Read Hadiyya Zakkaaryaas Kitaaba 8 Bible Online

Zakkaaryaas Kitaaba 8 - Hadiyya bible

Zakkaaryaas Kitaaba 8

¹Gogoxxi Moollanni Waa'i sagar odim i beyyo waarukko.

²Gogoxxi Moollanni Waa'i «An Xiyoo'n bikkina lobakata to'achchaammo; ixxi bikkinam to'achchinne shokkaammo» yoolla.

³Waa'i «An Xiyoo'n kolli daba'lloommo; Yerusaaleemannem hee'oommo. Ee ammane Yerusaaleemim Hanqi Beero'o yamamookko; gogoxxi Moollanni Waa'i Duunim Keesammi Duuna yamamookko» yukko.

⁴Gogoxxi Moollanni Waa'i «Goo'nnekii meentikii lommanni Yerusaalee'm wixxixxi beyyonne gaassisam afuurookko; umura goddita'atim sikkinne mattamo.

⁵Beero'oo'mmek wixxixxi beyyi hundim lelloo oosinnee odim wo'mmaakkoohan ihookko» yoolla.

⁶Gogoxxi Moollanni Waa'i «Kuk gatto'i Isra'ee'l minaadabina xanamoobee'eka labukkaarem hanqinem iina xanamoobee'i luwwi yoohonnihe?» yoolla.

⁷Gogoxxi Moollanni Waa'i «An i minaadaba eelliinchi fi'llaanniinsii eelliinchi aaggi uulliinsii gatisoommo.

⁸Dabaraa woraa Yerusaaleemanne hee'llamisa issoommo; ixxuwwim i minaadab ikkamo; anim ixxuwwina hanqinnee muccuroominnee Waa'i ihoommo» yoolla.

⁹Gogoxxi Moollanni Waa'i «Keesammi Mine odim baximmina shooho'amu ammaniinsi ki'isaa hee'llo'i hiraagaan wocco'i ka sagara macceessakko'i keen hundim qoxxehe.

¹⁰Kanniinsi illageen manninaa diinatinaa malaayyi bit miqamam hee'ukkoyyo; manni hundam diina'oominne ixxi olla'anne ki'oo'isa issummi bikkina ayyi manchim xumminne aagaa firam hee'ukkoyyo.

¹¹Ihukkaarem kaba ka gatto'i minaadabanne illageen issummisa issoommoyyo.

¹²An xumma wixoommo; woyinim misha mishookko. Uullanne hurbaat mutookko; iimaniinsi xeen ga'nnookko. Gatu ka minaadabina ka hundam an uwwoommo.

¹³Yihuxxi minaadabaa Isra'ee'l minaadabaa! Mulli minaadabina duunchisa xigantakka'a hee'llakko'i qaxam kaba ki'nnuwwa gatisoommo; maassom ikkakkamo; badditakkotte; qoxxehe» yukko.

¹⁴Gogoxxi Moollanni Waa'i «Gaassi ki'nnuwwi anno'i eese quuqisso'i ammane qishixxoo'n ixxuwwa bi'iseena murte'ummo.

¹⁵Ihukkaarem kaba Yerusaaleemikaa Yihuxxi minaadabaa maasse'eena murte'aammo; ee bikkina badditakkotte.

¹⁶Ki'nnuwwi issimmi hasisoo luwwi kane; ki'nnuwwina'i ki'nnuwwim hanqa woccehe; oogaxxi beyyonnem xumma uwwoo hanqo'i oogato oogattehe.

¹⁷Ki'nnuwwiinsi mat mulleka hawwodeena sawwoone; qophphanonne hide'antakkotte; ee hundam an shigigoommane» yoolla gogoxxi Moollanni Waa'i.

¹⁸Gogoxxi Moollanni Waa'i sagar i beyyo waarukko.

¹⁹Gogoxxi Moollanni Waa'i «Soo'llaannonne, ontaannonne, lama'llaannonnee tommi aganannee soommantakkam hee'llakko'i soomman Yihuxxi minaadabina makkanee liiranchi ugudaa ihookko; ee bikkina ki'nnuwwi hanqaa xummaa iittehe» yoolla.

²⁰Gogoxxi Moollanni Waa'i «Mulli minaadabii lobakat beero'uwwanne hee'llam mannii Yerusaaleema waattam balli waarookko.

²¹Mat beero'i manni mulli beero'o matta'a ‹Waallehe, gogoxxi Moollanni Waa'iinsi eroomma uunxinona; neesem eehe'e malloommuulla› yitamo.

²²Ee'isinne gogoxxi Moollanni Waa'ina otossiteenaa maasse'oo'isinam uunxiteenaa dut mannii malaayyaam minaadabii Yerusaaleema waattamo.

²³Ee ayyaammuwwanne mulli uulli mannik tommi manchi mat Yihuxxi manchi beyyo hincita'a eddechchi kasa amadda'a ‹Waa'i ki'nnuwwinne yoo'isa macceensummi bikkina ki'nnuwwinne maqire mallona› yitamo» yukko.