaa hawwoddakkotte; ki'nnuwwina'i ki'nnuwwim mat matonne jora issimmina ki'nnuwwi wodanonne sawwitakkotte› yoohane.

¹¹«Ihukkaarem i minaadab xiiqqanta'a macceesimma sabimminne afare dabatto'o; maccem ifiixxito'o.

¹²Ixxuwwi wodanom ki'nnisa qoxxisso'o. An gogoxxi Moollanni Waa'i illagee'n hiraagaanonne i Ayyaaninne asse'ummi i ijaajo te'im sagaram macceesso'oyyo. Ee bikkina an gogoxxi Moollanni Waa'i ixxuwwanne lobakata quuqummo.

¹³Gogoxxi Moollanni Waa'i ‹An wocummaare macceessobee'i bikkina anim ixxuwwi uunxito macceesoommoyyo› yoolla.

¹⁴Hambu'llaminne fii'aa massaa ixxuwwi laqqambee'i mulli allaggi uullanne hee'llamisa issummo. Ku uullim udma'i ihukko; ku danaam uullim udma'i ihaa gatoo'isa issito'o» yukko.