Read Hadiyya Zakkaaryaas Kitaaba 9 Bible Online

Zakkaaryaas Kitaaba 9 - Hadiyya bible

Zakkaaryaas Kitaaba 9

¹ Isra'ee'l sulluwwikii mannikii illi Waa'anne usheexxaakkoo bikkina Hadiraak uullii Damaasqo'i beero'ii bi'oo'isa Waa'i wocu oogaxxi sagar kane.

²Oo oogaxxi sagarim Hadiraak uullinne gaba'llamoo Haamaataa lobakat qooroominne wo'mmaakkoo Xiiroosikaa Siidoo'n beero'uwwaa afookko.

³Xiiroos beero'i manni ixxuwwi gagina lobakat girbuwwa baxxo'ookko; gooqqi buchchisam biraa worqaa tuubbo'ookko.

⁴Ihukkaarem wixxaa'llo'oka hundam Waa'i elleesookko; ixxuwwi amaxxam dambalaqanne uunjookko; beero'im girinne shokkaa gii'lbuchchi ihookko.

⁵Asqaloo'n beero'i manni kaka moo'lla'a badditamo; Gaaza'i beero'i mannim kaka moo'imminne lobakata u'nnantamo; Eeqiroo'n beero'i mannim ee'isam orba'llamo; neeyyatom muttamo; Gaaza'i manni adila hooggamo; Asqaloonim udma'i ihaa gatookko.

⁶Ashdoodanne hamaaramaakkoo minaadab hee'ookko; bolxitam Fllisxee'm mannam sholliisoommo.

⁷Xiiga ittambee'isa ixxuwwi suumiinsi hooroommo; hooramu hurbaatam ittamoyyo; ixxuwwiinsi gatto'i keen i minaadabinne hamaaranta'a Yihuxxi sulliinsi mat moollisa ikkamo. Eeqiroo'n minaadab Iyyaabuus minaadaphphisam i minaadabinne hamaarantamo.

⁸Ihukkaarem an i mine bogaaniinsi egeroommo; wor amadaanim i minaadaba lagaa'llamoyyo; kaba qoto'aa egeroommo.

⁹Xiyoo'n landichche, erisa liirame; Yerusaalee'm landichche, ililihe! Oono'o, ki adil muccuraa gatisaanchoo. Maashaalli ihaa hallichchonne saa'llaa hallichchi geexanne, hallichchi wotaranne saa'llaa ki beyyo waarookko.

¹⁰Faraxxi gaare'e Efireemiinsi o'l faradom Yerusaaleemiinsi bi'isoommo; o'l xiyyuwwim iiqamookko. Ixxi minaadabina xumma alallaatookko; ixxi gassim dambalaqiinsi dambalaqa Efiraaxiis daajjiinsi ki'isaa uulli tochcho afookko.

¹¹Odim kiinninne aagummi xiiqqi Hidi'l Saga'l bikkina yaa wo'i bee'i barenne karanto'i keeno wolabbanonne fissoommo.

¹²Karatonne neeyyatinne hee'llakkam keeno, qoxxaalli ki'nnuwwi girbanne daba'llehe. Illageen hee'ukkaanniinsi lonsaa lam suume uwwoommisa kuroommo.

¹³Yihuxxi minaadaba tokkaashshe'isa, Efireemam tokkosamoo xiyyisa awwaaxxoommo. Giriik uulli goo'n ooso qaseena Xiyoo'n goo'n ooso bisa'isa issaa asse'oommo.

¹⁴Waa'i ixxi minaadabiinsi hanaan ihaa caakkaa moo'amookko; ixxi xiyyuwwim banqisa darabamookko. Moollanni Waa'i xurumbi sagara macceesisookko; woroo'n qa'l hambu'llam hafachchisam marookko.

¹⁵Gogoxxi Moollanni Waa'i ixxi minaadaba egerookko; ixxuwwi ixxuwwi diina'a bi'issamo; diina'ika kiyyo'i kina hancaacantamo; woyi'n diqaasa agaa dimbu manchisa shuuttamo. Ixxuwwi diina'ik xiig kiti'm xiig saahinanne wo'mmaa kiti'm beyyonne dunamoohannisa dunamookko.

¹⁶Ee balla allaaraanchi ixxi gereebba hawwodoo joriinsi gatisoohaannisa ixxuwwi Moollanni Waa'im ixxi minaadaba gatisookko. Adilla'n mare'enne hee'oo wereeggi belecce'oo'isa ixxuwwim Waa'i uullanne belecce'llamo.

¹⁷Ixxuwwi danaammuwwaa mishissam keenoo ikkamo; hurbaat woraadduwwa haareechchi woyi'n diqaasim baajaammuwwa dansookko.