Read Hadiyya Maatiwoos Mishiraachcha 10 Bible Online

Maatiwoos Mishiraachcha 10 - Hadiyya bible

Maatiwoos Mishiraachcha 10

¹Yesuus ixxeka tommoo lamem losaanoo ixxi beyyo weeshaa habusa fissitamisinaa annanni annanni jabbiinsii hoongiinsii hundiinsim manna fayyiissamisinaa malaayye uwwukko.

²Tommikii lamem asse'amaa'nnekim summi kane. Ixxuwwim Pheexiroosa yakkam Simi'oonatte, ixxi abbaayyi Indiraasatte, Zabdiwoos oos Yaaqoobattee Yohaannisattee,

³Filiphphoosatte, Bartoloomoosatte, Toomaasatte, qaraxaanchi hee'u Maatiwoosatte, Ilfiyoos beet Yaaqoobatte, Taadiwoosatte,

⁴uullina to'achchaanchi Simi'oonattee Yesuusa lehina higisaa uwwu Asqorotokkichchi Yihudattee.

⁵Yesuus ee tommoo lamem asse'amaanom «Mulli minaadaphphi uulla mattakkotte. Samaare'i beero'om aaggakkotte.

⁶Ihukkaarem gereebbisa bi'llo'i Isra'ee'l minaadaphphi beyyo mallehe.

⁷ Mattakka'a ‹Waa'ik adillan hincaakko› yitakka'a alallaattehe.

⁸Xissu keeno fayyiissehe; lehu keenom lehiinsi ki'issehe; oddomachchonne firoo baddisoo jabbi yoo keenom fayyiissakka'a muccussehe; habusam manniinsi fissehe. Kora'a aa'llakko'oka kora'am uwwehe.

⁹Worqam ihukko te'im biram ihukko te'im naasam ihukko mah diinatem ki'nnuwwi ladimonne amaddakkotte.

¹⁰ Googinam sinqa te'im lago'i eddechcha te'im lago'i caamma'a te'im bicco amaddakkotte. Mashka'oomim baxoo manchina itoo luwwa uwwimmi hasisookko» yukko.

¹¹Odim Yesuus «Aaggakkam beero'onne te'im gattenne hundannem ki'nnuwwa aa'eena hasoo mancho xa'mmitakka'a ee beyyo uttakka'a mattakkeebe'e ee manchinne maqire afuullehe.

¹²Manni mine aaggakkam ammane xummaatissehe.

¹³Ee mi'n mannimdu ki'nnuwwa aa'ulas ki'nnuwwik xummi ixxuwwina ihona; ihukkaarem ki'nnuwwa aa'ubeelas ki'nnuwwik xummi ki'nnuwwinam daba'llona.

¹⁴ Ayyi manchim ki'nnuwwa aa'ubeelas te'im ki'nnuwwika sagara macceesubeelas ee miniinsi te'im ee beero'iinsi fittakkam ammane ki'nnuwwi lokkiinsi dira giggissehe.

¹⁵ Hanqinam an ki'nnuwwina kuroommo; oogaxxi ayyaamonne ee beero'onne afoo guzumo'iinsi Soddomanne Gomoranne afoo sholle'ookko» yukko.

¹⁶ Odim Yesuus «Oono'o! An ki'nnuwwa oro'i lambe'enne gereebbisa issaa asse'oommo. Ee bikkina ki'nnuwwi hamashshisa qoolluwwi ikkehe; handare'isam maashaalluwwi ikkehe.

¹⁷ Daannuwwinam ki'nnuwwa higisakka'a uwwakkamo; wixxixxi minneewwannem ganakkamo. Ee bikkina manna ege'llehe.

¹⁸I mashka'inne kasasantakka'a gassaa'n illagennee adilluwwi illagennee oogato'ina hincitakkamo. Ee'isinne ixxuwwinaa mulli minaadabinaa i bikkina kuttakkamo.

¹⁹Oogato'ina hincaa'akkam ammane woccakkam woshshi ki'nnuwwina uwwamoo bikkina ‹Hinkid te'im maha woncoommo?› yitakka'a hawwitakkotte.

²⁰Mashka'oomim ee ammane ki'nnuwwi woronne ihaa wocookkok Waa'ik Keesammi Ayyaana bagaan ki'nnuwwayyo.

²¹ Abbaayyim abbaayyo, annim beeto lehina higisaa uwwookko. Oosim amannee annannee ki'lla'a shisiissamo.

²² I mashka'inne manni hundim ki'nnuwwa sabookko. Ihukkaarem lasaanchi afeebe'e qoxxaa iyyaqqookkok gatookko.

²³Mat beero'onne hawwisakkam ammane mulli beero'o gibbehe. Hanqinam an ki'nnuwwina kuroommo; Manchi Beet waareebe'i afeebe'e Isra'ee'l beero'i hundam affakka'a guullitakkamoyyo.

²⁴ Losookkok losisaanchiinsi lophphooyyo. Agishshim ixxi moollanniinsi lophphooyyo.

²⁵ Losookkok ixxi losisaanchisa, awwaadaanchim ixxi moollannisa ihukkaa'lleensi ihookko. Mi'n annichcho ‹Bi'eelzeebula› yakkolas ixxi mi'n abaroosa hinkaa'nna lonsakka'a jor summinne weeshakkamo?» yukko.

²⁶ Odim Yesuus «Manna badditakkotte! Caakkoobee'isa ifiisamu luwwi te'im la'amoobee'isa maaxamu luwwi ma'lluchchim bee'e.

²⁷Ee bikkina tuunsonne ki'nnuwwina kurummoka caakkanne kullehe. Mulla macceessakko'okam meeranne fittakka'a alallaattehe.

²⁸Maara shito'aarem foore shiteena xantambee'i keeno badditakkotte. Ihukkaarem fooree maaraa xoo'oobee'i giiranne shokkiisaa bi'iseena xanoo Waa'a baddehe.

²⁹Lam waaxiige mexxo'i saantibinne bitaa'llakkamuullayyonnihe? Waa'i yubeelas ixxuwwiinsi mat waaxiigem lehooyyo.

³⁰Ki'nnuwwika'i horoo'l saraatim xigamaakkoohane.

³¹Ee bikkina badditakkotte! Lobakat waaxiiggeewwiinsi ki'nnuwwi hore'em lophphitakkamo» yukko.

³²Odim Yesuus «Manni illagenne eese lagoobee'eka hundam anim iimanenne yoo Iyyanni illagenne lagoommoyyo.

³³ Ihukkaarem manni illagenne eese lagookkoka hundam anim iimanenne yoo Iyyanni illagenne lagoommo.

³⁴Uullanne xumma eebeena waarummoka labissakkotte. An waarummok ora eebeenatte bagaan xumma eebeena waarummoyyo.

³⁵ An waarummok annanne beeto, amanne landichcho, ballonne beetare ki'iseenatte.

³⁶Ee bikkina manchina ixxi mi'n abaroos maso'i ihookko» yukko.

³⁷Odim Yesuus «Ayyi manchim iinniinsi lonsaa ixxi anna te'im ixxi ama iittookkok iihan iheena xanooyyo. Odim ayyi manchim iinniinsi lonsaa ixxi beeto te'im ixxi landichcho iittookkok iihan iheena xanooyyo.

³⁸ Ayyi manchim ixxo lehonne afisoo hawwo iyyaa eese awwonoobee'ek iihan iheena xanooyyo.

³⁹ Ixxi foore gatiseena hasookkok hundim ixxi foore bi'isookko. Ihukkaarem i bikkina ixxi foore bi'isookkok hundim ixxi foore gatisookko» yukko.

⁴⁰ Odim Yesuus «Ki'nnuwwa aa'ookkok eese aa'ookko; eese aa'ookkokim eese asse'ukkoka aa'ookko.

⁴¹Hiraagaanchom hiraagaanchi ihu bikkina aa'ookkok hiraagaanchika irifo'o a'llookko. Muccur manchom muccur manchi summinne aa'ookkok oo muccur manchi aa'oo irifo'o ixxim a'llookko.

⁴²Hanqinam an ki'nnuwwina kuroommo; ayyi manchim ka hoffi kee'nnaannina matina eese awwonaanchi ihu bikkina mat kubbaayyi siggaalli wo'o uwwookkok irifo'o siixxookko» yukko.