Read Hadiyya Maatiwoos Mishiraachcha 1 Bible Online

Maatiwoos Mishiraachcha 1 - Hadiyya bible

Maatiwoos Mishiraachcha 1

¹Abrihaamiinsii Daawiitiinsii qaramu Yesuus Kiristoos qaranchi shumo'i lugum kane.

²Abrihaam Yisaaqa qarukko; Yisaaqim Yaaqooba qarukko; Yaaqoobim Yihudaa ixxi abbaayyuwwaa qarukko.

³Yihudim Faareesaa Zaaraanaa lamem oosom Ti'imaarenne qarukko. Faareesim Heesroona qarukko; Heesroonim Araama qarukko.

⁴Araamim Aaminaadaaba qarukko; Aaminaadaabim Na'aasoona qarukko; Na'aasoonim Salmoona qarukko.

⁵Salmoonim Ra'aabenne Boo'eeza qarukko; Boo'eezim Ruutanne Iyyoobeeda qarukko; Iyyoobeedim Issayye qarukko.

⁶ Issayyem adil Daawiita qarukko; Adil Daawiitim Ooriyotanne hee'llo'i meentichchonne Salamoona qarukko.

⁷Salamoonim Roobi'aama qarukko; Roobi'aamim qarukko; Abiiyim Asaafa qarukko.

⁸Asaafim Yoosaafixa qarukko; Yoosaafixim Iyyooraama qarukko; Iyyooraamim Ooziya qarukko.

⁹Ooziyim Iyyo'aataama qarukko; Iyyo'aataamim Akaaza qarukko; Akaazim Hizqiyaasa qarukko.

¹⁰Hizqiyaasim Minaasa qarukko; Minaasim Amooxa qarukko; Amooxim Iyyoosiyaasa qarukko.

¹¹Isra'ee'l minaadab qeefadanta'a Baabiloo'n uulla matto'i doollenne Iyyoosiyaas Ikkooniyaanaa ixxi abbaayyuwwaa qarukko.

¹²Qeefadanta'a Baabiloona matta'a lasage Ikkooniyaanim Saalaataala qarukko; Saalaataalim Zarubaabeela qarukko.

¹³Zarubaabeelim Abiyooda qarukko; Abiyoodim Eliyaaqeema qarukko; Eliyaaqeem Azaara qarukko.

¹⁴Azaarim Saadooqa qarukko; Saadooqim Akiima qarukko; Akiimim Eliyooda qarukko.

¹⁵Eliyoodim Ali'aazara qarukko; Ali'aazarim Maataana qarukko; Maataanim Yaaqooba qarukko.

¹⁶Yaaqoobim Yooseefa qarukko; Yooseefim Maaraame xeehaa hee'ukko. Isem Kiristoosa yamamu Yesuusa qatto'o.

¹⁷Abrihaamiinsi ki'isaa Daawiitanne afeebe'e tommoo soor qarancha; Daawiitiinsi ki'isaa Baabiloo'n uulli manni qeefaddo'i doollenne afeebe'e tommoo soor qarancha. Baabiloo'n uulli manni qeefaddo'i doolliinsi ki'isaa Kiristoos qaranchanne afeebe'e tommoo soor qarancha.

¹⁸ Yesuus Kiristoos qaramukkis kidette; ixxi ama Maaraame Yooseefina xeehanta'a hee'llu'uuyyim ladiisantoo'nnim Keesammi Ayyaaniinsi lamfoorette ikka'a siidanto'o.

¹⁹Yooseefim er manchi hee'u bikkina manni illagenne ise tuussiiseena hasukkoyyo. Ee bikkina maaxaqqanne ureena sawwukko.

²⁰Ee woshsha sawwukkuuyyi hee'onam Moollanni asse'amaanchi haqaawwonne moo'amaa «Daawiit beet Yooseefa, at xeekkitti Maaraame lamfoorette ikko'ok Keesammi Ayyaaniinsette ihu bikkina ise eebbeena baddititte.

²¹ Isem goonchi beeto qattamo. Ixxim ixxi minaadaba baaxiiliinsi gatisoo bikkina ixxeka summa Yesuusa yitaa weeshshootto» yukko.

²²Oo hundim ihukkok hiraagaanchinne ihaa Waa'i

²³ «Oono'o, baajaam landichcho lamfoorette ikkamo; goonchi beetom qattamo. Summam Amaanu'eela yakka'a weeshakkamo» yaa wocukkok wo'mmoo'isinatte. Amaanu'eela yimmim «Waa'i niinninnette» yimma.

²⁴Yooseefim diriiriinsi baqu ammanenne Waa'i asse'amaanchi kurukkisam ixxi xeehu Maaraame ixxi arette issaa eebukko.

²⁵ Ihukkaarem won beeto qatteebe'i afeebe'e eebaqqanchi edancha edamukkoyyo. Yooseef ee qaramu ciilichchika summa «Yesuusa» yaa weeshukko.