Read Hadiyya Milkiyaas Kitaaba 2 Bible Online

Milkiyaas Kitaaba 2 - Hadiyya bible

Milkiyaas Kitaaba 2

¹Gogoxxi Moollanni Waa'i Qeessuwwa «Kabadem ku ijaaj uwwamukkok ki'nnuwwinatte.

²Ki'nnuwwi baxxakkam baxinne hundinnem eese lonsimmi hasisookko; ihukkaarem i sagarina ijaajantakobeelas ki'nnuwwi hanenne duuncha asse'oommo; ki'nnuwwi maassom duunchanne dabaroommo; eekkam issoommok i ijaajo ki'nnuwwi tiironne sawwitakkobee'i bikkinatte.

³Oono'o, ki'nnuwwi mashka'inne an ki'nnuwwi ooso guzumo'oommo; kitimina hincaa'llakko'i diinaxxi oreetam ki'nnuwwi illenne binnaa'oommo; hacca uunjakkam beyyonnem uunjantakkamo.

⁴Ee ammane ka ijaajo hundam uwwummok anette ihummisa laqqakkamo; ee mashka'inne qeessuwwi ikko'i Leewe'innee ixxi shumo'innee aagummi hidi'l sagar qoxxaakkoohan ihaa hee'ookko» yukko.

⁵«An ixxuwwina uwwummi saga'l sagar heechchanee xummanee; eekka ixxuwwina uwwummok eese lonsitamisinatte hee'ukko; eeyya ee ammane hanqo'isam eese baddimminne i summa lonsitu'uuyyi hee'llo'ookko.

⁶Ixxuwwi huushammat ihoo'n hanqa losissam hee'llo'o; iinninne maqirem shiinnaatanta'a hee'llo'ookko; ixxuwwi er baxo baximmi xale'i ihoo'n mulli keenim jor baxiinsi daba'llitamisa issitam hee'llo'o.

⁷Ee bikkina ixxuwwi issitam hee'llo'isanne Waa'ika hanqo'i lachcha losisimmi qeessuwwi baxo. Qeessuwwi gogoxxi Moollanni Waa'ina asse'amaan ikko'i bikkina i doo'l mada'e ihukkisa losimmina minaadab qeessuwwi beyyo marimmi hasisookko.

⁸«Ihukkaarem ki'nnuwwi hanqo'i googiinsi qee'llitakko'ookko; ki'nnuwwi losishshinnem lobakat keeno huushissakko'ookko; ki'nnuwwinne maqire aagummi hidi'l sagaram ginditakko'ookko.

⁹Iina ijaajantakkobee'i bikkinaa losissaku'uuyyim manna gudaanchoominne moo'llakkobee'i bikkinaa anim hundem minaadaphphi illagenne gadantakko'oo keenoo sholle'llakko'oo keenoo issoommo» yoolla.

¹⁰Neese hundim mat anni oosoyyonnihe? Neese hundam qooccukkokdu matem Waa'ayyonnihe? Eehannah gaassi niyyanno'inne hidi'l sagara gindinummuuyyi neesena'i neesem amma'nnammoombee'k mahinatte?

¹¹Yihuxxi minaadab Waa'ina aaggo'i hidi'l sagara gindita'a Yerusaaleemannee uulloom hundoomannemii shigigaa'oo haashaarammi luwwa baxxo'ookko; Waa'i iittoo ixxi mine haashaassito'ookko; ixxuwwim qophpha'n waa'ina otossoo meento eebbo'o.

¹²Kaka issookkoka hundam Waa'i Isra'ee'l minaadaphphi mateeyyoomiinsi hoorona! Ni minaadab gogoxxi Moollanni Waa'ina hincaa'oo kitimanne exxoobee'isa firukkisam gatona!

¹³Odim Ki'nnuwwi «Indiiddinne, wi'llinnee kichchechchinnee Waa'ina kitima hincaa'akkam beyyo ifiissakkamo; mashka'oomim Waa'i ki'nnuwwika kitima aa'oobee'i bikkinatte.

¹⁴«Mahina ni kitima aa'ooyyo?» yitakka'a xa'mmitakko'ookko. Mashka'oomim woraaddaninne eebbakko'i hidi'l saga'l meentina aaggakko'i hidi'l sagara ginditakko'ookko. Waa'im ki'nnuwwi lambe'enne naqaash hee'ukko.

¹⁵Waa'i ki'nnuwwinaa ki'nnuwwi meentinaa mat orachchii mat sawwitii hee'oo'isa issaa hee'ukkoyyonnihe? Ka'isindu ixxek sawwit mah hee'ukko? Ixxek horoor sawwit Waa'ina minaadab ikko'oo ooso qattakkamisinatte hee'ukko. Ee bikkina ki'nnuwwi annannichchim ki'nnuwwi meentina aaggakko'i hidi'l sagara qooxxitakka'a ege'llehe.

¹⁶Isra'ee'l Moollanni Waa'i «An manchikaa meentichchokaa annanni ihimma saboommo; eddechcha oogato boqqissimminne ifiissimmam saboommo; ixxi orachcho eddechchinne ifiisoo'isa damiga baxaa ifiisoo manchom saboommo. Ee bikkina amma'nnancha hoogimmiinsi ege'llehe» yoolla.

¹⁷Waa'a! Ki'nnuwwaanninne awwaad bee'i woshshinne hoogissakko'ookko; ihukkaarem hoognisummok mahinnette?» yitakka'a xa'mmitakkamuulla; ixxo hoogissakko'ok «Jor luwwa issitam keen hundim gogoxxi Moollanni Waa'i illagenne xabbeen keeno; hore'oomam ixxuwwanne liiramookko» odim «Hanqo'i oogato oogatoo Waa'i hannonne yookko?» yitakka'a xa'mmimminnette.