Read Hadiyya Milkiyaas Kitaaba 1 Bible Online

Milkiyaas Kitaaba 1 - Hadiyya bible

Milkiyaas Kitaaba 1

¹Waa'i hiraagaanchi Milkiyaasanne Isra'ee'l minaadabina wocu hiraaqqi sagar Kane.

² Waa'i ixxi minaadabina «An ki'nnuwwa iittaammo» yoolla. Ihukkaarem ixxi minaadab «At neese iittitoo'isa mahinne lanqoommo?» yitamuulla. Waa'im «Eesa'aa Yaaqoobii abbaayyuwwi hee'llo'o; ihukkaarem an Yaaqoobaa ixxi shumo'oo iittummo.

³Eesa'aa ixxi shumo'oo sabummo; Eesa'aka duunaam uulla udma'i uulli issaa dabassummo; uulloomam wengereelli daabbaroo beyyi issummo» yaa dabarukko.

⁴Eedoo'm manna yamantam Eesa'i shumo'i «Ni beero'uwwa gindito'ookko; ihukkaarem neese daballaa banxoommo» yito'aare odim Waa'i «Ixxuwwi baxxamo; ihukkaarem an gindoommo; minaadab hundim ee uulla ‹damiqqi uulla› ee uullanne hee'oo mannam ‹Waa'i heer heerinam quuqaakkoo minaadaba› yita'a weeshshamo» yoolla.

⁵Ki'nnuwwim kaka ki'nnuwwi illinne moo'llakka'a «Waa'i Isra'ee'l uulliinsi haxonnem malaayyaamo!» yitakkamo.

⁶Gogoxxi Moollanni Waa'i qeessuwwina «Qachchi anna, awwaadaanchim ixxo gassoo moollanna lonsookko; oono'o an ki'nnuwwina anna; eehannah mahina eese lonsitakkamoyyo? ki'nnuwwinam an Moollanna; mahindu iina lomba uwwitakkamoyyo? Ki'nnuwwi eese gaddakko'oollayyonnihe; ihukkaarem ‹Neese keese gandummok Mahinnette?› yitakka'a eese xa'mmitakkamuulla.

⁷Oono'o, iina kitima hincaa'akkam beyyonne haashaaramaakkoo hurbaaxxi kitima hincaa'llakku'uuyyi ‹Kiina kitima hincaa'akkam beyyo haashaassinummok hinkidette?› yitakka'a xa'mmitakkamuulla; ki'nnuwwi haashaassitakk'ook iina kitima hincaa'akkam beyyo ‹Gadamaakkoohane› yitakka'a sawwimminnette.

⁸Ee'isinne qooqa, jabbaanchoo dim diinatee kitimina hincaa'llakkamaare matem hawwojjam issitakko'oka labooyyonnihe? eehido'i diinate ki'nnuwwi moollanno'ina irfo'i issitakka'a hincaa'llakkota'n liiramaa aa'ookkokaa galaxxookkokaa laboohonnihe?» yoolla.

⁹Gogoxxi Moollanni Waa'i «Qeessuwwa! Ka hundam issitakka'a lasage Waa'i ki'nnuwwina biijooma issoo'isina uunxitakkota'n ki'nnuwwi uunxato aa'oo laboohonnihe? Oohim ki'nnuwwi huushammato» yoolla.

¹⁰Gogoxxi Moollanni Waa'i «Iina kitima hincaa'akkam beyyonne awwaad bee'i giira giittakkamaanniinsi Waa'i mi'nneka gooca xufookkok ki'nnuwwiinsi mat manchim siidamaakkoohan yakkota'n, An ki'nnuwwanne liiramoombee'i bikkina iina hincaa'llakkam hurbaaxxi kitima aa'oommoyyo.

¹¹Oono'o, ka uulli minaadab hundim tochchiinsi tochchi afeebe'e iina lomba uwwitamo; hannonnem iina aduruusa wiriissitu'uuyyi muccur kitima hincaa'llamo; minaadab hundim eese lonsitamo.

¹²Ihukkaarem ki'nnuwwi ‹Waa'ina kitima hicaa'akkam beyyi haashaaramaakkoohane› yitakka'a gadamaakkoo kitima hincaa'llakko'i ammane haashaassitakko'ookko.

¹³Oono'o, ki'nnuwwi naacantakku'uuyyi ‹Ku hundim hoogisoohane› yitakkamo; ga'mmeka, dima te'im jabbaanchi diinate kitimina hincaa'llakkamo; an eekka aa'oommoka labissakka'ahennihe?

¹⁴Ixxena yoo diinatiinsi iina uwweena aagu saga'llisanne uwweena laboo muccur diinat hee'ukkuuyyi miiqisoo diinate iina kitim issaa hincaa'oo manchi duumamaakkoohan ihona; mashka'oomam an lombaam adila. I summim minaadaphphi beyyonne hundannem baddamaakkoohane» yoolla.