Read Hadiyya Maatiwoos Mishiraachcha 11 Bible Online

Maatiwoos Mishiraachcha 11 - Hadiyya bible

Maatiwoos Mishiraachcha 11

¹Tomminaa lam losaaninaa awwontam ijaajo Yesuus uwwaa guullaa lasage ee beyyo uraa ee gadanonne yoo beero'uwwanne alallaateenaa losiseenaa marukko.

²Xammaqaanchi Yohaannis ee ammane karaxxi minenne hee'ukko. Karaxxi minenne hee'ukkuuyyim Kiristoos bax bikkina macceesaa « ‹Waarookko› yakko'i Kiristoos atettennii te'im mulleka egello?» yaa ixxi losaa'nneka lamo Kiristoos beyyo asse'ukko.

⁴Yesuusim dabaraa «Moo'llakko'okaa macceessakko'i luwwaa mattakka'a Yohaannisina kullehe.

⁵ Oono'o! Qooqquwwi moo'llamuulla; dimmuwwim xabbita'a taakke'llamuulla; oddomachchonne firoo baddisoo jabbiinsim manni fayye'aa muccuroolla. Gawwuwwi macceessamuulla; leto'i keen lehiinsi ki'llamuulla; buxina mishiraachchi sagar kuramoolla.

⁶Eesenne malamaa qolamoobee'ek maasse'amaakkoohane» yukko.

⁷Yohaannis losaan mattu'uuyyim Yohaannis bikkina Yesuus ka'isa yaa minaadabina kurimma asheerukko. «Udma'a mattakko'ok maha moo'llakkeenatte? Hafachchi heekkeesoo shasha moo'llakkeenattennihe?

⁸Te'im mahina mattakko'o? Danaam eddechcha edde'u mancho moo'llakkeenannihe? Danaam eddechcha edde'oo keen adilluwwi minenne siidamookko.

⁹Eehannaha mahina mattakko'o? Hiraagaancho moo'llakkeenattennihe? Eeyya, an ki'nnuwwina kuroommo; hiraagaanchiinsim lophphookkoka moo'llakkeenatte.

¹⁰ Keesammi Kitaabanne ‹Oono'o! Kiina googo gudisoo i asse'amaancho ki illagenne asse'oommo› yamamaa kitaabamukkok Yohaannis bikkinatte.

¹¹Hanqinam an ki'nnuwwina kuroommo; qaramu mannanne hundannem Xammaqaanchi Yohaannisiinsi lophphookkok hore'em bee'e. Ihukkaarem hundiinsim hoffe'ookkok Waa'i adillanonne ixxeensi lophphookko.

¹² Xammaqaanchi Yohaannis doolliinsi ki'isaa kaballi afeebe'e Waa'ik adillan lobakata gafe'amoolla; malaayyaam keenim angi issiteena yakitamuulla.

¹³Hanenne waaroo woshshi bikkina hiraagaanii Seerii hundim Xammaqaanchi Yohaannisanne afeebe'e kutto'ookko.

¹⁴ Ki'nnuwwi amma'nnitakkolas ‹Eeliyaas waarookko› yamamukkok Yohaannisinatte.

¹⁵Qoossaa macceesoo macci yookkok macceesona» yukko.

¹⁶Odim Yesuus «Ka doolli manna mahinne akeekisoommo? Meeranne afuutta'a ixxuwwi dara'mmanna weeshshu'uuyyi

¹⁷‹Dibbe'e aphphinsummo,[6] kaddakko'oyyo; sollummo, wi'llitakko'oyyo› yitam oosinne kobi'llitamo.

¹⁸Xammaqaanchi Yohaannis soommanukkuuyyii woyi'n diqaasa agoo'nnii waarukkaare ‹Kuka'i habus amadaakkoohane› yakko'o.

¹⁹Manchi Beet itukkuuyyii agukkuuyyii waarukkaare ‹Moo'llehe; kuk itaahii agaahii hoogoobee'i gollaancho! Qaraxaaninaa baaxiilaaninaa beshichcho› yakko'o. Ihukkaarem Waa'ik qooroom hanqo'an ihukkis baxinne moo'amaakko» yukko.

²⁰Ee lasage Yesuus maalalsiisoo agannuwwa issu beero'uwwi jora issimma uttobee'i bikkina ka'isa yukkuuyyi acceeqasimma asheerukko.

²¹ «Aayye Koraazeena! Aayye Beetasaayda! Ki'nnuwwanne issamu aganni Xiiroosannee Siidoonannee issamaakkoota'n xiddi eddechcha edde'lla'a gii'l buchcham ixxuwwi gaganne laphphita'a gaassim baaxiilo biiraa yitam hee'llo'o.

²²Ee bikkina an ki'nnuwwina kuroommo; Waa'i oogatoo ayyaamo ki'nnuwwiinsi Xiiroosinaa Siidooninaa sholle'ookko.

²³ Qifirinnaahooma, at iimane affaattoollayyonnihe? Ihukkaarem at Si'oolanne dillitootto. Keesenne issamu maalalsiisoo agannuwwi Soddomanne issamaakkoohan ihuta'n oo beero'i kaballi afeebe'em bi'am hee'ukkoyyo.

²⁴ Ee bikkina an ki'nnuwwina kuroommo; oogaxxi ayyaamo kiinniinsi Soddomina sholle'ookko» yukko.

²⁵Ee ammane Yesuus «Iimaninaa uullinaa Moollanni Iyyanna! Kaka qoolluwwiinsii lachchaammuwwiinsii daphphaa'llaa lachbee'i keenina caakkissitti bikkina keese galaxxoommo.

²⁶Eeyya, Iyyanna! Kuk ki doo'lla.

²⁷ Hundi luwwam Iyyanni iina uwwaakko. Anniinsi bagaan Beeto la'ookkok matim bee'e. Ee'isam Beetiinsi bagaan Anna la'ookkok matim bee'e; Beet la'iseena doo'llukkaanniinsi bagaan ayyim Anna la'eena xanooyyo.

²⁸Iyyi kee'mmu hoongaan keen hundim i kollonne waallehe; an usheexxisoommo.

²⁹ Ki'nnuwwi iikka gaanjaqqa massitakka'a iyyehe; iinniinsim lossehe. Mashka'oomim an qishixxoommanee maashaallaa; ki'nnuwwi foorinam usheexxato siiddakkamo.

³⁰Iikki axaqqim kee'mmoobee'ane. I iyyim sholle'aalla» yukko.